നരേന്ദ്ര മോദി സര്ക്കാരിനെതിരെ പ്രതിപക്ഷം കൊണ്ടുവന്ന ആദ്യ അവിശ്വാസ പ്രമേയം നാളെ ലോക്സഭയില് ; ദേശീയ രാഷ്ട്രീയം ഉറ്റുനോക്കുന്നത് ശിവസേന സ്വീകരിക്കുന്ന നിലപാടിനെ
നരേന്ദ്ര മോദി സര്ക്കാരിനെതിരെ പ്രതിപക്ഷം കൊണ്ടുവന്ന ആദ്യ അവിശ്വാസ പ്രമേയം നാളെ ലോക്സഭയില് ചര്ച്ച ചെയ്യാനിരിക്കെ ദേശീയ രാഷ്ട്രീയം ഉറ്റുനോക്കുന്നത് എന്.ഡി.എ സഖ്യകക്ഷിയായ ശിവസേന സ്വീകരിക്കുന്ന നിലപാടിനെ പറ്റിയാണ്. പ്രതിപക്ഷം ഒറ്റക്കെട്ടായി കൊണ്ടുവരുന്ന അവിശ്വാസ പ്രമേയ നീക്കത്തെ എളുപ്പത്തില് നേരിടാമെന്ന പൂര്ണ ആത്മവിശ്വാസത്തിലാണ് ബിജെപി.
535 അംഗ ലോകസഭയില് ബിജെപി നയിക്കുന്ന എന്ഡിഎയ്ക്ക് 313 അംഗങ്ങളാണ് ഉള്ളത്. അവിശ്വാസ വോട്ടെടുപ്പ് വിജയിക്കാന് വേണ്ടുന്ന 268നേക്കാള് എത്രയോ കൂടുതല് പിന്തുണ ബിജെപിക്കുണ്ട്. ശിവസേന സര്ക്കാരിനൊപ്പം നില്ക്കുമെന്ന ആത്മവിശ്വാസമാണ് ബിജെപി പ്രകടിപ്പിക്കുന്നത്.
കഴിഞ്ഞ കുറച്ച മാസങ്ങളായി ബി.ജെ.പിക്കെതിരെ രൂക്ഷവിമര്ശനങ്ങളാണ് ശിവസേനയുടെ ഭാഗത്ത് നിന്നുണ്ടാകുന്നത്. ബി.ജെ.പിയുടെ രാഷ്ട്രീയ ശത്രു ശിവസനേയാണെന്നും ബി.ജെ.പി ഭ്രാന്തനായ കൊലയാളിയാണെന്നുമൊക്കെയുള്ള പ്രസ്താവന സഖ്യത്തില് തന്നെ വിള്ളല് വീഴ്ത്തിയിരുന്നു. പല തവണയായി രാഹുല് ഗാന്ധിയേയും കോണ്ഗ്രസിനേയും പ്രശംസിക്കാനും മടി കാട്ടിയില്ല. 1990 മുതല് ശിവസേന എന്ഡിഎ സഖ്യകക്ഷിയാണ്.
2014ലെ തെരഞ്ഞെടുപ്പില് മഹാരാഷ്ട്രയില് ബിജെപി ശിവസേനയേക്കാള് മുന്നിലെത്തിയതോടെയാണ് അസ്വാരസ്യങ്ങള്ക്ക് തുടക്കമായത്. 2019ലെ പൊതുതെരഞ്ഞടുപ്പില് എന്ഡിഎ സഖ്യകക്ഷിയായിട്ടല്ല മത്സരിക്കുക എന്ന് ഉദ്ധവ് താക്കറെ പ്രഖ്യാപിച്ചു കഴിഞ്ഞു.
https://www.facebook.com/Malayalivartha