മൂന്ന് പെണ്‍പുലികളുടെ സാന്നിദ്ധ്യത്തോടെയാണ് തൃശൂരിലെ പുലികളി ഇത്തവണ ശ്രദ്ധിക്കപ്പെട്ടത്. ജാതിമതവര്‍ണലിംഗ വിവേചനങ്ങള്‍ ഇല്ലാത്തതും എന്നാല്‍ പുരുഷന്മാര്‍ മാത്രം അണിനിരക്കുന്നതുമായ ഒരു ആഘോഷമാണെന്നായിരുന്നു ഇതുവരെ പുലിക്കളി. പുരുഷന്മാരുടെ സ്വകാര്യ അഹങ്കാരനായിരുന്ന പുലികളിയില്‍ അവരെ ഞെട്ടിച്ച് കൊണ്ട് ഒരു പെണ്‍പുലി രംഗത്ത വന്നു. ബിഎസ്എന്‍എല്‍ ജീവനക്കാരിയും മനുഷ്യാവകാശപ്രവര്‍ത്തകയുമായ രഹ്‌നാ ഫാത്തിമാ
ഏറെ നാളത്തെ ആഗ്രഹമായിരുന്നു പുലികളിക്ക് ചായമിടണമെന്നത്. വിയ്യൂര്‍ ദേശത്തിനൊപ്പം ഇറങ്ങണമെന്നായിരുന്നു തീരുമാനിച്ചിരുന്നതെങ്കിലും അവസാനം അതു സാധിക്കാതെ വന്നതോടെയാണ് അയ്യന്തോളിന്റെ പുലികള്‍ക്കിടയില്‍ സ്ഥാനം പിടിച്ചത്.
സ്ത്രീശരീരത്തിന്റെ രാഷ്ട്രീയമാണ് രഹ്നയ്ക്കും കൂട്ടര്‍ക്കും പറയാനുള്ളത്. ചിലര്‍ വരുമ്പോള്‍ ചരിത്രം വഴിമാറുമെന്ന പരസ്യവാചകം പോലെയാണ് ഇപ്പോള്‍ തൃശൂരിറങ്ങിയ പെണ്‍പുലിക്കുട്ടികളുടെ കാര്യം.
പുരുഷന്‍ കൈയടക്കി വച്ചിരുന്ന ഇടങ്ങള്‍ കൈയേറാന്‍ സ്ത്രീകള്‍ക്കിനി അധികം സമയം വേണ്ടെന്നാണ് കൂട്ടുകാര്‍ സ്‌നേഹപൂര്‍വം പാത്തൂ എന്ന് വിളിക്കുന്ന രഹ്നയുടെ പക്ഷം. പുലികളി ആണുങ്ങളുടെ അഹങ്കാരമായി മാറുമെന്ന് തോന്നിത്തുടങ്ങിയപ്പോഴാണ് രഹ്നയുള്‍പ്പടെയുള്ളവര്‍ ചായം തേച്ച് നിരത്തിലിറങ്ങിയത്. 60 വര്‍ഷമായി പുലിക്കൂട്ടത്തിനൊപ്പം നിറഞ്ഞു നിന്ന ചാത്തുണ്ണിയാശാനാണ് രഹ്നയെ പുലികളിയുടെ ബാലപാഠങ്ങള്‍ കാണിച്ചുകൊടുത്തത്. 
മൂന്ന് മണിക്കൂര്‍ നേരത്തെ പരിശീനത്തിനുശേഷം ഒന്നരമണിക്കൂറോളം നീണ്ട ചായമിടീല്‍. മൂന്നുമണിയോടുകൂടി കുടവയറന്‍പുലികള്‍ക്കൊപ്പം റോഡില്‍. പുലികളി തുടങ്ങിയതിന് ശേഷമാണ് തങ്ങള്‍ക്കൊപ്പം ഒരു പെണ്‍പുലിയുണ്ടെന്ന് കൂടെയുള്ളവര്‍ തിരിച്ചറിയുന്നതു പോലും.
ഒന്നര വര്‍ഷമായി രഹ്ന ഫാത്തിമയെന്ന ഈ കലൂര്‍ സ്വദേശി മോഡലിംഗ് രംഗത്തുണ്ട്. ശരീരപ്രദര്‍ശനത്തിനോ പ്രശ്‌സതിക്കോ ഉള്ള ഉപാധിയല്ല, മനുഷ്യാവകാശപ്രവര്‍ത്തനങ്ങളിലും സാമൂഹ്യവിഷയങ്ങളിലും ഇടപെടാനുള്ള മാധ്യമമാണ് രഹ്നയ്ക്ക് മോഡലിംഗ്. നാലിലും ഒന്നിലും പഠിക്കുന്ന മക്കളും എല്ലാത്തിനും കൂട്ടായി നില്‍ക്കുന്ന ഭര്‍ത്താവ് മനോജ്.കെ. ശ്രീധറുമാണ് രഹ്നയുടെ ഏറ്റവും വലിയ ധൈര്യം. പൊതു ഇടങ്ങള്‍ പെണ്ണുങ്ങളുടേത് കൂടിയാണ്. വരും വര്‍ഷങ്ങളില്‍ ഭിന്നലിംഗക്കാര്‍ ഉള്‍പ്പടെയുള്ള കൂടുതല്‍ പുലികളിറങ്ങുമെന്ന് തന്നെയാണ് രഹ്ന ഫാത്തിമ പറയുന്നത്.