പ്രശസ്ത എഴുത്തുകാരി അരുന്ധതി റോയ്‌ക്കെതിരെ വിവാദ ട്വീറ്റുമായി ബിജെപി എംപിയും ബോളിവുഡ് നടനുമായ പരേഷ് റാവല്‍. കശ്മീരില്‍ കല്ലേറു തടയാന്‍ കല്ലേറുകാരന് പകരം അരുന്ധതി റോയിയെ സൈനിക ജീപ്പില്‍ കെട്ടണമെന്നായിരുന്നു റാവലിന്റെ ട്വീറ്റ്. കശ്മീരില്‍ യുവാവിനെ മനുഷ്യ കവചമായി ജീപ്പില്‍ കെട്ടിയിട്ടതിനെ ഓര്‍മിപ്പിച്ചുകൊണ്ടാണ് അദ്ദേഹം ട്വിറ്ററില്‍ അഭിപ്രായപ്പെട്ടത്.

നേരത്തെ കാശ്മീര്‍ വിഷയത്തില്‍ അരുന്ധതി റോയി വ്യത്യസ്തമായ അഭിപ്രായം പ്രകടിപ്പിച്ചിരുന്നു. എന്നാല്‍ ഏതു സാഹചര്യത്തിലാണ് ഈ പ്രതികരണം എന്ന് വ്യക്തമല്ല. റാവലിന്റെ പ്രകോപനപരമായ ട്വീറ്റിനെതിരായി ട്വറ്ററില്‍ വലിയ ഏറ്റമുട്ടലുകളാണ് നടക്കുന്നത്. പ്രശസ്തരും സാധാരണക്കാരുമായ നിവധി പേര്‍ ഇതിനെതിരെ വിമര്‍ശനവുമായി രംഗത്തെത്തിയിട്ടുണ്ട്.
ഒരു പാര്‍ലമെന്റ് അംഗത്തില്‍നിന്ന് ഒരിക്കലും ഉണ്ടാകാന്‍ പാടില്ലാത്ത പെരുമാറ്റമാണ് റാവലിന്റേതെന്ന് നിരവധി പേര്‍ വിമര്‍ശിക്കുന്നു. 

കഴിഞ്ഞ മാസമാണ് സൈന്യം കല്ലേറു തടയുന്നതിനായി പ്രദേശവാസിയായ യുവാവിനെ ജീപ്പിന് മുന്നില്‍ കെട്ടി യാത്ര ചെയ്തത്. മനുഷ്യകവചമായി ഉപയോഗിക്കുകയായിരുന്നുവെന്നാണ് അന്ന് റിപ്പോര്‍ട്ടുകള്‍ വന്നത്.