മഹാരാഷ്ട്ര മുഖ്യമന്ത്രിയുടെ ഹെലികോപ്റ്റര്‍ സാങ്കേതിക തകരാറിനെ തുടര്‍ന്ന് ഇടിച്ചിറക്കി
മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ് സഞ്ചരിച്ചിരുന്ന ഹെലികോപ്റ്റര്‍ സാങ്കേതിക തകരാറിനെത്തുടര്‍ന്ന് ലാത്തൂരില്‍ അടിയന്തരമായി ഇടിച്ചിറക്കി. മുഖ്യമന്ത്രി ഉള്‍പ്പെടെ നാല് യാത്രക്കാരും രണ്ടു ജീവനക്കാരുമാണ് ഹെലികോപ്റ്ററില്‍ ഉണ്ടായിരുന്നത്.
സംസ്ഥാന സര്‍ക്കാരിന്റെ ഉടമസ്ഥതയിലുള്ള ആറു വര്‍ഷം പഴക്കമുള്ള സുഖോയ് ഹെലികോപ്റ്ററാണ് അപകടത്തില്‍പ്പെട്ടത്. ഹെലികോപ്റ്റര്‍ പൂര്‍ണമായും തകര്‍ന്നതായി ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ പറഞ്ഞു. ലാത്തൂരില്‍ ബിജെപി മറാത്ത്‌വാഡ റീജണിന്റെ ശിവര്‍ സംവാദ് സഭയില്‍ പങ്കെടുക്കാന്‍ പുറപ്പെട്ടതായിരുന്നു ഫഡ്‌നാവിസും സംഘവും. ലാത്തൂരില്‍ പോകും വഴി ഹെലികോപ്റ്റര്‍ സാങ്കേതിക തകരാറിനെത്തുടര്‍ന്ന് അടിയന്തരമായി ഇടിച്ചിറക്കിയെന്നും എല്ലാവരും സുരക്ഷിതരാണെന്നും ഫഡ്‌നാവിസ് ട്വീറ്റ് ചെയ്തു.
ചോപ്പര്‍ ഇടിച്ചിറക്കിയ നിലങ്കയില്‍നിന്ന് റോഡ് മാര്‍ഗം 40 കിലോമീറ്റര്‍ അകലെയുള്ള ലത്തൂരിലെത്തിയ മുഖ്യമന്ത്രിയും സംഘവും പ്രത്യേക വിമാനത്തില്‍ മുംബൈയിലേക്കു മടങ്ങി. ഇന്നലെ ഉച്ചയ്ക്ക് 12 ഓടെയാണ് സാങ്കേതിക തകരാര്‍ ശ്രദ്ധയില്‍പ്പെട്ടതിനെത്തുടര്‍ന്നാണു പൈലറ്റ് ഹെലികോപ്റ്റര്‍ അടിയന്തരമായി തിരിച്ചിറക്കിയത്.
ഐഎഎസ് ഉദ്യോഗസ്ഥന്‍, മുഖ്യമന്ത്രിയുടെ പേഴ്‌സണല്‍ സെക്രട്ടറി, പേഴ്‌സണല്‍ അസിസ്റ്റന്റ്, മാധ്യമ ഉപദേഷ്ടാവ് എന്നിവരാണ് കോപ്റ്ററില്‍ ഉണ്ടായിരുന്നത്. പിഎയ്ക്കു നിസാര പരിക്കേറ്റതായി മുഖ്യമന്ത്രി ലാത്തൂരില്‍ പറഞ്ഞു.
https://www.facebook.com/Malayalivartha
