സൂക്ഷിച്ചാല്‍ ദു:ഖിക്കേണ്ട, ഇതാ എടിഎം സുരക്ഷ ഉറപ്പുവരുത്താനുള്ള ചില മുന്‍കരുതലുകള്‍
എടിഎം ഉപയോഗിച്ച് തട്ടിപ്പു നടത്തുന്നത് ഇപ്പോള്‍ ഒരു തുടര്‍ക്കഥയായവുകയാണ്. ഇന്നലെ പുറത്തു വന്ന റിപ്പോര്‍ട്ട് അനുസരിച്ച് രാജ്യത്തെ 32 ലക്ഷം എടിഎം കാര്‍ഡുകള്‍ തട്ടിപ്പ് ഭീഷണിയിലാണ്.
സാധാരണക്കാര്‍ മുതല്‍ വന്‍കിട ബിസിനസുകാര്‍ വരെ ഇത്തരം തട്ടിപ്പുകള്‍ക്ക് ബലിയാടാവുന്നു. എടിഎം ഉപഭോക്താക്കളുടെ എണ്ണം കൂടുതലായതുക്കൊണ്ടു തന്നെ തട്ടിപ്പിന്റെ ഭീകരതയും വളരെ വലുതാണ്. പലപ്പോഴും നമ്മുടെ ചെറിയൊരു അശ്രദ്ധ കാരണമാണ് നമുക്ക് ലക്ഷങ്ങള്‍ നഷ്ടമാകേണ്ടി വരുന്നത്.
എന്നാല്‍ അല്‍പ്പമൊന്ന് ശ്രദ്ധിച്ചാല്‍ തട്ടിപ്പുകാരുടെ പിടിയില്‍ പെടാതെ നമുക്ക് രക്ഷപ്പെടാവുന്നതെയുള്ളു.
ഇതാ അതിനായി ചില വഴികള്‍. എടിഎം ഉപയോഗിക്കുമ്പോള്‍ തീര്‍ച്ചയായും ഇത്തരം കാര്യങ്ങള്‍ ശ്രദ്ധിക്കുക.
1. പരമാവധി ഉപഭോക്താവിന്റെ ബാങ്കിന്റെ എടിഎം കൗണ്ടറുകള്‍ മാത്രം ഉപയോഗിക്കുക ഒപ്പം പിന്‍കോഡ് രഹസ്യമാക്കി വയ്ക്കുക
ഒറ്റപ്പെട്ട സ്ഥലത്തുള്ള, സിസി ടിവി ക്യാമറയില്ലാത്ത എടിഎം കൗണ്ടറുകള്‍ വളരെ അപകടകരമാണ്. ഇത്തരം കൗണ്ടറുകളില്‍ നിന്നും പണംപിന്‍വലിക്കുന്നത് പരമാവധി ഒഴിവാക്കുക. അതുപോലെ തന്നെ ഏതെങ്കിലും ബാങ്കുകളുടെ കൗണ്ടറുകള്‍ മാത്രം ഉപയോഗിക്കുക. രഹസ്യ പിന്‍ കോഡുകള്‍ എന്റര്‍ ചെയ്യുന്ന സമയത്ത് കൈകള്‍ ഉപയോഗിച്ച് പിന്‍ കോഡ് മറച്ച് വെക്കാനും ശ്രദ്ധിക്കുക.
2.മെസേജ് അലര്‍ട്ട് സംവിധാനം ഉറപ്പുവരുത്തുക
ബാങ്ക് ഇടപാടുകള്‍ക്ക് എസ്എംഎസ് അലര്‍ട്ട് ഉറപ്പ് വരുത്തുക. അക്കൗണ്ടില്‍ ഏതെങ്കിലും തരത്തിലുള്ള ഇടപാടുകളോ മറ്റോ ഉണ്ടായാല്‍ നിങ്ങളുടെ ഫോണിലേക്ക് എസ്എംഎസ് അലര്‍ട്ടുകള്‍ വരുന്നുണ്ടെന്ന് ഉറപ്പ് വരുത്തണം. ഇതിലൂടെ അക്കൗണ്ടില്‍ ഏതെങ്കിലും തരത്തിലുള്ള ക്രയവിക്രയം ഉണ്ടായാല്‍ ഉടനെ തന്നെ അറിയാന്‍ കഴിയും.
3. സങ്കീര്‍ണമായ പാസ്‌വേര്‍ഡുകള്‍ ഉപയോഗിക്കുക
പെട്ടെന്ന് തിരിച്ചറിയാന്‍ കഴിയുന്ന തരത്തിലുള്ള ലളിതമായ പാസ് വേര്‍ഡുകള്‍ വയ്ക്കാതിരിക്കുക. പകരം സങ്കീര്‍ണ്ണവും നീളം കൂടിയതുമായവ ഉപയോഗിക്കുക. അതുപോലെ തന്നെ ഇടയ്ക്കിടെ പാസ് വേര്‍ഡ് മാറ്റാനും ശ്രദ്ധിക്കുക.
4. കഴിവതും ഓണ്‍ലൈന്‍ ഷോപ്പിങ്ങുകള്‍ നിയന്ത്രിക്കുക
ഇന്ന് ഏറ്റവും കൂടുതല്‍ ആളുകള്‍ ഷോപ്പിംഗ് നടത്തുന്നത് ഓണ്‍ലൈനിലാണ്. എന്നാല്‍ തട്ടിപ്പുകള്‍ കൂടുതലും അരങ്ങേറുന്നതും ഓണ്‍ലൈന്‍ ഷോപ്പിങ്ങിലൂടെയാണ്. സൈറ്റുകള്‍ക്ക് അക്കൗണ്ട് വിശദാംശങ്ങള്‍ നല്‍കുന്നതിലൂടെ ഹാക്ക് ചെയ്യുന്നവര്‍ക്ക് അനായാസം നിങ്ങളുടെ പാസ്‌വേര്‍ഡുകള്‍ കണ്ടെത്താന്‍ കഴിയും. അതുകൊണ്ട് ഓണ്‍ലൈന്‍ ഷോപ്പിംഗുകള്‍ പരമാവധി ഒഴിവാക്കുക. പകരം ക്യാഷ് ഓണ്‍ ഡെലിവറി രീതി സ്വീകരിക്കുക.
5. എടിഎം പിന്‍കോഡ് ആരുമായും പങ്ക് വെക്കാതിരിക്കുക
രഹസ്യ പിന്‍കോഡുകള്‍ ഒരുകാരണ വശാലും ആരുമായും പങ്ക് വയ്ക്കാതിരിക്കാന്‍ പ്രത്യേകം ശ്രദ്ധിക്കുക. അക്കൗണ്ട് വിവരങ്ങള്‍ ഇടയ്ക്കിടെ സ്വയം പരിശോധിച്ച് ഉറപ്പ് വരുത്താനും ശ്രദ്ധിക്കണം. ബാങ്കില്‍ നിന്നും ലഭിക്കുന്ന നിര്‍ദ്ദേശങ്ങള്‍ പാലിക്കണം.
ഒരു പക്ഷെ നിങ്ങള്‍ക്ക് ചെറുതാണെന്ന് തോന്നുന്ന ഇത്തരം കാര്യങ്ങളായിരിക്കും തട്ടിപ്പി വീരന്മാര്‍ മുതലാക്കുന്നത്. അതുക്കൊണ്ട് സൂക്ഷിച്ചാല്‍ ദുഖിക്കേണ്ടി വരില്ല.
https://www.facebook.com/Malayalivartha
