ബ്രസീല്‍ ഫാനായ എന്നെ എന്തു വേണമെങ്കിലും പറഞ്ഞോ...പക്ഷേ തോറ്റെന്ന് കരുതി ബ്രസീലിനെ ഒന്നും പറയാന്‍ പറ്റില്ലെന്ന് വാശിയോടെ പറഞ്ഞ് കരഞ്ഞ ബാലനെ കണ്ടെത്തി; അത് എവിന്‍, ഇനി അവനെ ബിഗ്‌സ്‌ക്രീനില്‍ കാണാം!
ഫുട്‌ബോള്‍ ലോകകപ്പില്‍ തോറ്റ് പുറത്തായ ബ്രസീലിനെ പരിഹസിച്ചവരെ കരഞ്ഞുകൊണ്ട് വിരല്‍തുമ്പില്‍ നിര്‍ത്തിയ ബാലന് സാമൂഹ്യമാധ്യമങ്ങളില്‍ ഏറെ ശ്രദ്ധിക്കപ്പെട്ടിരുന്നു. സംഭവം ഹിറ്റായതോടെ ഈ ബാലന് സിനിമയില്‍ അവസരം വാഗ്ദാനം ചെയ്ത് യുവസംവിധായകന്‍ അനീഷ് ഉപാസന രംഗത്തെത്തിയിരുന്നു.
ഇവനെയൊന്ന് തപ്പിയെടുത്ത് തരാമോ പുതിയ ചിത്രമായ മധുരക്കിനാവിലേക്കാണ് എന്നായിരുന്നു, അവന്റെ രസകരമായ വീഡിയോ പങ്കുവെച്ചതിന് ശേഷം അദ്ദേഹം ഫേസ്ബുക്കില്‍ കുറിച്ചത്. ഇപ്പോഴിതാ സോഷ്യല്‍ മീഡിയായുടെ ഇടപെടലില്‍ ഈ കൊച്ചു മിടുക്കനെ അദ്ദേഹം കണ്ടെത്തി.
എറണാകുളം പുത്തന്‍ വേലിക്കര കുത്തിയ റോഡ് സ്വദേശിയായ ഡേവിസിന്റെയും സിനിയുടെയും മകനായ ഈ കുട്ടി ചിന്തുവെന്ന വിളിപ്പേരിലറിയപ്പെടുന്ന എവിന്‍ ഡേവിസ് ആണ്. പറവൂര്‍ ഇന്‍ഫന്റ് ജീസസ് സ്‌കൂളില്‍ ഒന്നാം ക്ലാസ് വിദ്യാര്‍ഥിയാണ് എവിന്‍. ലോകകപ്പ് മത്സരം ആരംഭിച്ചപ്പോള്‍ മുതല്‍ എവിനും സഹോദരന്‍ നാലാം ക്ലാസ് വിദ്യാര്‍ഥിയായ എഡ്വിനും പിതൃസഹോദര മക്കളായ ജിത്തുവും ജോണുമെല്ലാം എല്ലാ മത്സരവും കാണുമായിരുന്നു.
അര്‍ജന്റീന ആരാധകനായ എഡ്വിനാണ് ബ്രസീലിന്റെ കാര്യം പറഞ്ഞ് എവിനെ പ്രകോപിപ്പിച്ചത്. കളിയാക്കിയവരോട് എവിന്‍ കരഞ്ഞ് കൊണ്ട് ക്ഷോഭിക്കുന്ന ദൃശ്യങ്ങള്‍ പകര്‍ത്തി സോഷ്യല്‍ മീഡിയായില്‍ പങ്കുവെച്ചതും ഈ സഹോദരങ്ങള്‍ തന്നെ.
പിന്നീട് ഈ സംഭവം സോഷ്യല്‍ മീഡിയ ഏറ്റെടുക്കുകയായിരുന്നു. ദൃശ്യങ്ങള്‍ അനീഷ് ഉപാസനയുടെ ശ്രദ്ധയില്‍പെട്ടപ്പോള്‍ എവിന്റെ ജീവിതത്തില്‍ ഇതൊരു വഴിത്തിരിവാകുകയായിരുന്നു. മധുരക്കിനാവില്‍ മികച്ച വേഷം തന്നെ നല്‍കുമെന്ന് അനീഷ് ഉപാസന അറിയിച്ചു.
https://www.facebook.com/Malayalivartha
