വനിതാ ജീവനക്കാര്‍ക്ക് ശമ്പളത്തോടുകൂടിയുള്ള പ്രസവാവധി 12 ആഴ്ചയില്‍ നിന്നു 26 ആഴ്ച(ആറുമാസം)യായി ഉയര്‍ത്തിയ നിയമം രാഷ്ട്രപതി അംഗീകരിച്ചു. മെറ്റേണിറ്റി ബെനിഫിറ്റ് (ഭേദഗതി) ആക്ട് 2017നു രാഷ്ട്രപതി അംഗീകാരം നല്‍കിയതോടെ 55 വര്‍ഷം പഴക്കമുള്ള നിയമത്തിനാണ് പൊളിച്ചെഴുത്ത്.

പുതിയ നിയമപ്രകാരം അമ്പതോ അതിനുമുകളിലോ തൊഴിലാളികളുള്ള സ്ഥാപനങ്ങളില്‍ നിശ്ചിത ദൂരപരിധിക്കുള്ളില്‍ നിര്‍ബന്ധമായും ശിശുപരിപാലന കേന്ദ്രങ്ങള്‍ സ്ഥാപിക്കണം. അമ്മമാര്‍ക്ക് ഈ ശിശുപരിപാലന കേന്ദ്രങ്ങളില്‍ ദിവസം നാലുതവണ സന്ദര്‍ശനാനുമതി സ്ഥാപന ഉടമ ഉറപ്പുവരുത്തണം.

പുതിയ നിയമത്തിലൂടെ ലഭിക്കുന്ന എല്ലാ ആനുകൂല്യങ്ങളെക്കുറിച്ചും വനിതാ ജീവനക്കാരിയെ നിയമിക്കുന്ന ഘട്ടത്തില്‍ സ്ഥാപന ഉടമ എഴുതിയും ഇലക്‌ട്രോണിക് മാര്‍ഗവും അറിയിച്ചിരിക്കണം. പ്രസവാവധി നേടിയശേഷം വനിതാ ജീവനക്കാരിക്കു വീട്ടിലിരുന്നു തൊഴിലെടുക്കാനുള്ള അവസരവും സ്ഥാപന ഉടമയക്ക് ഉഭയകക്ഷി ധാരണപ്രകാരം അനുവദിക്കാം.

മൂന്നുമാസത്തില്‍ താഴെ പ്രായമുള്ള കുട്ടികളെ ദത്തെടുക്കുന്ന സ്ത്രീകള്‍ക്കു പുതിയ നിയമമനുസരിച്ചു 12 ആഴ്ച പ്രസവാവധി ലഭിക്കും. വാടക ഗര്‍ഭപാത്രം ഉപയോഗപ്പെടുത്തുന്ന സംഭവങ്ങളില്‍ കുഞ്ഞിന്റെ ബയോളജിക്കല്‍ അമ്മയ്ക്കും ഇതേ ആനുകൂല്യം ലഭിക്കും. ശമ്പളത്തോടുകൂടിയുള്ള 26 ആഴ്ച പ്രസവാവധി ആദ്യ രണ്ടു പ്രസവങ്ങളിലേ ലഭിക്കുകയുള്ളൂ. അതിനുശേഷം 12 ആഴ്ചയാണു നിയമപ്രകാരമുള്ള പ്രസവാവധി.