വധശിക്ഷയ്ക്ക് വിധിക്കപ്പെട്ട ഇന്ത്യക്കാര്ക്ക് മോചനത്തിന് വഴി തെളിയുന്നു
വധശിക്ഷയ്ക്ക് വിധിക്കപ്പെട്ട പത്ത് ഇന്ത്യക്കാര്ക്ക് മോചനത്തിന് വഴി തെളിയുന്നു. ഒരു പാകിസ്താന് പൗരന് മരിച്ച കേസില് പാക് പൗരന്റെ കുടുംബം കേസില് ശിക്ഷിക്കപ്പെട്ടവര്ക്ക് മാപ്പ് നല്കിയ സാഹചര്യത്തിലാണിത്. നഷ്ടപരിഹാരം (ബ്ലഡ് മണി) കോടതിയില് കെട്ടിവെച്ചു കഴിഞ്ഞു. ഏപ്രില് 12ന് ഇതുസംബന്ധിച്ച തീരുമാനം ഉണ്ടാകും. 2015 ഡിസംബറില് അല്ഐനില് ഉണ്ടായ സംഘര്ഷത്തിനിടയിലാണ് പാക് പൗരന് കൊല്ലപ്പെട്ടത്. ഈ കേസില് പതിനൊന്ന് ഇന്ത്യക്കാരായിരുന്നു പ്രതികള്. ഇവരില് ഒരാള് ഒഴികെയുള്ളവര്ക്ക് വധശിക്ഷ വിധിച്ചു. പഞ്ചാബ് സ്വദേശികളായിരുന്നു എല്ലാവരും. ഇവരുടെ ശിക്ഷ ഒഴിവായി കിട്ടാന് ജീവകാരുണ്യ പ്രവര്ത്തനങ്ങള് നടത്തുന്ന സര്ബത് ദാ ബാല ചാരിറ്റബിള് ട്രസ്റ്റ് കുറെ മാസങ്ങളായി ശ്രമിച്ചു വരികയായിരുന്നു.
കൊല്ലപ്പെട്ട പെഷവാര് സ്വദേശി മൊഹമ്മദ് ഫര്ഹാന്റെ കുടുംബത്തെ സമീപിച്ച് ശിക്ഷിക്കപ്പെട്ട പഞ്ചാബികളുടെ കുടുംബങ്ങളുടെ പ്രയാസങ്ങള് ബോധ്യപ്പെടുത്തിയതിനെത്തുടര്ന്നാണ് മാപ്പ് നല്കാന് അവര് തയ്യാറായതെന്ന് ട്രസ്റ്റ് പ്രസിഡന്റ് എസ്.പി.എസ്. ഒബ്റോയ് പറഞ്ഞു. പാക് കുടുംബം മാപ്പ് നല്കിയ കാര്യം കോടതിയില് സമര്പ്പിച്ചതായും തക്കതായ നഷ്ടപരിഹാരം കെട്ടിവെച്ചതായും ഇന്ത്യന് എംബസി അധികൃതരും സ്ഥിരീകരിച്ചു. ഈ സാഹചര്യത്തില് വധശിക്ഷ ഒഴിവാകുമെന്ന പ്രതീക്ഷയിലാണ് ഇന്ത്യന് എംബസ്സി അധികൃതര്. തന്റെ പ്രതിനിധി പെഷവാറില്ചെന്ന് ബന്ധപ്പെട്ടവരോട് മാപ്പ് നല്കാനായി അപേക്ഷിക്കുകയായിരുന്നെന്ന് എസ്.പി.എസ്. ഒബ്റോയ് വിശദീകരിച്ചു. പത്ത് ഇന്ത്യന് കുടുംബങ്ങളെക്കൂടി കണ്ണീരിലാഴ്ത്താന് താത്പര്യമില്ലെന്ന് കൊല്ലപ്പെട്ട യുവാവിന്റെ പിതാവ് പറഞ്ഞതായും അദ്ദേഹം അറിയിച്ചു.
https://www.facebook.com/Malayalivartha