നോര്‍ത്ത്ഈസ്‌റ്റേണ്‍ സൗത്ത് ആഫ്രിക്കയിലെ ഗൗടെന്‍ഗ് പ്രവിശ്യയിലെ ജോഹന്നാസ് ബെര്‍ഗിലെ മിഡ്രാന്‍ഡിലുള്ള അനെല്ലെ ഹില്‍സ് എന്ന യുവതിയും ഭര്‍ത്താവ് റോഗെര്‍ ഹില്‍സും നേരിട്ടത് രക്തം ഉറഞ്ഞുപോകുന്ന നിമിഷങ്ങളായിരുന്നു.

കാറില്‍ നിന്നിറങ്ങിയ അനെല്ലെയ്ക്ക് നേരെ തോക്ക് ചൂണ്ടി ഒരാള്‍ എത്തുകയായിരുന്നു. എന്നാല്‍ നിര്‍ണായ സന്ദര്‍ഭത്തില്‍ യുക്തിപൂര്‍വം പ്രവര്‍ത്തിച്ചതോടെ ഇവര്‍ രക്ഷപ്പെടുകയായിരുന്നു. സംഭവത്തിന്റെ വീഡിയോ ഇപ്പോള്‍ വൈറലാണ്.

തങ്ങളുടെ വൈറ്റ് റേഞ്ച് റോവറില്‍ എവിടെയോ പോയി വീട്ടിലേക്ക് തിരിച്ചെത്തിയതായിരുന്നു ദമ്പതികള്‍. പൊടുന്നനെയാണ് ഗോള്‍ഡ് സി ക്ലാസ് മെര്‍സിഡെസ് ബെന്‍സ് അവര്‍ക്ക് പിന്നാലെ കുതിച്ചെത്തി അതില്‍ നിന്നും ഒരു തോക്ക് ധാരി പുറത്തിറങ്ങിയത്.

തോക്കുധാരി വരുമ്പോഴേക്കും യുവതി പുറത്തിറങ്ങിയിരുന്നുവെങ്കിലും അപകടം മണത്തറിഞ്ഞ അവര്‍ പെട്ടെന്ന് കാറിലേക്ക് കയറുകയും ഭര്‍ത്താവ് അതിവേഗതയില്‍ കാര്‍ റിവേഴ്‌സ് എടുക്കുകയുമായിരുന്നു. റോഡിലേക്കായിരുന്നു ഇവര്‍ വണ്ടി റിവേഴ്‌സെടുത്തത്. തങ്ങള്‍ വന്ന കാര്‍ വീണ്ടും എന്തിനാണ് പുറത്തേക്ക് പോകുന്നതെന്നറിയാതെ നോക്കി നില്‍ക്കുന്ന അവരുടെ വളര്‍ത്തുനായയെയും വീഡിയോയില്‍ കാണാം.

ദമ്പതികളുടെ സെക്യൂരിറ്റി ക്യാമറയിലാണ് ഈ ദൃശ്യങ്ങള്‍ പതിഞ്ഞത്. യുവതി തന്റെ സോഷ്യല്‍ മീഡിയ പേജിലാണ് ഈ വീഡിയോ പോസ്റ്റ് ചെയ്തിരിക്കുന്നത്. തന്നെ രക്ഷിച്ച ഭര്‍ത്താവിന്റെ സമയോചിതമായ നടപടിക്ക് അവര്‍ നന്ദി പറയുകയും ചെയ്യുന്നു.

ദൈവത്തിന്റെ സുരക്ഷ അതിശയിപ്പിക്കുന്നതാണെന്നും അവര്‍ കുറിക്കുന്നു. ഈ വീഡിയോ 5000 പേര്‍ ഷെയര്‍ ചെയ്തിട്ടുണ്ട്. ഈ സംഭവം പൊലീസ് അന്വേഷിക്കുന്നുണ്ടോയെന്ന് വ്യക്തമല്ല. ഇവരുടെ കാര്‍ തട്ടിയെടുക്കുകയായിരുന്നു ആക്രമിയുടെ ലക്ഷ്യമെന്നും സൂചനയുണ്ട്.