ആരു വിളിച്ചാലും പോകുന്ന നിനക്കെന്താടീ ഞങ്ങളോടൊപ്പം വന്നാല്... അവന് ഒറ്റയ്ക്ക് ആണായി പൊരുതിയെങ്കിലും അവസാനം വീണുപോയതിങ്ങനെ
സ്വന്തം സഹോദരിയെപ്പോലെ കരുതിയിരുന്ന യുവതിയ്ക്കൊപ്പം തന്നെയും ചേര്ത്തു സദാചാര ഗുണ്ടകള് സോഷ്യല് മീഡിയയില് പ്രചരിപ്പിച്ച വീഡിയോ അനീഷിനെ തകര്ത്തു കളഞ്ഞു. വാട്സാപ്പിലൂടെയും ഫേസ്ബുക്കിലൂടെയും പ്രചരിക്കപ്പെട്ട വീഡിയോ വൈറലായി കഴിഞ്ഞിരുന്നു. കൊല്ലത്തെ സംഭവത്തില്നിന്നു അല്പം ആശ്വാസം തേടി സ്വദേശമായ പാലക്കാട് അഗളിയിലെത്തിയെങ്കിലും അനീഷിനു മനസമാധാനം ലഭിച്ചിരുന്നില്ല. അങ്ങനെ അവന് ലോകത്തോട് വിട പറഞ്ഞു.
കരുനാഗപ്പള്ളിയിലെ ഒരു പ്രമുഖ ആയുര്വ്വേദ ആശുപത്രിയില് ജോലി ചെയ്യുകയായിരുന്നു അനീഷ്. ഇതേ സ്ഥാപനത്തില് ജോലി ചെയ്തിരുന്ന പെണ്കുട്ടിയ്ക്കൊപ്പമാണ് കരുനാഗപ്പള്ളി ബീച്ചില് ഒരു പറ്റം സദാചാരവാദികളുടെ ആക്രമണത്തിന് ഇരയായത്. വാലന്റൈന്സ് ദിനത്തില് പെണ്കുട്ടിക്കൊപ്പം ബീച്ചു കാണാന് പോയപ്പോഴായിരുന്നു സംഭവം. ഇവരെ ആക്രമിക്കുകയും അധിക്ഷേപിക്കുകയും ചെയ്തവര് സംഭവത്തിന്റെ വീഡിയോ ഇന്റര്നെറ്റില് പ്രചരിപ്പിക്കുകയായിരുന്നു.
സദാചാരക്കാരില് ഒരാള് പെണ്കുട്ടിയോട് നീ ആരു വിളിച്ചാലും കൂടെ പോകുമോ എന്ന് ചോദിച്ച് മുഖത്തടിക്കുന്നതു വീഡിയോയില് കാണാമായിരുന്നു. ബീച്ച് കാണാന് എത്തിയതിന് ശേഷം പെണ്കുട്ടിക്ക് പ്രാഥമിക കൃത്യം നിര്വ്വഹിക്കണമെന്ന് അനീഷിനോട് ആവശ്യപ്പെട്ടു. നിരവധി സഞ്ചാരികളെത്തുന്ന ബീച്ചില് യാതൊരു അടിസ്ഥാന സൗകര്യങ്ങളോ ശൗചാലയങ്ങളോ ഇല്ലാത്തതിനാല് ബീച്ചിന് പിന്ഭാഗത്ത് കായലിനോട് ചേര്ന്ന കുറ്റിക്കാട്ടിലേക്ക് പെണ്കുട്ടിയുമായി പോവുകയായിരുന്നു. അനീഷ് മാറി നില്ക്കുകയും പെണ്കുട്ടി പ്രാഥമിക കൃത്യം നിര്വ്വഹിക്കാന് കുറ്റിക്കാട്ടിലേക്ക് കയറുകയും ചെയ്തു.
