നോട്ട് അസാധുവാക്കല്: തിരിച്ചെത്തിയ പണത്തിന് കണക്കില്ലാതെ റിസര്വ് ബാങ്ക്
നോട്ട് അസാധുവാക്കലിനെ തുടര്ന്ന് എത്ര പണം തിരിച്ചെത്തി എന്ന് കണക്കില്ലാതെ റിസര്വ് ബാങ്ക്. നോട്ട് റദ്ദാക്കലും അതുമായി ബന്ധപ്പെട്ട സംഭവവികാസങ്ങളും സംബന്ധിച്ച അന്വേഷണങ്ങള്ക്ക് മൗനംപാലിച്ച് റിസര്വ് ബാങ്ക്. പാര്ലമെന്റ് സമിതിക്കു മുന്നില് ഹാജരായ ഗവര്ണര് ഉര്ജിത് പട്ടേല്, എത്ര പണം തിരിച്ചെത്തിയെന്നു വെളിപ്പെടുത്തിയില്ല.
കേരളത്തിലെ ബാങ്കുകളിലെത്തിയ അസാധു നോട്ടുകളുടെയും ബാങ്കുകള്ക്കു വിതരണം ചെയ്ത പുതിയ നോട്ടുകളുടെയും കണക്കു സംബന്ധിച്ച വിവരാവകാശ ചോദ്യത്തിനും റിസര്വ് ബാങ്കിന്റെ മറുപടി മൗനം തന്നെ. കോണ്ഗ്രസ് നേതാവ് എം.വീരപ്പ മൊയ്ലിയുടെ അധ്യക്ഷതയിലുള്ള ധനകാര്യ സ്ഥിരംസമിതിയാണ് ഉര്ജിത് പട്ടേലില് നിന്നും ഉന്നതോദ്യോഗസ്ഥരിലും നിന്നും തെളിവെടുത്തത്.
നോട്ട് റദ്ദാക്കലിനു മുന്നോടിയായ ചര്ച്ചകള് കഴിഞ്ഞ വര്ഷമാദ്യം തുടങ്ങിയെന്നു പട്ടേല് അവകാശപ്പെട്ടു. ഉയര്ന്ന മൂല്യമുള്ള നോട്ടുകള് റദ്ദാക്കാന് തീരുമാനിച്ചതാര്, റിസര്വ് ബാങ്കിന്റെ സ്വയംഭരണാധികാരം നഷ്ടമായോ തുടങ്ങിയ ചോദ്യങ്ങളും സമിതിയിലെ പ്രതിപക്ഷാംഗങ്ങള് ഉന്നയിച്ചു. പല ചോദ്യങ്ങള്ക്കും വ്യക്തമായ മറുപടിയുണ്ടായില്ല. ഈ സാഹചര്യത്തില് ഗവര്ണറെയും ഉദ്യോഗസ്ഥരെയും സമിതി വീണ്ടും വിളിച്ചുവരുത്തും. ബിജെപി അംഗങ്ങള് താരതമ്യേന നിശ്ശബ്ദരായിരുന്നു. എത്ര പണം തിരിച്ചെത്തിയെന്നായിരുന്നു ഉത്തരം ലഭിക്കേണ്ട പ്രധാന ചോദ്യം. 97% നോട്ടുകള് തിരിച്ചെത്തിയെന്നു കുറച്ചുനാള് മുന്പു വെളിപ്പെടുത്തിയ ശേഷം ഇക്കാര്യത്തില് റിസര്വ് ബാങ്ക് മൗനത്തിലാണ്.
ഇതേസമയം, കേരളത്തിലെ ബാങ്കുകളിലെത്തിയ അസാധു നോട്ടുകളുടെയും ബാങ്കുകള്ക്കു വിതരണം ചെയ്ത പുതിയ നോട്ടുകളുടെയും കണക്കു പുറത്തുവിടാന് കഴിയില്ലെന്നു റിസര്വ് ബാങ്ക് വ്യക്തമാക്കി.
കണക്കെടുപ്പ് ഏറെ സങ്കീര്ണമായതിനാലാണു കണക്കു കൈമാറാന് കഴിയാത്തതെന്നാണു വിവരാവകാശ നിയമപ്രകാരമുള്ള ചോദ്യത്തിനു റിസര്വ് ബാങ്ക് ഇന്നലെ നല്കിയ മറുപടി. എന്നാല്, കേരളത്തില് നിന്നു ലഭിച്ച പണത്തിന്റെ കൃത്യമായ കണക്കുകള് തങ്ങളുടെ കൈവശമുണ്ടെന്ന് ഉദ്യോഗസ്ഥര് രഹസ്യമായി സമ്മതിക്കുകയും ചെയ്യുന്നു.
നോട്ടു പിന്വലിക്കല് കാലയളവില് ലഭിച്ച അസാധു നോട്ടുകളുടെ മൂല്യം, പോസ്റ്റ് ഓഫിസുകള്ക്കു കിട്ടിയ നിക്ഷേപം, അക്കൗണ്ടില് നിക്ഷേപിക്കാതെ മാറ്റിയെടുത്ത പണം, റിസര്വ് ബാങ്കിനു നേരിട്ടു ലഭിച്ച തുക എന്നിവയുടെ കണക്ക് ആവശ്യപ്പെട്ടായിരുന്നു വിവരാവകാശ അപേക്ഷ.
https://www.facebook.com/Malayalivartha