ബോളിവുഡ് താരങ്ങളുടെയോ ക്രിക്കറ്റ് താരങ്ങളുടെയോ അല്ല, പഞ്ചാബില്‍ നിന്നുള്ള ഈ പെണ്‍കുട്ടി ഒരു ഐ പി എസുകാരന്റെ കട്ട ഫാനാണ്. വെറും ആരാധികയല്ല, ആരാധനപുരുഷനെ ഒരുനോക്കു കാണാന്‍ പഞ്ചാബില്‍ നിന്നുള്ള ഈ പെണ്‍കുട്ടി വണ്ടി കയറി ഇങ്ങ് മധ്യപ്രദേശില്‍ എത്തിയിരിക്കുകയാണ്. പഞ്ചാബിലെ ഹോഷിയാര്‍പുര്‍ ജില്ലയില്‍ നിന്നുള്ള 27 വയസുകാരിയാണ് മൂന്നുദിവസം മുമ്പ് ഐ പി എസ് ഓഫീസറായ സച്ചിന്‍ അതുല്‍കറിനെ കാണാന്‍ മധ്യപ്രദേശില്‍ എത്തിയത്. മധ്യപ്രദേശില്‍ എസ് പിയാണ് സച്ചിന്‍ അതുല്‍കര്‍. കാര്യങ്ങള്‍ പറഞ്ഞു മനസിലാക്കി യുവതിയെ മടക്കി അയയ്ക്കാന്‍ ശ്രമിച്ചെങ്കിലും അതൊന്നും ഫലം കണ്ടില്ല.

സച്ചിന്റെ ചിത്രങ്ങള്‍ കണ്ട് ആദ്യം ആരാധനയായി. പിന്നീട് അദ്ദേഹത്തെ ഒരിക്കലെങ്കിലും കാണണമെന്നായി മോഹം. അങ്ങനെ മൂന്ന് ദിവസം മുമ്പാണ് 27കാരിയായ പെണ്‍കുട്ടി പഞ്ചാബില്‍ നിന്നും തന്റെ സങ്കല്‍പ്പ നായകനെത്തേടി ഉജ്ജയിനിയിലെത്തിയത്. തുടര്‍ന്ന് എസ്പിയെ കാണുന്നതിന് ഓഫീസിലും പരിപാടിയില്‍ പങ്കെടുക്കുന്ന സ്ഥലങ്ങളിലും എത്തി. സംഭവമറിഞ്ഞതോടെ പോലീസ് കുട്ടിയെ പിന്‍തിരിപ്പിക്കുന്നതിനുള്ള ശ്രമങ്ങള്‍ തുടങ്ങി. എന്നാല്‍ പെണ്‍കുട്ടി ഒന്നിനും വഴങ്ങാത്തയാളാണെന്ന് വനിതാ പോലീസ് സ്‌റ്റേഷന്റെ ചാര്‍ജുള്ള രേഖ വര്‍മ്മ പറയുന്നു. 

കുട്ടിയുടെ മാതാപിതാക്കളെ വിവരം അറിയിച്ചിട്ടുണ്ടെങ്കിലും തിരികെ വീട്ടിലേക്ക് മടങ്ങാന്‍ കുട്ടി താല്‍പര്യപ്പെടുന്നില്ലത്രേ. സച്ചിനെ കണ്ടശേഷം മാത്രമേ തിരികെ പോകുകയുള്ളുവെന്ന നിലപാടിലാണ് മനശാസ്ത്രത്തില്‍ ബിരുദാനന്ദര ബിരുദ വിദ്യാര്ത്ഥിനിയായ ഇവര്‍. പലതരത്തിലുള്ള കൗണ്‌സിലിങ്ങും നല്‍കിയെങ്കിലും നിരാശയായിരുന്നു ഫലം.

തുടര്‍ന്ന് പോലീസ് പഞ്ചാബിലേക്കുള്ള ട്രെയിന് കയറ്റി വിടുന്നതിനായി നഗ്ഡ സ്‌റ്റേഷനില്‍ എത്തിച്ചുവെങ്കിലും ട്രെയിനില്‍ നിന്നും ചാടി ആത്മഹത്യ ചെയ്യുമെന്ന് ഭീഷണിപ്പെടുത്തി. ഇപ്പോള്‍ കൗണ്‍സിലര്‍ മാരുടെ സഹായത്തോടെ അവര്‍ ചോദിക്കുന്ന ഭക്ഷണം നല്‍കി പരിപാലിക്കുകയാണ്. രണ്ട് ദിവസത്തിനുള്ളില്‍ ഇവരെ കൊണ്ടുപോകുന്നതിനായി മാതാപിതാക്കള്‍ എത്തുമെന്ന് പോലീസ് പറയുന്നു. ഭഗല്‍പൂര്‍ എന്ന ചെറുഗ്രാമത്തില്‍ നിന്നും പഠിച്ചു വന്ന 2007 ഐപിഎസ് ബാച്ചുകാരനായ സച്ചിനു സമൂഹമാധ്യമത്തില്‍ താരങ്ങളെ വെല്ലുന്ന ആരാധക പിന്‍തുണയുണ്ട്. 34കാരനായ സച്ചിന് അവിവാഹിതനാണ്.