അടുത്ത തെരഞ്ഞെടുപ്പില്‍ ശിവസേനയുടെ വിജയം എല്ലാവരും പ്രതീക്ഷിക്കുന്നതിലും അപ്പുറമായിരിക്കുമെന്ന് സാമ്‌ന. ഡല്‍ഹിയില്‍ ആര് സര്‍ക്കാരുണ്ടാക്കുമെന്ന് തങ്ങള്‍ തീരുമാനിക്കുമെന്നും 2014 ല്‍ ഉണ്ടായ രാഷ്ട്രീയ അപകടം 2019 ല്‍ ആവര്‍ത്തിക്കില്ലെന്നും ശിവസേന. 52 ാം വാര്‍ഷിക ആഘോഷത്തിനിടയിലാണ് ശിവസേന നിലപാട് വ്യക്തമാക്കിയത്.

‘2019 ല്‍ ശിവസേന മഹാരാഷ്ട്രയില്‍ സ്വന്തമായി സര്‍ക്കാരുണ്ടാക്കും. കേന്ദ്രം ആരുഭരിക്കണമെന്ന് തീരുമാനിക്കത്ത നിലയിലുള്ള ഭൂരിപക്ഷം അന്ന് ശിവസേനയ്ക്ക് ഉണ്ടാകുമെന്നും സാമ്‌നയില്‍ എഴുതിയ മുഖപ്രസംഗത്തില്‍ പറയുന്നു.

മുഖപ്രസംഗത്തില്‍ പറയുന്നതിങ്ങനെ ;

രാജ്യത്തെ നിലവിലെ സാഹചര്യം മാറിക്കൊണ്ടിരിക്കുകയാണ്. അധികാരം കൈയിലുണ്ടായിരുന്നപ്പോഴും ഞങ്ങള്‍ അഹങ്കാരം ഉള്ളവരായിരുന്നില്ല. അതുപോലെ തന്നെയായിരിക്കും ഭാവിയിലും. രാജ്യം അടിയന്തരാവസ്ഥയ്ക്ക് തൊട്ടുമുന്‍പുള്ള അവസ്ഥയിലൂടെയാണോ കടന്നുപോകുന്നത് എന്ന ചോദ്യം ഇതിനകം ഉയര്‍ന്നുതുടങ്ങിയെന്നും ശിവസേന പറയുന്നു.

ഡല്‍ഹിയില്‍ തെരഞ്ഞെടുക്കപ്പെട്ട സര്‍ക്കാരിന് മേല്‍ ചിലര്‍ പ്രതിബന്ധം സൃഷ്ടിച്ചുകൊണ്ടിരിക്കുകയാണെന്നും ബ്യൂറോക്രാറ്റ് സ്വഭാവം തുടര്‍ന്നാല്‍ അത് സര്‍ക്കാരിന്റെ മുന്നോട്ടുള്ള പോക്കിനും തെരഞ്ഞെടുപ്പിനെ നേരിടുന്നതിനേയും ബാധിക്കുമെന്നും സാമ്‌ന മുഖപ്രസംഗത്തില്‍ പറയുന്നു.

ദല്‍ഹിയില്‍ മാത്രമല്ല ഈ പൊടിക്കാറ്റ് അടിക്കുന്നത്. രാജ്യമൊട്ടാകെയാണ്. മോദി പതിവുപോലെ വിദേശപര്യടനങ്ങളില്‍ മുഴുകിയിരിക്കുന്നു. അദ്ദേഹത്തിന് ഒരിക്കലും ശ്വാസംമുട്ടുന്നുണ്ടാവില്ല.

പക്ഷേ ഇവിടുത്തെ സാധാരണജനങ്ങള്‍ നൂറായിരം പ്രശ്‌നങ്ങള്‍ക്ക് നടുവിലാണ് കഴിയുന്നത്. അടുത്ത തെരഞ്ഞെടുപ്പില്‍ ശിവസേനയുടെ വിജയം എല്ലാവരും പ്രതീക്ഷിക്കുന്നതിലും അപ്പുറമായിരിക്കും. ദല്‍ഹിയില്‍ ആര് സര്‍ക്കാരുണ്ടാക്കുമെന്ന് തങ്ങള്‍ തീരുമാനിക്കും- ശിവസേന പറയുന്നു.