ഫാം ജീവനക്കാരനെ മുതല കൊലപ്പെടുത്തിയതില് രോഷാകുലരായ ഗ്രാമീണര് ഫാമില് കയറി 300 മുതലക്കുഞ്ഞുങ്ങളെ കൊന്ന് കൂന കൂട്ടിയിട്ടു!
ഇന്തോനേഷ്യയിലെ ഒരു ഫാമില് അവിടത്തെ മുതല ഒരു ജീവനക്കാരനെ കൊലപ്പെടുത്തിയതില് കലിപൂണ്ട ഒരു കൂട്ടം ഗ്രാമീണര് ചേര്ന്ന് ഫാമിലുണ്ടായിരുന്ന 300 -ലധികം മുതലക്കുഞ്ഞുങ്ങളെ കൊന്നൊടുക്കി. കഴിഞ്ഞ ദിവസം നടന്ന സംഭവത്തില് ഇന്തോനേഷ്യയുടെ കിഴക്കന് പ്രവിശ്യയായ വെസ്റ്റ്പാപുവയിലെ സോറോംഗ് ജില്ലയിലെ ഒരു ഗ്രാമത്തില് കഠാരകളും ചുറ്റികയും ഗദയും ഉപയോഗിച്ച് 292 എണ്ണത്തിനെയാണ് വകവരുത്തിയത്.
അന്റാരാ വാര്ത്ത ഏജന്സി ചത്ത മുതലകളുടെ ശരീരഭാഗങ്ങള് കൂട്ടിയിട്ടിരിക്കുന്നതിന്റെ ദൃശ്യങ്ങള് പകര്ത്തി പുറത്തുവിട്ടു. കഴിഞ്ഞ ദിവസം മുതല ഫാമില് തീറ്റയെടുക്കാന് കയറിയ 48-കാരനെ മുതല ആക്രമിച്ച് കൊലപ്പെടുത്തിയതായി ഇന്തോനേഷ്യ നാച്യൂറല് റിസോഴ്സസ് കണ്സര്വേഷന് ഏജന്സി തലവന് ബാസര് മാനുല്ലാംഗ് പറഞ്ഞിരുന്നു. ശനിയാഴ്ച ഇയാളുടെ സംസ്ക്കാര ചടങ്ങ് കഴിഞ്ഞതിന് പിന്നാലെ രോഷത്തോടെ ഫാമിലേക്ക് കയറിയ ഗ്രാമീണര് ഫാമിലുണ്ടായിരുന്ന മുഴുവന് മുതലകളെയും കൊന്നു.
കത്തികൊണ്ടു കുത്തിയും ചുറ്റികയ്ക്ക് തല്ലിച്ചതച്ചും ദണ്ഡിന് അടിച്ചുമെല്ലാമാണ് മുതലകളെ ഇല്ലാതാക്കിയത്. മുതലയെ വളര്ത്താന് ലൈസന്സുള്ള ഫാമില് 2013 മുതല് ഉപ്പുവെള്ളം കയറ്റിയ പ്രത്യേക കുളത്തില് ന്യൂ ഗിനിയന് മുതലകളെ വളര്ത്തുന്നുണ്ടായിരുന്നു. എന്നാല് ഇതുവരെ ഇവ മനുഷ്യരെ ആക്രമിക്കുകയോ ഗ്രാമീണര്ക്ക് കുഴപ്പമുണ്ടാക്കുകയോ ചെയ്തിരുന്നില്ല.
അതേസമയം മുതലകളും ദൈവ സൃഷ്ടിയായതിനാല് അതും സംരക്ഷിക്കപ്പെടേണ്ടതുണ്ടെന്നാണ് ഇന്തോനേഷ്യന് നാച്യൂറല് റിസോഴ്സസ് കണ്സര്വേഷന് ഏജന്സി തലവന് ബാസര് മനുലാംഗ് പറയുന്നത്. എന്നാല് ഇതുപോലെയുള്ള സംഭവങ്ങള് വീണ്ടും ഉണ്ടാകാതിരിക്കാനുള്ള നടപടികള് സ്വീകരിക്കണം. ലൈസന്സ് നേടിയിരിക്കുന്ന ഫാം ഉടമകള് ചുറ്റുപാടുകള് സുരക്ഷിതമാക്കാന് ആവശ്യമായ എല്ലാ നടപടികളും സ്വീകരിക്കണമെന്നും അദ്ദേഹം പറഞ്ഞു.
https://www.facebook.com/Malayalivartha