ജനങ്ങൾ സന്തോഷത്തോടെ ജീവിക്കുന്ന അറേബ്യൻ രാജ്യങ്ങളുടെ പട്ടികയിൽ യു.എ.ഇ ഒന്നാമൻ ; ഇന്ത്യയുടെ സ്ഥാനം അയൽ രാജ്യങ്ങൾക്കും താഴെ
ജനങ്ങൾ സന്തോഷത്തോടെ ജീവിക്കുന്ന അറേബ്യൻ രാജ്യങ്ങളുടെ പട്ടികയിൽ യു.എ.ഇ ഒന്നാമൻ. ലോകത്തെ 156 രാജ്യങ്ങളിലെ ജനങ്ങളുടെ അഭിപ്രായം താരതമ്യം ചെയ്ത് ഐക്യരാഷ്ട്ര സഭക്ക് കീഴിലെ പഠന സമിതി തയ്യാറാക്കിയ പട്ടികയിലാണ് ഈ വിവരം കണ്ടെത്തിയത്. അതെ സമയം ജനങ്ങൾ സന്തോഷത്തോടെ ജീവിക്കുന്ന രാജ്യങ്ങളുടെ പട്ടികയിൽ ആഗോളതലത്തിൽ യു.എ.ഇക്ക് 20ാം സ്ഥാനമാണ്. ജനങ്ങളുടെ ആളോഹരി വരുമാനം, സാമൂഹിക പരിചരണം, ശരാശരി ആയുസ്സ്, സാമൂഹിക സ്വാതന്ത്ര്യം, കുറ്റകൃത്യങ്ങളുടെ കുറവ് തുടങ്ങിയ കാര്യങ്ങളുടെ അടിസ്ഥാനത്തിലാണ് പട്ടിക തയ്യാറാക്കിയത്.
അറേബ്യൻ രാജ്യങ്ങളുടെ പട്ടികയിൽ ഖത്തർ, സൗദി, ബഹ്റൈൻ, കുവൈത്ത് രാജ്യങ്ങൾ യഥാക്രമം രണ്ട് മുതൽ അഞ്ച് വരെയുള്ള സ്ഥാനങ്ങളിലെത്തി. കൂടാതെ ആഗോളാടിസ്ഥാനത്തിൽ ഖത്തർ 32, സൗദി 33, ബഹ്റൈൻ 43, കുവൈത്ത് 45 സ്ഥാനങ്ങളിലാണുള്ളത്.
നോർവേയെ പിന്തള്ളി ഫിൻലാൻഡ് ആണ് സന്തോഷകാര്യത്തിൽ ലോക തലത്തിൽ ഒന്നാം സ്ഥാനത്ത്. എന്നാൽ സന്തോഷത്തിന്റെ കാര്യത്തിൽ ഏറ്റവും പിന്നിൽ ആഫ്രിക്കൻ രാജ്യമായ ബുറുണ്ടിയാണ്. കഴിഞ്ഞ വർഷം ഒന്നാം സ്ഥാനത്തുണ്ടായിരുന്ന നോർവേ ഇക്കുറി അഞ്ചാം സ്ഥാനത്തേക്ക് പിന്തള്ളപ്പെട്ടു. ഫിൻലാൻഡിനും നോർവേക്കും പുറമെ ഡെന്മാർക്ക്, ഐസ്ലാൻഡ്, സ്വിറ്റ്സർലാൻഡ്, ഹോളണ്ട്, കാനഡ, ന്യൂസിലാൻഡ്, സ്വീഡൻ, ഓസ്ട്രേലിയ എന്നീ രാജ്യങ്ങളാണ് ആദ്യത്തെ പത്ത് സ്ഥാനങ്ങളിൽ ഇടം പിടിച്ചത്. അതേസമയം ഇന്ത്യയുടെ സ്ഥാനം അയാൾ രാജ്യമായ പാകിസ്താനിലും താഴെയാണ്. പാകിസ്താൻ എഴുപത്തിയഞ്ചാമത്തെ സ്ഥാനത്ത് നിൽകുമ്പോൾ ഇന്ത്യ 133ാം സ്ഥാനത്താണ്. ഇന്ത്യയുടെ അയൽരാജ്യങ്ങളായ ചൈന 86, നേപ്പാൾ 101, ബംഗ്ലാദേശ് 115, ശ്രീലങ്ക 116, മ്യാൻമർ 130, അഫ്ഗാനിസ്താൻ 145 സ്ഥാനങ്ങളിലാണുള്ളത്.
https://www.facebook.com/Malayalivartha