പന്നിപ്പനി വ്യാപകമാകുന്നത് പ്രതിരോധിക്കാന്‍ ഉത്തർപ്രദേശിലെ എല്ലാ സ്കൂളുകളിലും തിങ്കളാഴ്ച മുതൽ രാവിലത്തെ അസംബ്ലികൾ നിർത്തിവയ്ക്കാൻ സർക്കാർ നിർദേശം നൽകി. കുട്ടികളിൽ പന്നിപ്പനിയുടെ ബാധയും പകർച്ചയും തടയുക എന്ന ലക്ഷ്യത്തോടെയാണ് ഈ തീരുമാനമെടുത്തിരിക്കുന്നതെന്ന് ആരോഗ്യ കുടുംബക്ഷേമ വകുപ്പ് പ്രിൻസിപ്പൽ സെക്രട്ടറി പ്രശാന്ത് ദ്വിവേദി പറഞ്ഞു. ജില്ലാ മജിസ്ട്രേറ്റുമാർക്കും കമ്മീഷണർമാക്കും ഇത് സംബന്ധിച്ച് നിർദേശം നൽകി. പനി പടരുന്നത് തടയുക എന്ന ലക്ഷ്യത്തോടെ ജില്ലാതല റാപിഡ് റെസ്പോണ്‍സ് ടീമുകൾക്ക് രൂപം നൽകിയതായും പ്രശാന്ത് ദ്വിവേദി അറിയിച്ചു. ഓഗസ്റ്റ് പതിമൂന്നു വരെയുള്ള കണക്കുകൾ പ്രകാരം 695 പേർക്കാണ് യു.പിയിൽ പന്നിപ്പനി സ്ഥിരീകരിച്ചത്. ഇതിൽ 21 പേർ മരിക്കുകയും ചെയ്തു.