വീണ്ടും മനുഷ്യത്വത്തിന്റെ സ്നേഹസ്പര്ശവുമായി കെഎസ്ആര്ടിസി ജീവനക്കാര്
അര്ദ്ധരാത്രിയില് പെരുവഴിയിലിറങ്ങിയ വീട്ടമ്മയ്ക്ക് കെ എസ്സ് ആര് ടി സി ജീവനക്കാര് കൂട്ടു നിന്നു. ഇരിങ്ങാലക്കുട സ്വദേശിയായ വീട്ടമ്മയ്ക്കാണ് ഇത്തവണ കെഎസ്ആര് ടിസി ജീവനക്കാര് ഭര്ത്താവ് എത്തുന്നത് വരെ കൂട്ടിരുന്നത്.
റെജി തോമസ് എന്ന വീട്ടമ്മ ഇരിങ്ങാലക്കുടയിലേക്ക് എത്തിയത് തിരുവനന്തപുരത്ത് നിന്നും മൈസൂരിലേക്ക് പോകുന്ന സ്കാനിയ ബസിലാണ്. കുടുംബശ്രീ ജില്ലാ മിഷനിലെ പ്രോഗ്രാം മാനേജറാണ് റെജി തോമസ്.
ബസ് ചാലക്കുടി പനമ്പള്ളി കോളജ് സ്റ്റോപ്പിലെത്തിയപ്പോള് ഞായറാഴ്ച പുലര്ച്ചെ ഒന്നേമുക്കാല് മണിയായിരുന്നു.സ്കാനിയ ബസിന് അവിടെ സ്റ്റോപ്പ് ഇല്ലായിരുന്നു. റെജി ആവശ്യപ്പെട്ടപ്രകാരം ബസ് അവിടെ നിര്ത്തുകയായിരുന്നു.
എന്നാല് ആ സമയം റെജിയെ കൂട്ടികൊണ്ടുപോകാന് ഭര്ത്താവ് എത്തിയിട്ടില്ലായിരുന്നു. പത്ത് മിനിട്ടിനകം ഭര്ത്താവ് എത്തുമെന്നും നിങ്ങള് പോയ്ക്കൊള്ളാനും വീട്ടമ്മ ബസ് ജീവനക്കാരോട് പറഞ്ഞു. എന്നാല് ബസിലെ ഡ്രൈവറും കണ്ടക്ടറുമായ പ്രകാശും ഹനീഷും ഇതിന് വിസമ്മതിച്ചു.
വിജനമായ ബസ് സ്റ്റോപ്പില് ഇവരെ തനിച്ച് നിര്ത്തി പോകുന്നത് ഉചിതമല്ലെന്നായിരുന്നു ഇവരുടെ തീരുമാനം. ഇവരുടെ ഭര്ത്താവ് എത്തുന്നത് വരെ ബസ് നിര്ത്തിയിട്ട് അവര് കാത്തിരുന്നു. കാര്യം അറിഞ്ഞ സഹയാത്രികരും ബസ് ജീവനക്കാര്ക്ക് പിന്തുണയുമായെത്തി.
തുടര്ന്ന് 10 മിനിട്ടുകള്ക്ക് ശേഷം ഭര്ത്താവെത്തി വീട്ടമ്മയെ അയാളോടൊപ്പം കയറ്റിവിട്ട ശേഷമാണ് ബസും യാത്രികരും മടങ്ങിയത്. സംഭവത്തെക്കുറിച്ച് റെജി തോമസ് തന്നെയാണ് ഫേസ് ബുക്കില് പോസ്റ്റിട്ടത്.
അടുത്തിടെ വിജനമായ സ്റ്റോപ്പില് രാത്രിയില് ഇറങ്ങിയ ഒരു യുവതിയെ കൂട്ടിക്കൊണ്ടു പോകാന് സഹോദരന് എത്താതിരുന്നപ്പോഴും ബസുമായി കെ എസ്സ് ആര് ടി സി ജീവനക്കാര് കാത്തുനിന്നിരുന്നു. ഇപ്പോഴും നന്മ വറ്റിയിട്ടില്ലാത്ത ഹൃദയങ്ങള് നമുക്ക് ചുറ്റും ഉണ്ടെന്ന് അറിയുന്നത് വല്ലാത്ത ആശ്വാസം തന്നെ, അല്ലേ?
https://www.facebook.com/Malayalivartha