ജയലളിത എഴുന്നേറ്റു: ആരോഗ്യം വീണ്ടെടുക്കുന്നുവെന്നു റിപ്പോര്ട്ട്
തമിഴ്നാട് മുഖ്യമന്ത്രി ജയളിതയുടെ ആരോഗ്യത്തില് പുരോഗതിയുണ്ടെന്ന് ആശുപത്രി അധികൃതര്. ജയലളിത ബോധം പൂര്ണമായും വീണ്ടെടുത്തു. കിടക്കയില് നിന്ന് എഴുന്നേറ്റിരിക്കാന് തുടങ്ങിയതായും അധികൃതര് അറിയിച്ചു.
കുറച്ചു ദിവസങ്ങള് കൂടി ചികിത്സ തുടരേണ്ടിവരുമെന്നും കൃത്രിമ ശ്വാസം നല്കുന്നതിനുള്ള ട്യൂബ് മാറ്റിയാല് മാത്രമേ ജയലളിതക്ക് സംസാരിക്കാന് കഴിയൂയെന്നും ഡോക്ടര്മാര് വ്യക്തമാക്കി. ശ്വാസകോശ അണുബാധയെ തുടര്ന്ന് മൂന്നാഴ്ചയിലേറെയായി ചെന്നൈ അപ്പോളോ ആശുപത്രിയില് ചികിത്സയില് കഴിയുകയാണ്.
ജയലളിത ആരോഗ്യം പൂര്ണമായും വീണ്ടെടുത്തെന്നും എത്രയും വേഗം സ്വവസതിയിലേക്ക് മടങ്ങുമെന്നും എ.െഎ.എ.ഡി.എം.കെ വക്താവ് സി.ആര് സരസ്വതി മാധ്യമങ്ങളോടു പറഞ്ഞു. അപ്പോളോ ആശുപത്രിയിലെ ഡോക്ടര്മാരുടെയും വിദേശത്തുനിന്ന് എത്തിയ വിദഗ്ധരുടെയും നേതൃത്വത്തില് ചികിത്സ നടന്നുകൊണ്ടിരിക്കയാണ്. ഡോക്ടര്മാരുടെ നിര്ദേശപ്രകാരമുള്ള വിശ്രമത്തിനു ശേഷം മുഖ്യമന്ത്രി ഉടന് വസതിയിലേക്കും ഔദ്യോഗിക പദവിയിലേക്കും തിരിച്ചെത്തുമെന്നും സി.ആര് സരസ്വതി പറഞ്ഞു.
68 കാരിയായ ജയലളിതയെ അസുഖത്തെ തുടര്ന്ന് സെപ്തംബര് 22 നാണ് അപ്പോളോ ആശുപത്രിയില് പ്രവേശിപ്പിച്ചത്. പനിയും നിര്ജലീകരണവുമാണെന്നായിരുന്നു ആദ്യ റിപ്പോര്ട്ടുകള്. പിന്നീട് ശ്വാസകോശ അണുബാധയാണെന്ന് സ്ഥിരീകരിക്കുകയും ലണ്ടനില് നിന്ന് വിദഗ്ധ ഡോക്ടര്മാരുടെ സംഘം ചെന്നൈയിലെത്തുകയുമായിരുന്നു.
https://www.facebook.com/Malayalivartha