ഉറുദു സംസ്ഥാനത്തെ രണ്ടാമത്തെ ഔദ്യേഗിക ഭാഷയാക്കി അംഗീകരിച്ചു കൊണ്ടുള്ള ബില്‍ തെലങ്കാന നിയമസഭ വ്യാഴാഴ്ച പാസാക്കി. തെലങ്കാന ഔദ്യോഗിക ഭാഷാ ചട്ടത്തിലെ സെക്ഷന്‍ രണ്ട് അനുസരിച്ചാണ് ബില്‍ നിയമസഭ പാസാക്കിയത്. എല്ലാ പാര്‍ട്ടികളും ഇതിനെ അംഗീകരിച്ചു.

തെലങ്കാന സംസ്ഥാനത്തിന്റെ രൂപീകരണത്തിന് ശേഷം ഉറുദു സംസാരിക്കുന്നവരുടെ എണ്ണം സംസ്ഥാനത്തെ മൊത്തം ജനസഖ്യയുടെ 12.69 ശതമാനമായി വര്‍ധിച്ചെന്നാണ് കണക്കുകള്‍. ഇതേ തുടര്‍ന്നാണ് സര്‍ക്കാര്‍ ഉറുദു രണ്ടാമത്തെ ഭാഷയാക്കാനുള്ള തീരുമാനത്തിലേക്ക് എത്തുന്നത്.

ഭാഷക്ക് മാത്രമല്ല അതിന്റെ സംരക്ഷണത്തിനും പ്രചാരണത്തിനും പങ്കു വഹിച്ച തന്റെ പിതാവിനും അര്‍ഹിക്കുന്ന പരിഗണന നല്‍കണമെന്ന് ബില്ലിനെ അംഗീകരിച്ച എം.ഐ.എം നിയമസഭാ കക്ഷി നേതാവ് അക്ബറുദീന്‍ ഉവൈസി പറഞ്ഞു. പ്രധാന പ്രതിപക്ഷമായ കോണ്‍ഗ്രസ് ബില്ലിനെ സ്വാഗതം ചെയ്തു.

അതേസമയം 1966ല്‍ തെലങ്കാനമേഖലയിലെ ഒന്‍പത് ജില്ലകളിലും ഉറുദു രണ്ടാമത്തെ ഔദ്യോഗിക ഭാഷയാക്കിയിരുന്നെന്ന് ബി.ജെ.പി നേതാവ് കൃഷണ റെഡ്ഡി പറഞ്ഞു. ഔദ്യോഗിക ഭാഷയായ തെലുങ്ക് സര്‍ക്കാര്‍ ഉദ്യോഗസ്ഥരുടെ ഇടയില്‍ കാര്യക്ഷമമായി എത്തിയിട്ടില്ലെന്നും കൃഷണ റെഡ്ഡി കുറ്റപ്പെടുത്തി. എന്നാല്‍ ബില്ലില്‍ പുതുതായി ഒന്നുമില്ലെന്നാണ് പ്രതിപക്ഷ പാര്‍ട്ടികള്‍ കുറ്റപ്പെടുത്തുന്നതെന്ന് കോണ്‍ഗ്രസ് നേതാവ് ഹരീഷ് റാവു പറഞ്ഞു.
നേരത്തെ എല്ലാ സര്‍ക്കാര്‍ ഓഫീസുകളിലും ഉറുദു സംസാരിക്കുന്ന ഉദ്യോഗസ്ഥനെ നിയമിക്കുകയും ഉറുദ്ദുവില്‍ ലഭിക്കുന്ന പരാതികള്‍ക്ക് ഉറുദ്ദുവില്‍ തന്നെ മറുപടി നല്‍കുമെന്നും മുഖ്യമന്ത്രി ചന്ദ്രശേഖര റാവു പറഞ്ഞിരുന്നു.