രാഷ്ട്രപതി തെരഞ്ഞെടുപ്പില്‍ നടക്കുന്നത് രണ്ട് ദലിതര്‍ തമ്മിലുള്ള പോരാട്ടമല്ലെന്ന് പ്രതിപക്ഷ രാഷ്ട്രപതി സ്ഥാനാര്‍ഥി മീരാ കുമാര്‍. രണ്ട് തത്വശാസ്ത്രങ്ങളാണ് നേര്‍ക്കുനേരുള്ളത്. ഇതിനു മുമ്പുള്ള തെരഞ്ഞെടുപ്പുകളിലും മത്സരരംഗത്ത് ഭരണപക്ഷ-പ്രതിപക്ഷ സ്ഥാനാര്‍ഥികള്‍ ഉണ്ടായിട്ടുണ്ട്. എന്നാല്‍ അന്നൊന്നും സ്ഥാനാര്‍ഥികളുടെ ജാതിയോ മതമോ ചര്‍ച്ചാ വിഷയമായിട്ടില്ല. ഇന്ന് സ്ഥാനാര്‍ഥികളുടെ ജാതിയാണ് പ്രധാനമായും എടുത്തുകാട്ടുന്നതെന്നും മീരാ കുമാര്‍ ചൂണ്ടിക്കാട്ടി. 

മാധ്യമ സ്വാതന്ത്ര്യം, സാമൂഹിക നീതി, ജാതി വ്യവസ്ഥാ ധ്വംസനം തുടങ്ങിയ ആശയങ്ങളാണ് പ്രതിപക്ഷ പാര്‍ട്ടികള്‍ എന്‍.ഡി.എക്കെതിരെ മുന്നോട്ടുവെക്കുന്നത്. രാജ്യത്തിന്റെ പരമോന്നത പദവിയിലേക്ക് സ്ഥാനാര്‍ഥിയായി തന്നെ തെരഞ്ഞെടുത്ത 17 പ്രതിപക്ഷ പാര്‍ട്ടികളോടും നന്ദി രേഖപ്പെടുത്തുന്നുവെന്നും മീരാ കുമാര്‍ പറഞ്ഞു. തെരഞ്ഞെടുപ്പ് പ്രചരണത്തിന്റെ ഭാഗമായി ഗുജറാത്തില്‍ മഹാത്മാഗാന്ധിയുടെ സബര്‍മതി ആശ്രമത്തില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍. 

നാളെയാണ് മീരാ കുമാര്‍ പത്രിക സമര്‍പ്പിക്കുക. ജൂലൈ 17 നാണ് രാഷ്ട്രപതി തെരഞ്ഞെടുപ്പ്. രാംനാഥ് കോവിന്ദാണ് ബി.ജെ.പി സ്ഥാനാര്‍ഥി.