മദ്യപിക്കാനുള്ള അവകാശം ഭരണഘടന അനുശാസിക്കുന്ന മൗലികാവകാശമല്ലെന്നു ഹൈക്കോടതി. മദ്യ ഉപയോഗം സ്വകാര്യതയ്ക്കുള്ള അവകാശത്തില്‍ പെടുമെന്നു വാദിച്ചാല്‍പോലും അതു ന്യായമായ നിയന്ത്രണങ്ങള്‍ക്കു വിധേയമായിട്ടാണ്.
മദ്യനയത്തിന്റെ ഭാഗമായി വിദേശമദ്യ ഔട്‌ലെറ്റുകള്‍ പടിപടിയായി കുറച്ചുകൊണ്ടുവരാന്‍ മുന്‍സര്‍ക്കാര്‍ തീരുമാനമെടുത്ത സാഹചര്യത്തില്‍ അതു ചോദ്യം ചെയ്തു നല്‍കിയ അപ്പീല്‍ തള്ളിക്കൊണ്ടാണു ഡിവിഷന്‍ ബെഞ്ചിന്റെ ഉത്തരവ്.

പെരുമ്പാവൂര്‍ സ്വദേശിയായ എം.എസ്. അനൂപ്, തന്റെ ഹര്‍ജി തള്ളിയതിനെതിരെയാണ് അപ്പീല്‍ നല്‍കിയത്. റബര്‍ ടാപ്പിങ് ജോലി കഴിഞ്ഞു മദ്യപിക്കുന്ന ശീലമുണ്ടെന്നും സര്‍ക്കാരിന്റെ മദ്യനയം ഫലത്തില്‍ മദ്യനിരോധനമാണെന്നും അപ്പീലില്‍ ബോധിപ്പിച്ചു. മദ്യ ഉപയോഗത്തില്‍ ന്യായമായ നിയന്ത്രണം സാധ്യമാണെന്നും ഭരണഘടനയനുസരിച്ചു സംസ്ഥാനങ്ങള്‍ക്ക് ഇതിന് അധികാരമുണ്ടെന്നും സുപ്രീം കോടതി വ്യക്തമാക്കിയിട്ടുള്ളതു ഡിവിഷന്‍ ബെഞ്ച് ചൂണ്ടിക്കാട്ടി.