ഇന്ത്യയില്‍ ഗോവധത്തിന്റെ പേരില്‍ മുസ്ലിംകളെ കൊലപ്പെടുത്തിയ ഗോരക്ഷ പ്രവര്‍ത്തകരുടെ കോടതിച്ചെലവു വഹിക്കുമെന്ന് ബിജെപി എംപി. സുപ്രീംകോടതി വരെ പോയിട്ടാണെങ്കിലും ഗോരക്ഷകരെ നിയമത്തിന്റെ പിടിയില്‍നിന്നു പുറത്തു കൊണ്ടുവരുമെന്നാണു ജാര്‍ഖണ്ഡിലെ ജാര്‍ഖണ്ഡിലെ ഗൊദ്ദയില്‍നിന്നുള്ള എംപിയായ നിഷികാന്ത് ദുബേ പറഞ്ഞത്. ഗൊദ ജില്ലയിലാണു ഗോസംരക്ഷകര്‍ പശുക്കളെ മോഷ്ടിച്ചുവെന്ന് ആരോപിച്ച് രണ്ട് മുസ്ലീം യുവാക്കളെ ആള്‍ക്കൂട്ടം ആക്രമിച്ചത്. ആള്‍ക്കൂട്ട കൊലപാതകത്തിന്റെ പേരില്‍ പ്രതിചേര്‍ക്കപ്പെട്ടവരെ അന്യായമായി വേട്ടയാടുന്നുവെന്ന ആക്ഷേപം ഉന്നയിച്ചാണ് അവര്‍ക്കുവേണ്ടി പ്രവര്‍ത്തിക്കുമെന്ന പ്രഖ്യാപനം ബിജെപി എംപി നടത്തിയത്. ആ ഗ്രാമത്തിലുള്ള എല്ലാവരും ചേര്‍ന്നാണു യുവാക്കളെ മര്‍ദ്ദിച്ചത്. എന്തിനാണ് ഈ നാലു പേരെ മാത്രം പ്രതിയാക്കിയിരിക്കുന്നത് എന്നാണ് ദുബേ ഉന്നയിക്കുന്ന ചോദ്യം. 

നൂറോളം പേരടങ്ങുന്ന സംഘമാണ് ചാര്‍കു അന്‍സാരി (35), മൂര്‍ത്താസാ അന്‍സാരി (30) എന്നിവരെ ജൂണ്‍ 13ന് മര്‍ദിച്ചു കൊലപ്പെടുത്തിയത്. ഇവരില്‍ പശുക്കളെ നഷ്ടപ്പെട്ടുവെന്ന് പറയുന്നവരെയാണ് ഇപ്പോള്‍ കേസില്‍ പ്രതി ചേര്‍ത്തിരിക്കുന്നത്. ഇവര്‍ക്കൊപ്പം കണ്ടാലറിയാവുന്ന 100 പേര്‍ക്കെതിരെയും കേസ് എടുത്തിട്ടുണ്ട്.