റോംഗ് നമ്പര്‍ വഴി ജീവിതത്തിലേക്ക് കയറി വന്ന യുവാവുമായുള്ള യുവതിയുടെ വിവാഹം ചൊവ്വാഴ്ച താനേ കോടതിയില്‍ വെച്ച് നടന്നു. മുംബൈ താനെ സ്വദേശി 26 കാരിയായ ലളിതബെന്‍ ബാന്‍സിയെ ഒരു സ്വകാര്യ സ്ഥാപനത്തില്‍ സി സി ടി വി ഓപ്പറേറ്ററും പെട്രോള്‍ പമ്പ് ഉടമയുമായ രവി ശങ്കറാണ് (27) തന്റെ ജീവിത പങ്കാളിയാക്കിയത്.

മിസ്ഡ് കോളിലൂടെയാണ് രവിശങ്കറിനെ ലളിത പരിചയപ്പെടുന്നത്. പരിചയപ്പെട്ടപ്പോള്‍ തന്നെ ലളിതയെ ഇഷ്ടമായതായി രവിശങ്കര്‍ പറഞ്ഞു. തന്റെ തീരുമാനം അംഗീകരിക്കാന്‍ അമ്മയെ പറഞ്ഞു മനസ്സിലാക്കുക മാത്രമേ ചെയ്യാനുണ്ടായിരുന്നുള്ളൂവെന്നും ലളിതക്കും നല്ലൊരു ജീവിതത്തിനുള്ള അവകാശമുണ്ടെന്നും രവി പറഞ്ഞു. ഇനി റാഞ്ചിയിലോ മുംബൈയിലോ ലളിതയുടെ ഇഷ്ടത്തിനനുസരിച്ച് ജീവിക്കുമെന്നും രവിശങ്കര്‍ പറഞ്ഞു. 

അതേസമയം താന്‍ സ്‌നേഹത്തില്‍ വിശ്വസിക്കാന്‍ തുടങ്ങിയിരിക്കുന്നുവെന്നും ജീവിതത്തില്‍ അത്ഭുതങ്ങള്‍ സംഭവിച്ചിരിക്കുന്നുവെന്നുമാണ് ലളിതയുടെ പ്രതികരണം. 2012 ലാണ് ഒരു ബന്ധുവിനാല്‍ ലളിത ആസിഡ് അക്രമത്തിന് ഇരയായത്. തുടര്‍ന്ന് 17 ഓളം ശസ്ത്രക്രിയകള്‍ നടത്തിയിരുന്നെങ്കിലും ലളിതക്ക് പഴയ മുഖം തിരിച്ചു കിട്ടിയിരുന്നില്ല. നേരത്തെ ഇത്തരക്കാരെ ചികിത്സിച്ചിരുന്ന സാഹാസ് ഫൗണ്ടേഷനില്‍ വെച്ച് നടന്‍ വിവേക് ഒബ്‌റോയ് ലളിതയുടെ ശസ്ത്രക്രിയക്കുള്ള പണം നല്‍കുമെന്ന് ഉറപ്പ് നല്‍കിയിരുന്നു.