അഴിഞ്ഞു പോയ ഷൂ ലേസ് റോഡില്‍ ഇരുന്ന് കെട്ടുന്നതിനിടെ പുറകില്‍ കൂടി വന്ന കാര്‍ കുട്ടിയുടെ ശരീരത്തിനു മുകളിലൂടെ കയറി പോകുന്നതിന്റെ പേടിപ്പെടുത്തുന്ന ദൃശ്യങ്ങള്‍ പുറത്ത്.

ചൈനയിലെ യൂക്വിംഗിലാണ് അപകടം നടന്നത്. ഒരു കുട്ടി നിലത്തിരൂന്ന് ഷൂ ലേസ് കെട്ടുന്നതാണ് വീഡിയോയില്‍ ആദ്യം. പെട്ടെന്ന് പുറകില്‍ കൂടി വന്ന കാര്‍ കുട്ടിയെ ഇടിച്ചിട്ടതിനു ശേഷം കുട്ടിയുടെ ശരീരത്തില്‍  കൂടി കയറുകയായിരുന്നു.

ഡ്രൈവര്‍ പെട്ടെന്ന് കാര്‍ പിന്നോട്ടെടുത്തു. അനങ്ങാന്‍ പോലും കഴിയാതെ കുട്ടി കാറിന്റെ അടിയില്‍ കിടക്കുന്നതാണ് ഓടിക്കൂടിയ ആളുകള്‍ കാണുന്നത്. പിന്നീട് എല്ലാവരും ചേര്‍ന്ന് കാര്‍ ഉയര്‍ത്തി കുട്ടിയെ പുറത്തെടുത്തു. ഉടന്‍ തന്നെ അടുത്തുള്ള ആശുപത്രിയില്‍ പ്രവേശിപ്പിക്കുകയും ചെയ്തു. കുട്ടിക്ക് ഗുരുതര പരിക്കുകളൊന്നുമില്ല.

കുട്ടി റോഡിലിരിക്കുന്നത് കാര്‍ ഡ്രൈവര്‍ ശ്രദ്ധിക്കാതിരുന്നതാണ് അപകടത്തിന് കാരണം. സമീപത്തെ സിസിടിവിയിലാണ് അപകടത്തിന്റെ ദൃശ്യങ്ങള്‍ പതിഞ്ഞത്.