കോവളത്ത് വിദേശവനിതയുടെ കൊലപാതകത്തില് സര്ക്കാരിനെതിരെയും പോലീസിനെതിരെയും ആഞ്ഞടിച്ച് വിദേശവനിതയുടെ ഭര്ത്താവ് രംഗത്ത്
കോവളത്ത് വിദേശ വനിതയുടെ കൊലപാതകത്തില് സര്ക്കാരിനെതിരെയും പൊലീസിനെതിരെയും ആഞ്ഞടിച്ച് വിദേശവനിതയുടെ ഭര്ത്താവ് ആന്ഡ്രൂ ജോര്ദാന് രംഗത്ത് . ബന്ധുക്കള് ആവശ്യപ്പെട്ടെന്ന പേരില് മൃതദേഹം ദഹിപ്പിച്ചതില് ദുരൂഹതയുണ്ടെന്നും കൊലപാതകം നടന്നതിന് ശേഷം സംഭവിച്ചതെല്ലാം ടൂറിസം വകുപ്പ് ആസൂത്രണം ചെയ്തതാണെന്നും അദ്ദേഹം ആരോപിച്ചു. തിരുവനന്തപുരത്ത് നടത്തിയ വാര്ത്താ സമ്മേളനത്തിലാണ് ആന്ഡ്രൂ സംസ്ഥാന സര്ക്കാരിനെതിരെ രംഗത്തെത്തിയത്. നിലവില് പിടിയിലായവരാണ് യാഥാര്ഥ പ്രതികളെന്ന് തോന്നുന്നില്ല. ആരെയെങ്കിലും മുന്നില് നിറുത്തി കേസ് അവസാനിപ്പിക്കാനാണ് പൊലീസിന് താത്പര്യം. കേസിലെ ദുരൂഹതകള് മാറ്റാന് സി.ബി.ഐ അന്വേഷണം ആവശ്യപ്പെട്ട് ജൂണ് ആറിന് മുഖ്യമന്ത്രിക്ക് പരാതി നല്കിയിട്ടും ഫലമുണ്ടായില്ല. ഇതിനെ തുടര്ന്നാണ് ഹൈകോടതിയെ സമീപിച്ചത്.
ബലാല്സംഗം നടന്നതായി കണ്ടെത്തിയിട്ടുപോലും മൃതദേഹം സംസ്കരിച്ചത് സര്ക്കാരിന്റെ ഭാഗത്തുനിന്നുള്ള വീഴ്ചയാണ്. ഒരിക്കലും ഇത്തരം കേസുകളില് കുടുംബക്കാര് ആവശ്യപ്പെട്ടാല് പോലും മൃതദേഹം സംസ്കാരിക്കാന് പാടില്ലെന്ന് സര്ക്കാരിനും പൊലീസിനും അറിയാവുന്നതാണ്. മൃതദേഹം ദഹിപ്പിക്കരുതെന്ന് ആവശ്യപ്പെട്ട് മനുഷ്യാവകാശ കമീഷന്റെ ഉത്തരവ് ഡി.ജി.പിക്ക് നേരിട്ട് കൈമാറിയെങ്കിലും ഉത്തരവ് ഒപ്പിട്ട് വാങ്ങാന് അദ്ദേഹം തയ്യാറായില്ല. തുടര്ന്ന് 45 മിനിട്ടിന് ശേഷം മൃതദേഹം സംസ്കരിച്ചു.സംസ്കാര ചടങ്ങുകള് സര്ക്കാര് ഹൈജാക്ക് ചെയ്തു. ക്രിസ്തീയ ആചാരപ്രകാരം മൃതദേഹം ദഹിപ്പിക്കാറില്ല. എന്നിട്ടും ദഹിപ്പിച്ചത് അന്വേഷണം ഇവിടം കൊണ്ട് നിറുത്താനുള്ള സര്ക്കാരിന്റെ ഗൂഢ ഉദ്ദേശ്യത്തിന്റെ ഭാഗമാണ്. പോസ്റ്റ്മോര്ട്ടം റിപ്പോര്ട്ടിലോ ഫോറന്സിക് റിപ്പോര്ട്ടിലോ മൃതദേഹത്തിന്റെ പഴക്കം പറയുന്നില്ല.
കെമിക്കല് റിപ്പോര്ട്ട് വരുന്നതിന് മുമ്പ് മൃതദേഹം സംസ്കരിക്കുകയായിരുന്നു.കേസൊതുക്കി തീര്ക്കാന് ടൂറിസം വകുപ്പിന്റെ ഭാഗത്തുനിന്ന് തുടരെ ശ്രമങ്ങള് ഉണ്ടായി. കുറച്ച് പണവും കൊടുത്ത് സഹോദരിയെ പറഞ്ഞയച്ചു. കേസുമായി ബന്ധപ്പെട്ട വിവരങ്ങളൊക്കെ അറിഞ്ഞത് മാധ്യമങ്ങളില് നിന്നാണ്. പൊലീസ് ഒരുകാര്യവും തങ്ങളുമായി പങ്കുവെക്കാന് തയ്യാറായില്ലെന്നും ആന്ഡ്രൂ ആരോപിക്കുന്നു. തങ്ങളെ സഹായിക്കാന് ശ്രമിച്ചവരെ അപമാനിക്കാന് ശ്രമമുണ്ടായി.
കേസില് അറസ്റ്റിലായവര്ക്ക് ഇംഗ്ലീഷ് നന്നായി സംസാരിക്കാന് അറിയില്ല. ഇത്തരത്തിലുള്ളവരുടെ കൂടെ തന്റെ സുഹൃത്ത് പോയെന്നത് വിശ്വസിക്കാനാകില്ല. പരിചയമില്ലാത്തവരുമായി അവള് ഇടപെഴകാറില്ല. അവളെ ആരൊക്കെയോ തട്ടിക്കൊണ്ടുപോയി കൊലപ്പെടുത്തിയ ശേഷം കണ്ടല്ക്കാട്ടില് കൊണ്ട് ഇട്ടതാകാം. കണ്ടല്ക്കാട്ടില് കൈരേഖകള് തെരയുന്ന പൊലീസ് തന്റെ ഭാര്യയുടെ നഷ്ടപ്പെട്ട എട്ട് പല്ലുകള് കണ്ടെത്തിയിട്ടില്ല. നീതി ലഭിച്ചില്ലെങ്കില് അന്താരാഷ്ട്ര കോടതിയെ സമീപിക്കുമെന്നും ആഡ്രൂസ് അറിയിച്ചു.
https://www.facebook.com/Malayalivartha