കൊലക്കേസില് വധശിക്ഷ വിധിക്കപ്പെട്ട മലയാളി യുവാവ് കൊല്ലപ്പെട്ടയാളുടെ ബന്ധുക്കളുടെ ദയാവായ്പില് മോചിതനായി
കൊലക്കേസില് വധശിക്ഷ വിധിക്കപ്പെട്ട മലയാളി യുവാവ് കൊല്ലപ്പെട്ടയാളുടെ ബന്ധുക്കളുടെ ദയാവായ്പില് മോചിതനായി നാട്ടിലെത്തി. മലപ്പുറം കൂട്ടിലങ്ങാടി സ്വദേശിയായ അബ്ദുല് ഫതാഹ് വധിക്കപ്പെട്ട കേസില് ആറര വര്ഷമായി ജിദ്ദയിലെ ജയിലിലായിരുന്ന വള്ളിക്കുന്ന് പെരുവള്ളൂര് കൂമണ്ണ സ്വദേശി അബ്ദുല് വഹാബ് കാട്ടീരിയാണ് (27) കഴിഞ്ഞ ദിവസം മോചിതനായി നാട്ടിലേക്ക് തിരിച്ചത്. 2010 ഫല് ജിദ്ദ ഷറഫിയയിലെ താമസമുറിയില് അതിഥിയായെത്തിയ അബ്ദുല് ഫതാഹിനെ മദ്യക്കുപ്പികൊണ്ട് കുത്തിക്കൊലപ്പെടുത്തി എന്നായിരുന്നു കേസ്.
മദ്യലഹരിയിലായിരുന്നു ആക്രമണം. തലക്ക് ഗുരുതരമായി മുറിവേറ്റ് നാല് ദിവസം കഴിഞ്ഞാണ് അബ്ദുല് ഫതാഹ് ചികില്സയിലിരിക്കെ മരിച്ചത്. ഭാര്യയും മൂന്ന് മക്കളുമുള്ള ഫതാഹ് ജിദ്ദയില് സെയില്സ്മാന് ആയിരുന്നു. സംഭവത്തില് അറസ്റ്റിലായ അബ്ദുല് വഹാബിന് ശരീഅത്ത് കോടതി വധശിക്ഷ വിധിച്ചു.
ഒടുവില് അബ്ദുല് ഫതാഹിന്റെ കുടുംബം മാപ്പ് നല്കാന് സന്നദ്ധമായതോടെയാണ് അബ്ദുല് വഹാബിന് വധശിക്ഷയില് നിന്ന് മോചനം സാധ്യമായത്. കുടുംബം മാപ്പ് നല്കിയതിനാല് വധശിക്ഷ അഞ്ച് വര്ഷത്തെ ജയില്വാസമാക്കി ശരീഅത്ത് കോടതി ചുരുക്കി.
കഴിഞ്ഞ മാസമാണ് ഇതു സംബന്ധിച്ച നിയമ നടപടികള് പൂര്ത്തിയായത്. ഇതിനകം ആറര വര്ഷം ജയിലിലായതിനാല് മോചനത്തിന് വേഗം നടപടിയായി. മകന് ജയിലില് നിന്നിറങ്ങിയ ദിവസം ഉമ്മ റഹ്മത്ത് ഉംറ നിര്വഹിക്കാന് മക്കയിലെത്തിയിരുന്നു. സങ്കീര്ണമായിരുന്നു ഈ കേസെന്ന് മാപ്പ് ലഭ്യമാക്കാന് ഇടപെട്ട അല്ഫദ്ല് കമ്പനി ഉടമ അബ്ദുറഹ്മാന് അബ്ദുല്ല യൂസുഫ് പറഞ്ഞു.
അഞ്ചു വര്ഷത്തോളം നീണ്ട പരിശ്രമത്തിനൊടുവിലാണ് വഹാബിന് മോചനം സാധ്യമായതെന്ന് അദ്ദേഹം പറഞ്ഞു. ഹസന് കുട്ടി അയിഷ ദമ്പതികളുടെ മകനാണ് കൊല്ലപ്പെട്ട അബ്ദുല് ഫതാഹ്. ഹസീനയാണ് ഭാര്യ. ഫെമിന, ഫസ്ന വഫ, മുഹമ്മദ് ഇര്ഫാന് എന്നിവര് മക്കളാണ്.കെ.എം.സി.സി വള്ളിക്കുന്ന് മണ്ഡലം കമ്മിറ്റി പ്രവര്ത്തകരായ ശരീഫ് സൂപ്പര് ബസാര്, നസീം കാടപ്പടി, ചെമ്പന് അബ്ദു, പി.സി കരീം, മജീദ് കള്ളിയന് എന്നിവരാണ് കേസില് സഹായം ലഭ്യമാക്കാന് സജീവമായി പ്രവര്ത്തിച്ചിരുന്നത്.
https://www.facebook.com/Malayalivartha