കശ്മീരില്‍ യുവാവിനെ മനുഷ്യകവചമാക്കി ജീപ്പിനു മുന്നില്‍ കെട്ടിയിട്ടെന്ന് ആരോപണമുള്ള മേജര്‍ക്ക് സേനാബഹുമതി
കല്ലേറു ചെറുക്കാന്‍ യുവാവിനെ മനുഷ്യകവചമാക്കി ജീപ്പിനു മുന്നില്‍ കെട്ടിയിട്ടെന്ന് ആരോപണമുള്ള മേജര്‍ ലീതുല്‍ ഗോഗോയിക്കു സൈനിക ബഹുമതി. കലാപത്തിനെതിരെ മികച്ച സേവനം നടത്തിയതിനുള്ള ചീഫ് ഓഫ് ആര്‍മി സ്റ്റാഫ് (സിഒഎഎസ്) കമന്റേഷന്‍ കാര്‍ഡ് ബഹുമതിക്കാണ് മേജര്‍ അര്‍ഹനായത്. കരസേനാ മേധാവി ജനറല്‍ ബിപിന്‍ റാവത്താണു പുരസ്‌കാരം സമ്മാനിച്ചതെന്നു ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.
ഈ സൈനിക ഉദ്യോഗസ്ഥനു ക്ലീന്‍ചിറ്റ് നല്‍കിയെന്നും ഇല്ലെന്നും നേരത്തേ വാര്‍ത്തകള്‍ വന്നിരുന്നു. ഉദ്യോഗസ്ഥനു ക്ലീന്‍ ചിറ്റ് നല്‍കിയില്ലെന്ന് സൈന്യം പിന്നീട് വിശദീകരിച്ചു. ആര്‍മി കോര്‍ട്ട് ഓഫ് എന്‍ക്വയറി (സിഒഐ) ആണ് അന്വേഷണം നടത്തിയത്. സൈനിക കോടതിയില്‍ മേജര്‍ ലീതുല്‍ ഗോഗോയ് നല്‍കിയ വിശദീകരണം സ്വീകരിച്ചെന്നായിരുന്നു ആദ്യ റിപ്പോര്‍ട്ട്. പ്രദേശത്തെ സുരക്ഷാ ചുമതലയുണ്ടായിരുന്ന രാഷ്ട്രീയ റൈഫിള്‍സ് മേജറാണ് ഇദ്ദേഹം. തിരഞ്ഞെടുപ്പ് ഉദ്യോഗസ്ഥരുടെയും സൈനികരുടെയും ജീവന്‍ രക്ഷിക്കാനാണ് യുവാവിനെ ജീപ്പിനു മുന്നില്‍ കെട്ടിയിട്ടത് എന്നായിരുന്നു മേജറിന്റെ വിശദീകരണം.
ഇത് കോടതി അംഗീകരിക്കുകയും വലിയ അപകടങ്ങളും പരുക്കും ഉണ്ടാകാതിരിക്കാന്‍ സൈനിക ഉദ്യോഗസ്ഥന്‍ കാണിച്ച മനഃസാന്നിധ്യത്തെ അഭിനന്ദിച്ചെന്നുമായിരുന്നു റിപ്പോര്‍ട്ട്. തിരഞ്ഞെടുപ്പ് നടപടികള്‍ തടസ്സപ്പെടുത്താന്‍ ഒരുവിഭാഗം ശ്രമിച്ചെന്നും ഉദ്യോഗസ്ഥര്‍ക്കെതിരെ ആക്രമണമുണ്ടായപ്പോള്‍ അവരെ രക്ഷപ്പെടുത്താനാണ് നടപടി സ്വീകരിച്ചതെന്നും മേജര്‍ പറഞ്ഞിരുന്നു. എന്നാല്‍ നടപടിക്രമങ്ങള്‍ പൂര്‍ത്തിയായിട്ടില്ലെന്നും ക്ലീന്‍ചിറ്റ് നല്‍കിയെന്ന വാര്‍ത്തകള്‍ ശരിയല്ലെന്നും പ്രതിരോധ വക്താവ് കേണല്‍ രാജേഷ് കാലിയ വ്യക്തമാക്കി. ഊഹാപോഹങ്ങളാണ് പ്രചരിക്കുന്നതെന്നും അദ്ദേഹം പറഞ്ഞു.ഇതിനുശേഷമാണ് മേജറിനു സേനാബഹുമതി നല്‍കിയത്.
ബഡ്ഗാമിലെ ഖാന്‍സാഹിബ് സ്വദേശി ഫാറൂഖ് അഹമ്മദ് ധര്‍ എന്ന യുവാവിനെ സേനാവാഹനത്തിനു മുന്നില്‍ കെട്ടിയിട്ടതിന്റെ വിഡിയോ സമൂഹമാധ്യമങ്ങളില്‍ വൈറലായിരുന്നു. കല്ലെറിയുന്നവരുടെ വിധി ഇങ്ങനെയായിരിക്കുമെന്ന് ഒരു സൈനികന്‍ പറയുന്നതും വിഡിയോയില്‍ കേള്‍ക്കാം. സൈന്യത്തിന്റെ നടപടി വലിയ വിവാദമായതിനെ തുടര്‍ന്ന് പൊലീസ് കേസ് റജിസ്റ്റര്‍ ചെയ്തിരുന്നു.
https://www.facebook.com/Malayalivartha
