കല്ക്കരി കുംഭകോണം: മുന് സെക്രട്ടറി എച്ച്.സി ഗുപ്ത ഉള്പ്പടെ മൂന്ന് ഉദ്യോഗസ്ഥര്ക്ക് 2 വര്ഷം തടവുശിക്ഷ
കല്ക്കരി കുംഭകോണക്കേസില് മുന് സെക്രട്ടറി എച്ച്.സി.ഗുപ്തയടക്കം മൂന്ന് ഉദ്യോഗസ്ഥര്ക്കു രണ്ടുവര്ഷം തടവ്. ഡല്ഹി സിബിഐ കോടതിയുടേതാണ് ഉത്തരവ്. മധ്യപ്രദേശില് തെസ്ഗോരബി രുദ്രാപുരി കല്ക്കരിപ്പാടം സ്വകാര്യകമ്പനിക്കു അനുവദിച്ചതുമായി ബന്ധപ്പെട്ട ക്രമക്കേടാണ് കേസിനാധാരം. ഗുപ്ത ഉള്പ്പെടെ മൂന്ന് മുതിര്ന്ന ഉദ്യോഗസ്ഥര് കുറ്റക്കാരാണെന്ന് ഡല്ഹി സിബിഐ കോടതി 19ന് കണ്ടെത്തിയിരുന്നു. പ്രതികള് ഒരുലക്ഷം രൂപ വീതം പിഴയടയ്ക്കണം.
ഗുപ്തയെ കൂടാതെ മുന് കല്ക്കരി വകുപ്പ് ജോയിന്റ് സെക്രട്ടറി കെ.എസ്.ക്രോഫ, മുന് ഡയറക്ടര് കെ.സി.സമരിയ എന്നീ ഉദ്യോഗസ്ഥരാണു തടവുശിക്ഷ അനുഭവിക്കേണ്ടത്. ക്രിമിനല് ഗൂഢാലോചന, അഴിമതി തടയല് എന്നീ വകുപ്പുകളനുസരിച്ചാണ് ഇവര് കുറ്റക്കാരാണെന്ന് കോടതി കണ്ടെത്തിയത്.
മധ്യപ്രദേശിലെ രുദ്രപുരിയില് കമല് സ്പോഞ്ച് ആന്ഡ് സ്റ്റീലിന് (കെഎസ്എസ്പിഎല്) കല്ക്കരിപ്പാടം അനുവദിച്ചതുമായി ബന്ധപ്പെട്ടതാണ് അഴിമതിക്കേസ്. ഉദ്യോഗസ്ഥരെ കൂടാതെ കമല് സ്പോഞ്ച് മാനേജിങ് ഡയറക്ടര് പവന്കുമാര് അലൂവാലിയയും കുറ്റക്കാരാണെന്നു പ്രത്യേക കോടതി വിധിച്ചിരുന്നു. അലൂവാലിയയെ മൂന്നുവര്ഷം തടവിനു വിധിച്ചു. ഇയാള് 30 ലക്ഷം രൂപ പിഴയും ഇദ്ദേഹത്തിന്റെ കമ്പനി ഒരു കോടി രൂപയും പിഴയടയ്ക്കണം. കമല് സ്പോഞ്ചിന്റെ അപേക്ഷ പ്രഥമദൃഷ്ട്യാ തള്ളിക്കളയേണ്ടവിധം അപൂര്ണമായിരുന്നിട്ടും കല്ക്കരിപ്പാടം അനുവദിച്ചത് എല്ലാ വ്യവസ്ഥകളും ലംഘിച്ചാണെന്നു പ്രത്യേക ജഡ്ജി ഭരത് പരാശര് കണ്ടെത്തി.
കഴിഞ്ഞ യുപിഎ സര്ക്കാരിന്റെ കാലത്ത് കല്ക്കരിപ്പാടങ്ങള് അനുവദിച്ചതില് അഴിമതിയുണ്ടെന്ന് ആരോപണം ഉയര്ന്നതിനെ തുടര്ന്നു സുപ്രീംകോടതി ഉത്തരവനുസരിച്ചാണ് സിബിഐ കേസ് ഏറ്റെടുത്തത്. 28 കേസുകള് റജിസ്റ്റര് ചെയ്തതില് മൂന്നെണ്ണം വിധി പറഞ്ഞു. എച്ച്.സി.ഗുപ്ത 11 കേസുകളിലും കൊഫ്ര എട്ടു കേസുകളിലും പ്രതികളാണ്. യുപിഎ സര്ക്കാരിന്റെ കാലത്ത് 2006 മുതല് 2008 വരെ കല്ക്കരി സെക്രട്ടറിയായിരുന്നു ഗുപ്ത. ശരിയായ രീതിയില് ലേലം സംഘടിപ്പിക്കാതെ കല്ക്കരി പാടങ്ങള് അനുവദിച്ചതിലൂടെ സര്ക്കാരിന് കോടികളുടെ നഷ്ടമുണ്ടായതായും കോടതി കണ്ടെത്തി.
https://www.facebook.com/Malayalivartha