ഖത്തര് ദേശീയ സംഗീത മത്സരത്തില് മലയാളി വിദ്യാര്ഥിക്ക് സ്വര്ണമെഡല്
ഖത്തര് ദേശീയ സംഗീത മത്സരത്തില് മലയാളി വിദ്യാര്ഥി മികച്ച ഗായകന്. കോഴിക്കോട് കുറ്റിയാടി സ്വദേശിയും ദോഹ ഐഡിയല് ഇന്ത്യന് സ്കൂള് പത്താം ക്ലാസ് വിദ്യാര്ഥിയുമായ നബീല് അബ്ദുല് സലാം ആണ് വിസ്മയിപ്പിച്ചത്.
ഒക്ടോബര് 15 മുതല് 19 വരെ ഖത്തറിന്റെ സാംസ്കാരിക കേന്ദ്രമായ കതാറ കള്ച്ചറല് വില്ലേജിലാണ് മത്സരമം നടന്നത്. ഖത്തല് നാഷണല് കമ്മീഷന് ഫോര് എഡ്യൂക്കേഷന്, കള്ച്ചര് ആന്ഡ് സയന്സിന്റെ കീഴിലായിരുന്നു പരിപാടി.
സോളോ വോക്കല് അറബിക് സിംഗിങ്, ക്വയര് , പിയാനോ, ഗിറ്റാര്, കീ ബോര്ഡ് തുടങ്ങിയ വിഭാഗങ്ങളില് അമേരിക്ക , ബ്രിട്ടണ്, മലേഷ്യ, സിംഗപ്പൂര്, ഇറ്റലി, സൗത്ത് കൊറിയ, ഇന്തോനേഷ്യ തുടങ്ങിയ രാജ്യങ്ങളിലെ 18 വയസിന് താഴെയുള്ളവരാണ് മത്സരിച്ചത്.
അറബിക് ഗാനാലാപന വിഭാഗത്തില് മൊറോക്കോ, ഫ്രാന്സ്, ബ്രിട്ടണ്, ഡെന്മാര്ക്ക് രാജ്യങ്ങളിലെ അറബ് വംശജരാണ് ഫൈനലിലെത്തിയത്. ഇമ്പമാര്ന്ന പാട്ടുകളാല് ഇവരെ പിന്നിലാക്കിയാണ് നബീല് സ്വര്ണ മെഡല് സ്വന്തമാക്കിയത്.
അവതരണ ചാരുതക്ക് കൊറിയന് എംബസി ഏര്പ്പെടുത്തിയ അരിറാങ് അവാര്ഡ് ഖത്തറിലെ കൊറിയന് അംബാസഡര് ഹ്യൂയോങ് കിയോങ് പാര്ക് നബീലിന് നല്കി. ഖത്തര് മ്യൂസിക് അക്കാദമി അധികൃതര് അടുത്ത മാസം മുതല് അറബ് സംഗീതം ശാസ്ത്രീയമായി പഠിക്കാനുള്ള അവസരവും നബീലിന് വാഗ്ദാനം നല്കിയിട്ടുണ്ട്.
ഖത്തര് ഇക്കണോമിക് സോണ് ഉദ്യോഗസ്ഥനായ ഒഎസ് അബ്ദുല് സലാമിന്റെയും ബല്കീസിന്റെയും 10 മക്കളില് നാലാമത്തെയാളാണ് നബീല്. ബ്രിട്ടീഷ് ഗായകന് സമി യൂസുഫിന്റെ ട്രൂപ്പിലെ അംഗം നാദിര് അബ്ദുല് സലാം സഹോദരനാണ്.
https://www.facebook.com/Malayalivartha