കെ.എസ്.ആര്‍.ടി.സിയില്‍ ആറ് മാസത്തിനിടെ പ്രതിമാസം 10 ഡ്യൂട്ടിയില്‍ താഴെ മാത്രം ജോലിക്കെത്തിയ 150 ഡ്രൈവര്‍മാരെ സ്ഥലംമാറ്റി. വിദൂര ഡിപ്പോകളിലേക്കാണ് എല്ലാവരെയും മാറ്റിയത്. തിരുവനന്തപുരം ജില്ലയിലെ വിവിധ ഡിപ്പോകളില്‍ മാത്രം 46 പേരെ മാറ്റി. തിരുവനന്തപുരം സെന്‍ട്രലിലെ എട്ടും വെഞ്ഞാറമൂട് ഡിപ്പോയിലെ നാലും വികാസ്ഭവനിലെ ഏഴും പേര്‍ സ്ഥലം മാറ്റം കിട്ടിയവരിലുണ്ട്. ഇവരെല്ലാം കണ്ണൂര്‍, കാഞ്ഞങ്ങാട്, തലശ്ശേരി ഡിപ്പോകളിലാണ് ഇനി ജോലി ചെയ്യേണ്ടത്. ആലപ്പുഴ, ആലുവ എന്നിവിടങ്ങളിലുള്ളവരെ കാസര്‍കോട്ടേക്കും ചടയമംഗലം, ചെങ്ങന്നൂര്‍, ചങ്ങനാശ്ശേരി ഡിപ്പോകളിലുള്ളവരെ കാഞ്ഞങ്ങാട്, തലശ്ശേരി എന്നിവിടങ്ങളിലേക്കും സ്ഥലംമാറ്റി. െ്രെഡവര്‍മാരുടെ കുറവുമൂലം സര്‍വിസ് മുടങ്ങുന്നത് വര്‍ധിക്കുന്ന സാഹചര്യത്തില്‍ ഇത് പരിഹരിക്കാന്‍ കര്‍ശന നടപടികളാണ് മാനേജ്മന്റെ് സ്വീകരിക്കുന്നത്.

ജോലിക്ക് ഹാജരാകാത്തവര്‍ക്കുള്ള അന്ത്യശാസനമായി നോട്ടീസ് അയച്ചിരുന്നു. ഇവരില്‍ നല്ലൊരു ശതമാനവും അനധികൃത ലീവില്‍ വിദേശത്ത് ജോലി ചെയ്യുകയാണ്. നിശ്ചിത സമയത്തിനുള്ളില്‍ ജോലിക്കെത്തിയില്ലെങ്കില്‍ പിരിച്ചുവിടുമെന്നാണ് മാനേജ്മന്റെ് നിലപാട്. വിരമിച്ച െ്രെഡവര്‍മാരെ പുനര്‍നിയമിക്കാനുള്ള നീക്കം കോടതി ഇടപെട്ട് തടഞ്ഞിരുന്നു. ഈ സാഹചര്യത്തില്‍ കാലഹരണപ്പെട്ട പി.എസ്.സി റാങ്ക് ലിസ്റ്റില്‍നിന്ന് മാനദണ്ഡങ്ങള്‍ പാലിച്ച് എം പാനല്‍ വ്യവസ്ഥയില്‍ ഡ്രൈവര്‍മാരെ നിയമിക്കാനുള്ള നടപടികളും തകൃതിയാണ്. ഇതിനിടെയാണ് അകാരണമായി ജോലിക്ക് ഹാജരാകാത്ത 150 പേര്‍ക്കെതിരെയുള്ള ശിക്ഷണ നടപടി.