ബിജെപിയെ പ്രതിരോധിക്കാനുറച്ച് കോൺഗ്രസ്; ലോക്സഭ തെരഞ്ഞെടുപ്പില് സമാന ചിന്താഗതിക്കാരുമായി സഹകരിക്കും
ഡല്ഹിയില് നടക്കുന്ന 84-മത് പ്ലീനറി സമ്മേളനത്തില് നിർണായക തിരുമാനങ്ങളുമായി കോണ്ഗ്രസ്. വരുന്ന ലോക്സഭ തെരഞ്ഞെടുപ്പില് സമാന ചിന്താഗതിക്കാരുമായി സഹകരിക്കണമെന്ന രാഷ്ട്രീയ പ്രമേയം സമ്മേളനത്തിൽ അവതരിപ്പിച്ചു.
പൊതുമിനിമം പരിപാടിയുടെ അടിസ്ഥാനത്തില് വിവിധ രാഷ്ട്രീയ കക്ഷികളുമായി സഖ്യമുണ്ടാക്കുന്ന നയമാണ് പാര്ട്ടി സ്വീകരിക്കുന്നത്. ബിജെപിയെ തോല്പ്പിക്കുകയെന്നതായിരിക്കണം പ്രതിപക്ഷത്തിന്റെ ലക്ഷ്യമെന്നും രാഷ്ട്രീയപ്രമേയത്തില് വ്യക്തമാക്കുന്നു.
ആർഎസ്എസിനെതിരേയും ബിജെപിക്കെതിരെയും രാഷ്ട്രീയ പ്രമേയത്തിൽ രൂക്ഷവിമർശനങ്ങളാണ് ഉന്നയിച്ചിരിക്കുന്നത്. രാജ്യത്തിന്റെ മതേതര മൂല്യങ്ങൾ തകർക്കാനാണ് ആർഎസ്എസ് ശ്രമിക്കുന്നത്. സ്വാതന്ത്ര്യ സമരത്തിൽ പങ്കെടുക്കാത്ത പ്രസ്ഥാനങ്ങളാണ് ആർഎസ്എസും ബിജെപിയെന്നും പ്രമേയത്തില് പറയുന്നു.
വോട്ടിങ് യന്ത്രങ്ങള് ഒഴിവാക്കി തെരഞ്ഞെടുപ്പ് പേപ്പര് ബാലറ്റ് സംവിധാനത്തിലേക്ക് മടങ്ങണം. ലോക്സഭാ, നിയമസഭാ തെരഞ്ഞെടുപ്പുകള് ഒരുമിച്ച് വേണ്ടെ. കൂറുമാറ്റക്കാരെ ആറു വര്ഷത്തേക്ക് വിലക്കാന് രാജ്യത്ത് നിയമം കൊണ്ടു വരണമെന്നും പ്രമേയം ആവശ്യപ്പെടുന്നു.
അതേസമയം, ബിജെപി മുന്നോട്ടുവയ്ക്കുന്നത് വെറുപ്പിന്റെ രാഷ്ട്രീയമാണെന്നും രാജ്യത്തെ ജനങ്ങളെ ഒന്നായികണ്ട് മുന്നോട്ടുനയിക്കാന് കോണ്ഗ്രസിനുമാത്രമേ കഴിയൂവെന്നും രാഹുല് ഗാന്ധി സമ്മേളനത്തിൽ വ്യക്തമാക്കി. എല്ലാവര്ക്കും അവകാശപ്പെട്ടതാണ് ഈ രാജ്യം. എന്നാല് ബിജെപിക്ക് ഇത് മനസിലാകില്ല. എല്ലാവരെയും ഉള്ക്കൊണ്ടാണ് കോണ്ഗ്രസിന്റെ പ്രവര്ത്തനമെന്നും അദ്ദേഹം പറഞ്ഞു.
https://www.facebook.com/Malayalivartha