പഠനം പൂര്ത്തിയാക്കാനാവാതെ ഗള്ഫ് രാജ്യങ്ങളിലെത്തി ജോലി ചെയ്യുന്ന മലയാളികൾക്ക് അവസരങ്ങളുമായി പത്താം തരം തുല്യതാ കോഴ്സ്
ജീവിതപ്രാരാബ്ധങ്ങളിൽപ്പെട്ട് പഠനം പാകുതിവഴിയിൽ ഉപേക്ഷിക്കപ്പെട്ട് നാടുവിടേണ്ടി വന്നവാരാണ് ഭൂരിഭാഗം സാധാരണ പ്രവാസി മലയാളികളും. എന്നാൽ വിദ്യാഭാസ യോഗ്യത വളരെ കുറവായതുകൊണ്ട് തന്നെ പലപ്പോഴും അവസരങ്ങൾ അവരെ തേടി വരില്ല. എന്നാൽ കേരള സര്ക്കാര് പൊതുവിദ്യാഭ്യാസ വകുപ്പ്, സംസ്ഥാന സാക്ഷരതാ മിഷന് എന്നിവയുടെ ആഭിമുഖ്യത്തില് ഗള്ഫ് മലയാളികള്ക്കായി നടത്തുന്ന പത്താം തരം തുല്യതാ കോഴ്സ് ആറാം ബാച്ച് രജിസ്ട്രേഷന് ദുബായ് കെ.എം.സി.സി.യില് തുടരുന്നു . വിവിധ കാരണങ്ങളാല് പഠനം പൂര്ത്തിയാക്കാനാവാതെ ഗള്ഫ് രാജ്യങ്ങളിലെത്തി ജോലി ചെയ്യുന്നവര്ക്ക് ഇതുവഴി കൂടുതല് ഉയര്ന്ന അവസരങ്ങള് ലഭിക്കും. പത്താം തരം തുല്യതാ പരീക്ഷ 2018 സെപ്റ്റംബറിലാണ് നടക്കുക. പരീക്ഷാ കേന്ദ്രം ദുബായിലായിരിക്കും.
വിദ്യാർത്ഥികൾക്ക് വേണ്ടി ദുബായ് കെ.എം.സി.സി. നടത്തുന്ന സൗജന്യ സമ്പര്ക്ക പഠന ക്ലാസ്സുകള് 2017 ഒക്ടോബറില് അല് ബറാഹ കെ.എം.സി.സി. ഓഡിറ്റോറിയത്തില് ആരംഭിക്കും. വെള്ളിയാഴ്ചകളില് രാവിലെ 8 മണി മുതല് 12 മണിവരെയാണ് ക്ലാസ്സ് നടക്കുക. ഏഴാം തരം പാസ്സാവുകയും പത്താം തരത്തിന് മുന്പ് പഠനം നിര്ത്തുകയും ചെയ്തവര്, 2011 ലോ മുന്പോ എസ്.എസ്.എല്.സി. പരീക്ഷയെഴുതി പരാജയപ്പെട്ടവര്, കേരള സാക്ഷരതാ മിഷന് നടത്തുന്ന ഏഴാം തരം തുല്യതാ പരീക്ഷ പാസ്സായവര് എന്നിവര്ക്കെല്ലാം ഈ കോഴ്സ് തെരഞ്ഞെടുക്കാവുന്നതാണ് . അപേഷകന് 2017 ജൂണ് ഒന്നിന് 17 വയസ്സ് പൂര്ത്തിയായിരിക്കണം എന്ന് മാത്രം.
2017 സപ്തംബര് 30 വരെയാണ് രജിസ്ട്രേഷന് കാലാവധി. രജിസ്ട്രേഷന് ഫോറം പൂരിപ്പിക്കുന്നതിനും ഫീ അടക്കുന്നതിനുമുള്ള സൗകര്യം ദുബായ് കെ.എം.സി.സി. അല് ബാറാഹ ഓഫീസില് ഒരുക്കിയിട്ടുണ്ട്. അപേക്ഷാ ഫോറം www.literacymissionkerala.orgഎന്ന വെബ്സൈറ്റില് നിന്നും ഡൌണ്ലോഡ് ചെയ്യാവുന്നതാണ്. കോഴ്സ് ഫീ 650 ദിര്ഹം രണ്ട് തവണയായി അടച്ചുതീർക്കാം. അപേക്ഷകര് വിസ പേജ് അടക്കമുള്ള പാസ്സ്പോര്ട്ട് കോപ്പി, രണ്ട് പാസ്സ്പോര്ട്ട് സൈസ് ഫോട്ടോകള് എന്നിവയും ഏഴാം തരം പാസ്സായ സര്ട്ടിഫിക്കറ്റ്, ടി.സി., പഠിച്ച സ്കൂളില് നിന്നുള്ള ബോണഫൈഡ് സര്ട്ടിഫിക്കറ്റ് ഇവയില് ഏതെങ്കിലും ഒന്ന് എന്നിവ സമര്പ്പിക്കേണ്ടതാണ്.
https://www.facebook.com/Malayalivartha