ഗോരഖ്പൂരില് ഒന്പത് കുട്ടികള് കൂടി മരിച്ചു;ആകെ മരണസംഖ്യ 105 ആയി
ഗൊരഖ്പൂര് ബി.ആര്.ഡി ആശുപത്രിയില് ഓക്സിജന് ഇല്ലാത്തതിനെ തുടര്ന്ന് മരിച്ച കുട്ടികളുടെ എണ്ണം 105 ആയി. വ്യാഴം, വെള്ളി ദിവസങ്ങളിലായി കഴിഞ്ഞ 24 മണിക്കൂറിനിടെ ഒമ്പത് കുട്ടികള് കൂടി മരിച്ചതോടെയാണ് മരണസംഖ്യ നൂറ് കവിഞ്ഞത്. ബി.ആര്.ഡി മെഡിക്കല് കോളേജിലെ ഡോ. പി.കെ. സിങ് മരണം സ്ഥിരീകരിച്ചു. ഈ ഒമ്പത് മരണങ്ങളില് അഞ്ച് പേര് നവജാതശിശു വാര്ഡില് നിന്നും രണ്ട് പേര് മസ്തിഷ്കവീക്കം ചികിത്സിക്കുന്ന വാര്ഡില് നിന്നുമാണ്. ശിശുരോഗചികിത്സാവിഭാഗം വാര്ഡില് ചികിത്സയില് കഴിഞ്ഞിരുന്ന രണ്ടുപേരും മരിച്ചു. നവജാതശിശുക്കള് ഉള്പ്പെടെ ഇവിടെ ചികിത്സയില് കഴിയുന്ന കുട്ടികളില് ഭൂരിഭാഗവും ഗുരുതരാവസ്ഥയിലാണുള്ളതെന്ന് ഡോ. പി.കെ. സിങ് വ്യക്തമാക്കി. മരണങ്ങളെക്കുറിച്ച് ആശുപത്രി അധികൃതര് സര്ക്കാറിലേക്ക് വിവരങ്ങള് അയക്കുന്നുണ്ടെന്നും അദ്ദേഹം പറഞ്ഞു.
അതേസമയം ഗോരഖ്പുരിലെ ആശുപത്രിയിലുണ്ടായ ശിശുമരണങ്ങള് സംബന്ധിച്ച് ആറാഴ്ചക്കകം സത്യവാങ്മൂലം സമര്പ്പിക്കാന് യു.പി സര്ക്കാറിനോടും മെഡിക്കല് വിദ്യാഭ്യാസ ഡയറക്ടര് ജനറലിനോടും അലഹബാദ് ഹൈകോടതി നിര്ദേശിച്ചു. ആക്ടിവിസ്റ്റായ നൂതന് ഠാകുര് നല്കിയ പൊതുതാല്പര്യ ഹരജിയിലാണ് ജസ്റ്റിസുമാരായ വിക്രം നാഥ്, ദയാശങ്കര് തിവാരി എന്നിവരുടെ ഉത്തരവ്. കേസ് വീണ്ടും കോടതിയുടെ ലഖ്നോ ബെഞ്ച് ഒക്ടോബര് ഒമ്പതിന് പരിഗണിക്കും. കുട്ടികളുടെ മരണത്തെ തുടര്ന്ന് ആവശ്യമായ നടപടികള് സര്ക്കാര് കൈക്കൊണ്ടിട്ടുണ്ടെന്ന് സംസ്ഥാന സര്ക്കാറിനുവേണ്ടി അഡ്വക്കറ്റ് ജനറല് രാഘവേന്ദ്ര പ്രതാപ് സിങ് ബോധിപ്പിച്ചു.
എന്നാല്, സര്ക്കാറിന്റെ നടപടികള് കുറ്റവാളികളെ സംരക്ഷിക്കുന്നതാണെന്നും വസ്തുതകളെ തമസ്കരിക്കുന്നതാണെന്നും ഹര്ജി നല്കിയ നൂതന് ഠാകുര് കോടതിയില് പറഞ്ഞു. ആശുപത്രി അധികൃതര്ക്കെതിരെ െഎ.എം.എ അശ്രദ്ധക്കുറ്റം ചുമത്തി.
https://www.facebook.com/Malayalivartha