ഭവന വായ്പാ സബ്സിഡി: ഭവന വായ്പ ലഭിച്ചവര്ക്ക് പ്രതിമാസം 2000ത്തോളം രൂപ ലാഭിക്കാം
നോട്ട് അസാധുവാക്കലിനു ശേഷമുള്ള ആനുകൂല്യമെന്ന രീതിയില് പ്രധാനമന്ത്രി നരേന്ദ്ര മോദി ഡിസംബര് 31ന് പ്രഖ്യാപിച്ച ഭവന വായ്പാ പലിശ സബ്സിഡി പദ്ധതിയില് അംഗമാകുന്നതിലൂടെ പ്രതിമാസം 2,000 രൂപയോളം ലാഭിക്കാം. വരുമാന പരിധിയിലെ ഇടത്തട്ടുകാര്ക്കായാണ് പ്രധാനമന്ത്രി മോദി സബ്സിഡി പദ്ധതി പ്രഖ്യാപിച്ചത്. ജനുവരി ഒന്നിന് പദ്ധതി പ്രാബല്യത്തില് വന്നു. ഡിസംബര് 31ന് ശേഷം ഭവന വായ്പ ലഭിച്ചവര്ക്കും അപേക്ഷ സമര്പ്പിച്ചവര്ക്കും പദ്ധതിയുടെ ആനുകൂല്യം നേടാം.
പ്രതിവര്ഷം പന്ത്രണ്ട് ലക്ഷം രൂപ വരെ വരുമാനമുള്ളവര്ക്ക് ഒമ്പത് ലക്ഷം രൂപവരെയുള്ള വായ്പയ്ക്ക് നാല് ശതമാനവും 18 ലക്ഷം രൂപവരെ വരുമാനമുള്ളവര്ക്ക് 12 ലക്ഷം രൂപവരെയുള്ള വായ്പയ്ക്ക് മൂന്നു ശതമാനവുമാണ് പലിശ സബ്സിഡി.
പ്രതിവര്ഷം ആറു ലക്ഷം രൂപ മുതല് 18 ലക്ഷം രൂപ വരെ വരുമാനമുള്ളവരെ ലക്ഷ്യമിട്ടാണ് പ്രധാനമന്ത്രി പലിശ സബ്സിഡി പദ്ധതി (ക്രെഡിറ്റ് ലിങ്ക്ഡ് സബ്സിഡി സ്കീം ഫോര് മിഡില് ഇന്കം ഗ്രൂപ്പ്സ്) പ്രഖ്യാപിച്ചത്. പദ്ധതി പ്രയോജനപ്പെടുത്തുന്നതിലൂടെ മൊത്തം പലിശയില് 2.35 ലക്ഷം രൂപവരെ ലാഭിക്കാനാകുമെന്നാണ് വിലയിരുത്തല്. നാല് ശതമാനം പലിശ സബ്സിഡി നേടുന്നതിലൂടെ പ്രതിമാസ തവണയില് (ഇ.എം.ഐ) 2,062 രൂപയും മൂന്നു ശതമാനം സബ്സിഡി നേടുന്നതിലൂടെ 2,019 രൂപയും ലാഭിക്കാം. 2022ഓടെ എല്ലാവര്ക്കും വീട് എന്ന ലക്ഷ്യം നേടാനുള്ള കേന്ദ്ര പദ്ധതിയായ പ്രധാനമന്ത്രി ആവാസ് യോജന'യുടെ ഭാഗമായാണ് സബ്സിഡി ആനുകൂല്യം പ്രഖ്യാപിച്ചത്. 15 ഷെഡ്യൂള്ഡ് ബാങ്കുകള് ഉള്പ്പെടെ 70ഓളം ധനകാര്യ സ്ഥാപനങ്ങള് പദ്ധതിയുമായി സഹകരിക്കുന്നുണ്ട്.
എന്നാല് റീട്ടെയില് നാണയപ്പെരുപ്പം ഫെബ്രുവരിയില് 3.7 ശതമാനമാണെങ്കിലും അടുത്തമാസമാദ്യം നടക്കുന്ന ധനനയ നിര്ണയ യോഗത്തില് റിസര്വ് ബാങ്ക് പലിശ നിരക്കുകള് കുറച്ചേക്കില്ലെന്ന് സാമ്പത്തിക വിദഗ്ദ്ധരുടെ വിലയിരുത്തല്. ഈ മാസത്തോടെ നാണയപ്പെരുപ്പം അഞ്ച് ശതമാനത്തിനു താഴെ നിയന്ത്രിക്കുകയാണ് റിസര്വ് ബാങ്കിന്റെ ലക്ഷ്യം. എന്നാല്, ഈ മാസമിത് 4.5 ശതമാനത്തിലേക്കോ അതിനു മുകളിലേക്കോ ഉയര്ന്നേക്കുമെന്ന വിലയിരുത്തലുകളാണ് പലിശയിളവിന് തടസമാകുന്നത്.
നാണയപ്പെരുപ്പ സൂചികകളിലെ ഭക്ഷ്യവില നിലവാരം കുത്തനെ കൂടുന്നതാണ് റിസര്വ് ബാങ്കിനെ ആശങ്കപ്പെടുത്തുന്നത്. ഫെബ്രുവരിയിലെ ധനനയ നിര്ണയ യോഗത്തിലും പലിശ നിരക്കുകള് റിസര്വ് ബാങ്ക് കുറച്ചിരുന്നില്ല.
https://www.facebook.com/Malayalivartha