എച്ച്ഐവി പോസിറ്റീവ് രക്തത്തില് ചാലിച്ചെടുത്ത ഒരു ഡയാനച്ചിത്രം
അകാലത്തില് മിന്നിപ്പൊലിഞ്ഞ നക്ഷത്രമാണ് ഡയാന രാജകുമാരി. രാജകുമാരിയുടെ സൗന്ദര്യമോ ഗ്ലാമറോ പകര്ത്തപ്പെട്ട അനേക ചിത്രങ്ങള് ലോകത്തിന് പരിചിതമാണ്. എന്നാല് ലോകത്തിനു തന്നെ ഭീഷണിയായ ഒരു രോഗത്തെക്കുറിച്ചുള്ള വ്യാപക തെറ്റിധാരണകള് മാറ്റാനും സാമൂഹികമായ അവബോധം സൃഷ്ടിക്കാനും ഡയാനയുടെ ഒരു പുതിയ ചിത്രം എത്തിയിരിക്കുന്നു.
കോണര് കോളിന്സ് എന്ന ചിത്രകാരനാണ് ഈ ചിത്രത്തിനു പിന്നില്. ചിത്രം വളരെവേഗം സമൂഹ മാധ്യമങ്ങളില് വൈറലായിക്കഴിഞ്ഞു.കോളിന്സിന്റെ ഡയാന ചിത്രം സൃഷ്ടിച്ചിരിക്കുന്നത് രക്തത്താലാണ്. അതും എച്ച്ഐവി പോസിറ്റീവ് രക്തത്താല്. വൈരക്കല്പൊടികളും ഉപയോഗിച്ചിട്ടുണ്ട് ചിത്രം ആകര്ഷകമാക്കാന്. ഇത് വ്യാപക ചര്ച്ചയ്ക്കും തുടക്കമിട്ടിരിക്കുന്നു.
എച്ച്ഐവി പോസിറ്റീവ് രക്തം ഉപയോഗിച്ചു ചിത്രം വരച്ചതു പെട്ടെന്നൊരു തോന്നലിലൊന്നുമല്ല. ചിത്രം വൈറലായതോടെ എന്തുകൊണ്ട് താന് ഇങ്ങനെയൊരു അപൂര്വ പ്രയത്നം ഏറ്റെടുത്തു എന്ന വിശദീകരണവുമയി രംഗത്തുവന്നിട്ടുണ്ട് കോളിന്സ്. പുതിയ ചിത്രം സംസാരവിഷയമായതിനിടെ ബിബിസി ഒരു പുതിയ വാര്ത്തയും പുറത്തുവിട്ടു.
1987- ല് ഡയാന എച്ച്ഐവി പോസിറ്റീവ് സ്ഥിരീകരിച്ച ഒരു രോഗിയുടെ കൈ പിടിച്ചു കുലുക്കി സൗഹൃദം പങ്കുവച്ചിരുന്നു. എച്ച്ഐവി ബാധിച്ച രോഗികളെക്കുറിച്ചു സമൂഹം പുലര്ത്തുന്ന അബദ്ധ ധാരണകള് ഒഴിവാക്കാന്വേണ്ടിയായിരുന്നു രാജകുമാരി രോഗിയുമായി സൗഹൃദം പങ്കുവച്ചത്. ഈ വാര്ത്തയുടെ പശ്ചാത്തലത്തില്വേണം കോളിന്സിന്റെ ചിത്രം കാണാനും ആസ്വദിക്കാനും.
മാരക രോഗമെന്ന പേരിലും വേഗം പകരുമെന്ന ധാരണകളിലും ലോകമെങ്ങും കഷ്ടത അനുഭവിക്കുന്ന ആയിരക്കണക്കിന് എച്ച്ഐവി രോഗികളുണ്ട്. രോഗത്തെക്കുറിച്ചു വ്യക്തമായ ബോധമില്ലായ്മയും അബദ്ധധാരണകളും രോഗികളുടെ ജീവിതം കഷ്ടപ്പാടു നിറഞ്ഞതാക്കിയിരിക്കുന്നു. ഈ പ്രശ്നത്തിലേക്കു ലോകത്തിന്റെ ശ്രദ്ധ ക്ഷണിക്കാനാണ് കോളിന്സ് എച്ച്ഐവി രക്തം ഉപയോഗിച്ച് ഡയാനയുടെ ചിത്രം വരച്ചത്.
ചിത്രം കാണുന്നവരും സമൂഹമാധ്യമങ്ങളില് പങ്കുവയ്ക്കുന്നവരും ചിത്രത്തിന്റെ പിന്നിലുള്ള സന്ദേശം കൂടി മനസ്സിലാക്കണമെന്ന് അഭ്യര്ഥിക്കുന്നു കോളിന്സ്. എച്ച്ഐവിയെക്കുറിച്ചുള്ള തെറ്റായ ധാരണകള് സമൂഹമനസ്സില്നിന്ന് ഇല്ലാതാക്കുകയാണ് എന്റെ ലക്ഷ്യം കോളിന്സ് വ്യക്തമാക്കുന്നു. എച്ച്ഐവി രോഗത്തെക്കുറിച്ച് ലോകം മനസ്സിലാക്കുന്നതും രോഗഭീഷണിയെക്കുറിച്ച് അറിയുന്നതും 1980- കളുടെ തുടക്കത്തിലാണ്. അന്നുമുതല് ഈ രോഗത്തിന്റെ ഇരകളായി ആയിരങ്ങള് ദുരിതം അനുഭവിക്കുന്നു. ഒറ്റപ്പെടുത്തപ്പെടുന്നു. രോഗം മരണവാറന്റ് എന്ന ധാരണ പോലും നിലനില്ക്കുന്നുണ്ട്.
https://www.facebook.com/Malayalivartha