അണ്ണാ ഡി.എം.കെയില് ചേരിതിരിഞ്ഞു നില്ക്കുന്ന ഒ.പി.എസ് പക്ഷവും ഇ.പി.എസ് പക്ഷവും തമ്മില് ഒന്നിക്കുന്നു
തമിഴ്നാട് രാഷ്ട്രീയത്തില് നിര്ണായകമായ ചുവടുവയ്പ്. അണ്ണാ ഡി.എം.കെയില് ചേരിതിരിഞ്ഞു നില്ക്കുന്ന ഒ.പി.എസ് പക്ഷവും ഇ.പി.എസ് പക്ഷവും തമ്മില് ഒന്നിക്കുന്നു. ഇതു സംബന്ധിച്ച പ്രഖ്യാപനം തിങ്കളാഴ്ച ഉണ്ടാകും. ലയനം സംബന്ധിച്ച ഒത്തുതീര്പ്പ് ചര്ച്ചകള് പ്രകാരം മുന് മുഖ്യമന്ത്രി ഒ.പനീര്ശെല്വം നയിക്കുന്ന ഒ.പി.എസ് പക്ഷത്തിന് ഉപമുഖ്യമന്ത്രി പദവിയും രണ്ട് മന്ത്രിസ്ഥാനങ്ങളും ലഭിക്കും.
കഴിഞ്ഞ ദിവസങ്ങളില് നടന്ന ലയന ചര്ച്ചകള് ഇരുവിഭാഗങ്ങളും കടുംപിടുത്തം തുടര്ന്നത് കാരണം തീരുമാനമാകാതെ അലസിപ്പിരിഞ്ഞിരുന്നു. ഇതോടെ അണ്ണാ ഡി.എം.കെയില് പ്രതിസന്ധി രൂക്ഷമാകുകയും ചെയ്തു. തുടര്ന്ന് പ്രധാന ആവശ്യങ്ങളില് വിട്ടുവീഴ്ച ചെയ്യാന് പനീര്ശെല്വം വിഭാഗം തയ്യാറായതോടെയാണ് അണ്ണാ ഡി.എം.കെയിലെ ലയനം യാഥാര്ത്ഥ്യമാകുന്നത്.
ഇരുവിഭാഗങ്ങളും നടത്തിയ ഒത്തുതീര്പ്പ് ചര്ച്ചകള് പ്രകാരം പനീര്ശെല്വത്തിന് മുഖ്യമന്ത്രി പദവിയോ, പാര്ട്ടിയുടെ ജനറല് സെക്രട്ടറി പദവിയോ ലഭിക്കില്ല. ശശികലയെ പാര്ട്ടിയില് നിന്നും പുറത്താക്കണമെന്ന ഒ.പി.എസ് പക്ഷത്തിന്റെ ആവശ്യവും മുഖ്യമന്ത്രി എടപ്പാടി പളനിസാമി നേതൃത്വം നല്കുന്ന ഇ.പി.എസ് വിഭാഗം നിരസിച്ചു. എന്നാല് ഇക്കാര്യം പിന്നീട് പരിഗണിക്കാമെന്ന് തത്വത്തില് ധാരണയായിട്ടുണ്ടെന്നാണ് സൂചന.
https://www.facebook.com/Malayalivartha