ട്വീറ്റ് വിവാദത്തിൽ തരൂരിന് രക്ഷകയായി മാനുഷി ചില്ലര്‍ ; ലോകസുന്ദരിയോട് നന്ദി പറഞ്ഞ് ശശീ തരൂര്‍
ട്വീറ്റ് വിവാദത്തില്‍ ശശീ തരൂര്‍ എം.പിക്ക് രക്ഷക്കെത്തിയത് ഒടുവില്‍ മാനുഷി ചില്ലര്‍. കേന്ദ്ര സര്‍ക്കാരിനെ വിമര്‍ശിക്കാന്‍ ലോക സുന്ദരി മാനുഷി ചില്ലറിന്‍റെ പേരുപയോഗിച്ചതില്‍ തരൂരിനെതിരെ ട്വിറ്ററില്‍ രൂക്ഷ വിമര്‍ശനമായിരുന്നു. ഹരിയാനയിലെ മുതിര്‍ന്ന മന്ത്രിമാരടക്കം വിവിധ രാഷ്ട്രീയ കക്ഷികള്‍ വിമര്‍ശനവുമായി രംഗത്തെത്തിയിരുന്നു.
എന്നാല്‍ ലോക കിരീടം നേടിയ പെണ്‍കുട്ടിയെന്ന നിലയില്‍ ഇത്തരം കളിയാക്കലുകള്‍ തന്നെ ബാധിക്കില്ലെന്ന് ചില്ലര്‍ തിങ്കളാഴ്ച ട്വിറ്ററില്‍ കുറിച്ചു. ചില്ലാറില്‍ നിന്നും വളരെ ചെറിയൊരു മാറ്റമെ ഉണ്ടായുള്ളു എന്നും അത് നമ്മുക്ക് മറക്കാമെന്നും ചില്ലര്‍ ട്വീറ്റ് ചെയ്തു.താന്‍ പറഞ്ഞത് യഥാര്‍ഥ സ്പിരിറ്റില്‍ തന്നെ എടുത്തതിന് നന്ദി പറഞ്ഞ് തരൂരും ട്വീറ്റ് ചെയ്തു.
അതേസമയം ശശിതരൂര്‍ മാനുഷി ചില്ലാറിനെ അപമാനിക്കാന്‍ ശ്രമിച്ചുവെന്ന് കാണിച്ച്‌ ദേശിയ വനിതാ കമ്മീഷന്‍ തരൂരിന് സമന്‍സ് അയച്ചിരുന്നു. തരൂര്‍ രാജ്യത്തിന് പേരും പ്രശസ്തിയും നേടി കൊടുത്ത പെണ്‍കുട്ടിയെ അപമാനിച്ചതിലൂടെ രാജ്യത്തിനെ തന്നെ അപമാനിച്ചിരിക്കുകയാണെന്ന് വനിതാ കമ്മീഷന്‍ അധ്യക്ഷ രേഖ ശര്‍മ്മ പറഞ്ഞു.
'നോട്ട് അസാധുവാക്കല്‍ എത്രമാത്രം അബദ്ധമായിരുന്നു. ഇന്ത്യന്‍ പണം ലോകം കീഴടക്കുന്നത് ബി.ജെ.പി ഇപ്പോള്‍ തിരിച്ചറിയുന്നുണ്ടാകും. നമ്മുടെ ചില്ലര്‍ പോലും ലോക സുന്ദരിയായി' എന്നായിരുന്നു തരൂരിന്റെ ട്വീറ്റ്. ഹിന്ദിയില്‍ ചില്ലര്‍ എന്നാല്‍ ചില്ലറ എന്നാണര്‍ഥം. ചില്ലറ പോലും ലോകസുന്ദരിയായി എന്ന് തമാശയായി ഉപയോഗിക്കുകയായിരുന്നു തരൂര്‍.
https://www.facebook.com/Malayalivartha
