ഡി.എം.കെ അദ്ധ്യക്ഷന്‍ എം.കരുണാനിധി (94)യെ ആശുപത്രിയില്‍ പ്രവേശിപ്പിച്ചു. ആഹാരം കഴിക്കുന്നതിനായി ഘടിപ്പിച്ചിട്ടുള്ള ട്യൂബ് മാറ്റുന്നതിന് വേണ്ടിയാണ് കരുണാനിധിയെ ആല്‍വാര്‍പേട്ടിലെ ആശുപത്രിയില്‍ പ്രവേശിപ്പിച്ചതെന്ന് ആശുപത്രിവൃത്തങ്ങള്‍ വാര്‍ത്താക്കുറിപ്പില്‍ അറിയിച്ചു.

ശ്വാസതടസത്തെ തുടര്‍ന്ന് ഡിസംബറില്‍ കരുണാനിധിയെ ആശുപത്രിയില്‍ പ്രവേശിപ്പിക്കുകയും ട്രക്കിയോറ്റേ ഷാമിക്ക് വിധേയനാക്കുകയും ചെയ്തിരുന്നു. കുടലില്‍ അടിഞ്ഞുകൂടുന്ന ദ്രാവകം നീക്കം ചെയ്യുന്നതിനും ബാക്ടീരിയ മൂലമുണ്ടാകുന്ന അണുബാധ ഇല്ലാതാക്കി ഓക്‌സിജന്‍ ലഭ്യമാക്കുന്നതിനും വേണ്ടിയാണ് ട്രക്കിയോറ്റോമിയുടെ സഹായത്താല്‍ ട്യൂബ് ഇടുന്നത്. ഇത് കൃത്യമായ ഇടവേളകളില്‍ മാറ്റേണ്ടതുണ്ട്. അതിന് വേണ്ടിയാണ് കരുണാനിധിയെ ആശുപത്രിയില്‍ പ്രവേശിപ്പിച്ചതെന്ന് ഡോക്ടര്‍മാര്‍ വ്യക്തമാക്കി. ഇന്ന് വൈകുന്നേരത്തോടെ അദ്ദേഹം ആശുപത്രി വിടുമെന്നും ഡോക്ടര്‍മാര്‍ അറിയിച്ചു.