വിസ അനുവദിക്കാനുള്ള കര്‍ശന വ്യവസ്ഥയില്‍നിന്ന് ഇടയന്മാരെയും കൃഷി തൊഴിലാളികളെയും ഒഴിവാക്കി
സ്വകാര്യ മേഖലയ്ക്ക് ആവശ്യമായ വിദേശ തൊഴിലാളികള്‍ക്ക് വീസ അനുവദിക്കാനുള്ള കര്‍ശന വ്യവസ്ഥയില്‍നിന്ന് ഇടയന്മാരെയും കൃഷി തൊഴിലാളികളെയും ഒഴിവാക്കി. തൊഴിലുടമകള്‍ക്ക് ഇനി കൂടുതല്‍ കാലം കാത്തിരിക്കേണ്ടി വരില്ല. കാലി വളര്‍ത്തലും കൃഷിയും ഉപജീവനമായി സ്വീകരിച്ച സൗദി സ്വദേശികളുടെ പ്രത്യേക സാഹചര്യം കണക്കിലെടുത്താണു തീരുമാനം.
അടുത്ത കാലത്ത് തൊഴില്‍, സാമൂഹിക വികസന മന്ത്രാലയം നടപ്പാക്കിയ വ്യവസ്ഥ അനുസരിച്ച് സ്വകാര്യ മേഖലയില്‍ ലഭ്യമായ മുഴുവന്‍ തൊഴിലവസരങ്ങളെയുംകുറിച്ച് നാഷനല്‍ ലേബര്‍ ഗേറ്റ്‌വേ (താഖാത്ത്) പോര്‍ട്ടലില്‍ പരസ്യപ്പെടുത്തല്‍ നിര്‍ബന്ധമാണ്. സ്വകാര്യ മേഖലയിലെ മുഴുവന്‍ തൊഴിലവസരങ്ങളും സൗദി സ്വദേശികള്‍ക്ക് അവകാശപ്പെട്ടതാണെന്ന കാഴ്ചപ്പാടില്‍ ഊന്നിയാണ് ഈ വ്യവസ്ഥ നടപ്പാക്കിയത്.
നിശ്ചിത കാലം പോര്‍ട്ടലില്‍ പരസ്യപ്പെടുത്തിയിട്ടും ഈ തൊഴിലവസരങ്ങള്‍ സ്വീകരിക്കുന്നതിന് സന്നദ്ധരായി യോഗ്യരായ സൗദി ഉദ്യോഗാര്‍ഥികള്‍ മുന്നോട്ടുവരാത്ത പക്ഷം മാത്രമാണ് വിദേശങ്ങളില്‍നിന്ന് തൊഴിലാളികളെ റിക്രൂട്ട് ചെയ്യുന്നതിന് സ്വകാര്യ സ്ഥാപനങ്ങള്‍ക്ക് വീസ അനുവദിക്കുക. ഇതുമൂലം തൊഴില്‍ വീസകള്‍ ലഭിക്കുന്നതിനും തൊഴിലാളികളെ റിക്രൂട്ട് ചെയ്ത് എത്തിക്കുന്നതിനും സ്വകാര്യ സ്ഥാപനങ്ങള്‍ക്ക് ഏറെ കാത്തിരിക്കേണ്ടിവരികയാണ്.
https://www.facebook.com/Malayalivartha
