ജെല്ലിക്കെട്ടിലെ കാണാത്ത കെട്ട്... കലാപമുണ്ടാക്കി പനീര് ശെല്വത്തെ പുകച്ച് ചാടിക്കാന് ശ്രമം; മുഖ്യമന്ത്രിയായി സാക്ഷാല് ശശികല തന്നെ എത്തും; അണിയറ കഥകള് ഇങ്ങനെ
ജെല്ലിക്കെട്ട് പ്രക്ഷോപം ഒരു വികാരമാകുമ്പോള് പുറത്താകുന്നത് തമിഴ്നാട് മുഖ്യമന്ത്രി പനീര് ശെല്വമായിരിക്കും. നിരോധനത്തെ തുടര്ന്ന് കഴിഞ്ഞ രണ്ടു വര്ഷവും തമിഴ്നാട്ടില് ജെല്ലിക്കെട്ട് ഇല്ലായിരുന്നു. പക്ഷെ അന്നൊന്നുമില്ലാത്ത പ്രക്ഷോപവും അക്രമവുമാണ് ഇപ്പോള് ഉണ്ടായത്.
വീണ്ടും ജെല്ലിക്കെട്ട് നടക്കണമെന്ന് വാദം വന്നപ്പോള് അതിനെ പിന്താങ്ങി നടപ്പാക്കിയത് മുഖ്യമന്ത്രി കൂടിയായ പനീര് ശെല്വമാണ്. പനീര് ശെല്വം ഡല്ഹിയില് പോയി കേന്ദ്ര നേതാക്കളെ കണ്ട് ജെല്ലിക്കെട്ടിന്റെ ആവശ്യകത വിവരിച്ചു. തമിഴ് മക്കളുടെ പാരമ്പര്യം നിലനിര്ത്തണമെന്നാണ് ആവശ്യപ്പെട്ടത്. തമിഴ് നാട്ടില് ഒരു കൂട്ടിന് വേണ്ടി കാത്തിരിക്കുന്ന നരേന്ദ്ര മോഡി ശെല്വത്തിന്റെ നിലപാടിനെ അംഗീകരിച്ചു. അങ്ങനെ ജെല്ലിക്കെട്ടിനെപ്പറ്റി സുപ്രീം കോടതി ഉടന് വിധി പറയരുതെന്ന് കേന്ദ്ര സര്ക്കാര് അഭ്യര്ത്ഥിച്ചു. തുടര്ന്ന് ഓര്ഡിനന്സ് രാഷ്ടപതി അംഗീകരിക്കുകയും ചെയ്തു.
എല്ലാം കഴിഞ്ഞ് വിജയശ്രീലാളിതനായി മധുരയിലെത്തിയ പനീര് ശെല്വത്തെ കാത്തിരുന്നത് തികഞ്ഞ രാഷ്ട്രീയ പരാജയമായിരുന്നു. ജെല്ലിക്കെട്ട് ഉദ്ഘാടനം ചെയ്ത് ലോക ശ്രദ്ധ നേടാമെന്നുള്ള മോഹം ചില നേതാക്കള് ഇടപെട്ട് ഇല്ലാതാക്കി.
ജനങ്ങള് തന്നെ ശെല്വത്തെ ആട്ടിയോടിച്ചു. ആകെ നാണം കെട്ട് ചെന്നൈയിലെത്തിയ പനീര് ശെല്വത്തെ കാത്തിരുന്നത് അശാന്തിയായിരുന്നു. ജെല്ലിക്കെട്ടില് 3 പേര് മരണമടഞ്ഞതോടെ പനീര് ശെല്വത്തിന്റെ കണക്കുകൂട്ടല് കൈവിട്ടുപോയി.
തമിഴ്നാട്ടിലെ സാധാരണക്കാരെ എന്നും സ്വാധീനിച്ച സിനിമാ താരങ്ങള് വരെ സമരത്തില് പങ്കാളികളായി. നാട്ടിലെല്ലാം ജെല്ലിക്കെട്ടിന്റെ പേരില് കലാപമാണ്. ചരിത്ര വിജയമായ ജെല്ലിക്കെട്ട് വിജയം അവസാനം കൈവിട്ടുപോയി. തമിഴ്നാട്ടില് സ്കൂളുകളും കോളേജുകളും അവധിയിലാണ്. ജനങ്ങള്ക്ക് പുറത്തിറങ്ങാന് പോലും കഴിയുന്നില്ല. പല ട്രെയിനുകളും വഴി തിരിച്ചു വിടുന്നു.
ഇങ്ങനെ തമിഴ്നാട് കത്തുമ്പോള് ചിരിക്കുന്ന ഒരാളുണ്ട്. ജയലളിതയുടെ വിശ്വസ്തയായ തോഴിയും എ.ഡി.എം.എം.കെ. ജനറല് സെക്രട്ടറിയുമായ ശശികല. ഇനി ശശികലയുടെ നാളുകളാണ്. കലാപം കൊഴുത്ത് ജനങ്ങളില് നിന്ന് ശെല്വം ഒറ്റപ്പെടുമ്പോള് ശശികല മുഖ്യമന്ത്രിയായി അവതരിക്കും. അതിനുള്ള പടയൊരുക്കങ്ങളാണ് തമിഴ്നാട്ടില് ഇപ്പോള് നടക്കുന്നത്.
പോലീസും ശെല്വത്തെ കൈവിട്ടു കഴിഞ്ഞു. പോലീസുകാരും കലാപത്തിന് സഹായം നല്കുന്ന വാര്ത്തകള് പുറത്തുവന്നു. ജെല്ലിക്കെട്ട് സമരത്തിനിടെ പൊലീസുകാരന് വാഹനം കത്തിക്കുന്ന വിഡിയോയാണ് പുറത്തായത്. പ്രതിഷേധം നിയന്ത്രിക്കാനെത്തിയ പൊലീസുകാരിലൊരാള് ഓട്ടോറിക്ഷ കത്തിക്കുന്ന ദൃശ്യമാണ് പ്രദേശിക ചാനല് പുറത്ത് വിട്ടത്.
ഒരാഴ്ചയായി തുടരുന്ന പ്രക്ഷോഭം ഇപ്പോള് തന്നെ കൈവിട്ട അവസ്ഥയിലാണ്. പനീര് ശെല്വത്തിന് ഇനി കാഴ്ചക്കാരന്റെ റോളാകും. എല്ലാം ചിന്നമ്മ തന്നെ ഏറ്റെടുക്കും.
https://www.facebook.com/Malayalivartha