ഈ സമയം സമീപത്ത് മദ്യപിച്ചു കൊണ്ടിരുന്ന രണ്ട് പേര് പെണ്കുട്ടി കുറ്റിക്കാട്ടിലേക്ക് കയറുന്നത് കണ്ട് പിറകെ ചെല്ലുകയും പെണ്കുട്ടിയെ കടന്നു പിടിക്കുകയുമായിരുന്നു. പെണ്കുട്ടിയുടെ ഉച്ചത്തിലുള്ള നിലവിളി കേട്ട് അനീഷ് ഓടിയെത്തിയപ്പോള് രണ്ട് പേര് ആക്രമിക്കുന്നതാണ് കണ്ടത്. അനീഷ് ചെറുത്തു നില്ക്കാന് ശ്രമിച്ചെങ്കിലും സദാചാരക്കാര് ഫോണ് മുഖേന മറ്റു മൂന്ന് പേരെ കൂടി വിളിച്ചു വരുത്തി. ഇവരെത്തിയതോടെയാണ് തങ്ങളെ ദേഹോപദ്രവം ഏല്പ്പിച്ചതും ദൃശ്യങ്ങള് മൊബൈലില് പകര്ത്തിയതും. കരഞ്ഞ് കാലു പിടിച്ചു പറഞ്ഞിട്ടും അവര് ഞങ്ങള് അനാശാസ്യ പ്രവര്ത്തനങ്ങള്ക്ക് വന്നവരാണ് എന്ന് പറഞ്ഞാണ് ഉപദ്രവിച്ചത് എന്നും അനീഷ് പറഞ്ഞു. എല്ലാവരും പെണ്കുട്ടിയോട് ലൈംഗിക ബന്ധത്തിന് വരെ നിര്ബന്ധിപ്പിച്ചു എന്നും അനീഷ് പറഞ്ഞു. പൊലീസില് പരാതിപ്പെടുമെന്ന് പറഞ്ഞപ്പോള് പരാതിപ്പെട്ടാല് വീഡിയോ ദൃശ്യങ്ങള് സമൂഹമാദ്ധ്യമങ്ങളില് പ്രചരിപ്പിക്കുമെന്ന് ഭീഷണിപ്പെടുത്തുകയും ഇരുവരുടെയും സിം കാര്ഡുകള് ഊരി വാങ്ങുകയും ചെയ്യുകയുണ്ടായി.
മാനഭയം മൂലം ആദ്യം പൊലീസില് പരാതിപ്പെടാന് അനീഷ് തയാറായിരുന്നില്ല. എന്നാല് സ്വന്തം സഹോദരിയെ പോലെ കരുതുന്ന യുവതിയുമായി അനാശാസ്യത്തിലേര്പ്പെട്ടു എന്നു പറഞ്ഞു പ്രചരിപ്പിക്കപ്പെടുന്ന വീഡിയോ വൈറലായതോടെ അനീഷ് പൊലീസില് പരാതിപ്പെടാന് തീരുമാനിച്ചു. എന്നാല് സംഭവം നടന്നു ദിവസങ്ങള് കഴിഞ്ഞിട്ടും പൊലീസ് നടപടി എടുക്കാന് വൈകി.
അഴീക്കല് പുതുമണ്ണേല് വീട്ടില് അഭിലാഷ് എന്ന സുഭാഷ് (33) കായംകുളം എരുവ മണലൂര് തറയില് ധനീഷ് (30), അഴീക്കല് മീനത്ത് പുതുവല് വീട്ടില് ബിജു (42) എന്നിവരാണ് പൊലീസ് പിടിയിലായത്. പ്രതികള്ക്ക് എതിരെ സ്ത്രീത്വത്തെ അപമാനിച്ചതിനും ദേഹോപദ്രവം ഏല്പ്പിച്ചതിനും ദൃശ്യങ്ങള് പകര്ത്തി പ്രചരിപ്പിച്ചതിനും പ്രത്യേകം വകുപ്പുകള് ചുമത്തിയാണു കേസ് എടുത്തത്. പക്ഷെ നാട്ടില് ചെന്നിട്ടും അനീഷിന് സമാധാനം കിട്ടിയില്ല. നാട്ടിലുള്ള കളിയാക്കലുകളും ചിരിയുമെല്ലാം താങ്ങാന് അനീഷിനായില്ല. അങ്ങനെ അവന് എല്ലാവരോടും വിട പറഞ്ഞു.
https://www.facebook.com/Malayalivartha