മോഡറേഷന് നിലനിറുത്തണമെന്ന് ഹൈക്കോടതി, സി.ബി.എസ്.ഇ പ്ളസ് ടു ഫലം വൈകും
പ്രയാസമേറിയ ചോദ്യങ്ങളുള്ള പരീക്ഷകളില് മോഡറേഷന് മാര്ക്ക് നല്കുന്ന രീതി അവസാനിപ്പിച്ചത് തടഞ്ഞ ഡല്ഹി ഹൈക്കോടതി ഉത്തരവിനെതിരെ സി.ബി.എസ്.ഇ സുപ്രീംകോടതിയെ സമീപിച്ചേക്കും. മോഡറേഷന് വിഷയം കോടതിയില് കുരുങ്ങിയതോടെ പന്ത്രണ്ടാം ക്ളാസ് പരീക്ഷാ ഫലപ്രഖ്യാപനം സി.ബി.എസ്.ഇ നീട്ടി. കഴിഞ്ഞദിവസം ഫലം പ്രഖ്യാപിക്കുമെന്ന് സൂചിപ്പിച്ചിരുന്നെങ്കിലും ഇക്കാര്യത്തില് ഔദ്യോഗിക അറിയിപ്പൊന്നും വന്നിട്ടില്ല.
11 ലക്ഷം വിദ്യാര്ത്ഥികളാണ് സി.ബി.എസ്.ഇ പന്ത്രണ്ടാം ക്ളാസ് പരീക്ഷാ ഫലം കാത്തിരിക്കുന്നത്. മോഡറേഷന് തീരുമാനം നടപ്പാക്കിയ യു.പി അടക്കമുള്ള സംസ്ഥാന ബോര്ഡുകളും ഐ.സി.എസ്.ഇ/ഐ.എസ്.സി പരീക്ഷകള് നടത്തുന്ന സി.ഐ.എസ്.സി.ഇയും ഫലം പുറത്തുവിടുന്നത് നീട്ടാന് തീരുമാനിച്ചതായാണ് സൂചന.
കഴിഞ്ഞവര്ഷം മേയ് 21നാണ് സി.ബി.എസ്.ഇ പന്ത്രണ്ടാം ക്ളാസ് പരീക്ഷാ ഫലം പുറത്തുവിട്ടത്.
ഏപ്രില് 24നാണ് സി.ബി.എസ്.ഇയും 31 സ്കൂള് വിദ്യാഭ്യാസ ബോര്ഡുകളും പത്ത്, പന്ത്രണ്ടാം ക്ളാസ് പരീക്ഷകളിലെ മോഡറേഷന് അവസാനിപ്പിക്കാന് തീരുമാനിച്ചത്. പന്ത്രണ്ടാം ക്ളാസ് പരീക്ഷയുടെ മാര്ക്ക് ഉയരുന്നതിനുള്ള പ്രധാന കാരണം മോഡറേഷന് ആണെന്ന് വിലയിരുത്തിയായിരുന്നു തീരുമാനം.
മോഡറേഷന് ഒഴിവാക്കുന്നതിന്റെ ഭാഗമായി പ്രവേശന പരീക്ഷകളിലെ കട്ട് ഒഫ് മാര്ക്ക് കുറയും. കഠിനമായ ചോദ്യ പേപ്പറുകളില് 15 ശതമാനം അധിക മാര്ക്കാണ് മോഡറേഷന്റെ ഭാഗമായി നല്കുന്നത്. അതേസമയം, വിദ്യാര്ത്ഥികള്ക്ക് ഗ്രേസ് മാര്ക്ക് നല്കുന്ന രീതി തുടരാനും തീരുമാനിച്ചിരുന്നു. പാസാക്കാന് കുറച്ച് മാര്ക്കുകളുടെ കുറവുള്ളപ്പോള് നല്കുന്നതാണ് ഗ്രേസ് മാര്ക്ക്.
ഇതിനെതിരെ വിദ്യാര്ത്ഥികളുടെ മാതാപിതാക്കളാണ് ഡല്ഹി ഹൈക്കോടതിയെ സമീപിച്ചത്. പരീക്ഷ എഴുതുമ്പോള് ഉണ്ടായിരുന്ന മോഡറേഷന് പരീക്ഷ എഴുതിയതിന് ശേഷം പിന്വലിച്ചത് നിയമവിരുദ്ധമാണെന്നായിരുന്നു ഹര്ജിക്കാരുടെ വാദം. ഇത് അംഗീകരിച്ച ഡല്ഹി ഹൈക്കോടതി, ഈ വര്ഷത്തേക്ക് തീരുമാനം നടപ്പാക്കരുതെന്ന് 23നാണ് ഉത്തരവിട്ടത്. വിദേശത്തെ സര്വകലാശാലകളില് അടക്കം പ്രവേശനത്തിന് കാത്ത് നില്ക്കുന്ന വിദ്യാര്ത്ഥികളുടെ ഭാവി അനിശ്ചിതത്വത്തിലാകുമെന്നും കോടതി വിലയിരുത്തി. കേരളം, ആന്ധ്രപ്രദേശ്, തമിഴ്നാട് സംസ്ഥാനങ്ങള് അടുത്ത വര്ഷം മുതല് ഇത് നടപ്പാക്കിയാല് മതിയെന്ന് തീരുമാനിച്ചിട്ടുണ്ടെന്ന വാദവും കോടതി നിരീക്ഷിച്ചിരുന്നു.
അതേസമയം, വിധിക്കെതിരെ അപ്പീല് നല്കാനാണ് കേന്ദ്ര മാനവവിഭവശേഷി മന്ത്രാലയത്തിന് ലഭിച്ചിട്ടുള്ള നിയമോപദേശം. മോഡറേഷന് അവസാനിപ്പിച്ച നയം പിന്തുടര്ന്ന് പഞ്ചാബ് അടക്കമുള്ള ഏഴ് ബോര്ഡുകള് ഫലപ്രഖ്യാപനം നടത്തുകയും ചെയ്തു. എന്നാല്, കോടതി ഉത്തരവില് തൂങ്ങി ഫലപ്രഖ്യാപനം വൈകിപ്പിക്കാന് പാടില്ലെന്ന നിലപാടാണ് മന്ത്രാലയത്തിനുള്ളതെങ്കിലും കോടതിയില് നിന്ന് വ്യക്തത തേടി മുന്നോട്ട് പോകാനാണ് സി.ബി.എസ്.ഇ ആലോചിക്കുന്നത്.
ഫലപ്രഖ്യാപനം വൈകില്ല: കേന്ദ്രമന്ത്രി
സി.ബി.എസ്.ഇ പന്ത്രണ്ടാം ക്ളാസ് പരീക്ഷയുടെ ഫലം വൈകില്ലെന്ന് കേന്ദ്ര മാനവവിഭവശേഷി മന്ത്രി പ്രകാശ് ജാവദേക്കര് പറഞ്ഞു. ഫലം സമയത്ത് തന്നെ പ്രഖ്യാപിക്കും. സി.ബി.എസ്.ഇ ഇക്കാര്യത്തില് ഉടന് പ്രഖ്യാപനം നടത്തും. വിദ്യാര്ത്ഥികള് വിഷമിക്കേണ്ടതില്ല. നീതി നടപ്പാക്കപ്പെടുമെന്നും മന്ത്രി പറഞ്ഞു.
https://www.facebook.com/Malayalivartha