കിടക്കപങ്കിടാന്‍ വിസമ്മതിച്ച ഭാര്യയെ യുവാവ് കൊലപ്പെടുത്തി. ബലാത്സംഗം ചെയ്യാന്‍ ശ്രമിച്ചിട്ടും സഹകരിക്കാതെ ലൈംഗികത നിഷേധിക്കപ്പെട്ടതിലുള്ള അരിശത്തിലാണ് യുവാവ് ഭാര്യയെ ശ്വാസം മുട്ടിച്ചു കൊലപ്പെടുത്തി. ചൊവ്വാഴ്ച രാത്രിയില്‍ നടന്ന സംഭവത്തില്‍ ഹരിയാനയിലെ കുരുക്ഷേത്ര ജില്ലയിലെ ജോഗ്‌നാ ഖേരാ ഗ്രാമത്തിലെ 35 കാരന്‍ സഞ്ജീവ് കുമാറാണ് ഭാര്യ 30 കാരി സുമനെ ശ്വാസം മുട്ടിച്ച് കൊലപ്പെടുത്തിയത്. കുരുക്ഷേത്ര യൂണിവേഴ്‌സിറ്റി പോലീസ് സഞ്ജീവ് കുമാറിനെ അറസ്റ്റ് ചെയ്തു.

വിവാഹം കഴിഞ്ഞ് പത്തുവര്‍ഷമായ ഇവര്‍ക്ക് രണ്ടു മക്കളുണ്ട്. കഴിഞ്ഞ ദിവസം രാത്രിയില്‍ തന്റെ ഇംഗിതം ഭാര്യ അംഗീകരിക്കാതെ വന്നതിനെ തുടര്‍ന്ന് സഞ്ജീവ് കുമാര്‍ സുമനുമായി വഴക്കുണ്ടാക്കിയിരുന്നു. രാത്രിയില്‍ സഞ്ജീവ് സമീപിച്ചപ്പോള്‍ ഭാര്യ ആദ്യം നിഷേധിച്ചു. ഇതേ തുടര്‍ന്ന് സഞ്ജീവ് ബലാത്സംഗത്തിന് മുതിര്‍ന്നപ്പോഴും ഭാര്യ ശക്തമായി പ്രതിരോധിച്ചു നിന്നു. ഇതോടെ കലി കയറിയ സഞ്ജീവ് ഭാര്യയെ ശ്വാസം മുട്ടിക്കുകയായിരുന്നു.

അതേസമയം ഡംഗിപ്പനി ബാധിതനായി അവശനായതിനാലാണ് സുമന്‍ ഭര്‍ത്താവിനോട് സഹകരിക്കാതെ എതിര്‍ത്തതെന്നാണ് പോലീസ് പറയുന്നത്. സഞ്ജീവ് കുമാര്‍ ഉള്‍പ്പെടെ കുടുംബത്തിലെ ആറു പേര്‍ക്കെതിരേയാണ് കേസെടുത്തിരിക്കുന്നത്. ചോദ്യം ചെയ്യലില്‍ തനിക്ക് ശാരീരികമായി വഴങ്ങിത്തരാന്‍ കൂട്ടാക്കാത്തതിനെ തുടര്‍ന്ന് ഭാര്യയെ ശ്വാസം മുട്ടിച്ചു  കൊലപ്പെടുത്തുകയായിരുന്നെന്ന് ഇയാള്‍ പോലീസിനോട് പറഞ്ഞു.