ലക്ഷ്യം 50 ലക്ഷം... നടിയെ ആക്രമിച്ചത് കാമുകിക്കൊപ്പം അടിച്ച് പൊളിക്കാനുള്ള പണം കണ്ടെത്താനെന്ന് സുനി
ദൃശ്യങ്ങള്‍ പകര്‍ത്തി ബ്ലാക്ക്‌മെയില്‍ ചെയ്ത് 50 ലക്ഷം രൂപ തട്ടിയെടുക്കാന്‍ പദ്ധതിയിട്ടെന്ന് പ്രതി സുനില്‍കുമാറിന്റെ മൊഴി. അതേ സമയം നടിയെ തട്ടിക്കൊണ്ടുപോയി ആക്രമിച്ചതു കാമുകിയോടൊപ്പം ജീവിക്കാനുള്ള പണം കണ്ടെത്താനെന്നും മൊഴി നല്‍കി. തെന്നിന്ത്യന്‍ സിനിമയിലെ മുന്‍നിര നടിയുടെ അപകീര്‍ത്തികരമായ നടിയെ ഉപദ്രവിക്കാന്‍ മറ്റാരും ക്വട്ടേഷന്‍ നല്‍കിയിട്ടില്ലെന്നാണു പ്രതിയുടെ നിലപാട്.
എന്നാല്‍, അതിക്രമം ക്വട്ടേഷനാണെന്ന നടിയുടെയും ബന്ധുക്കളുടെയും നിലപാട് അന്വേഷണ സംഘവും തള്ളിക്കളഞ്ഞിട്ടില്ല. ഇതു ക്വട്ടേഷനാണെന്ന് ആക്രമണത്തിനിടെ സുനില്‍കുമാര്‍ നടിയോടു പറഞ്ഞിരുന്നു. ക്വട്ടേഷന്‍ നല്‍കിയത് ഒരു സ്ത്രീയാണെന്ന സൂചനയും അതിക്രമത്തിനു ശേഷം ഒളിവില്‍ പോകും മുന്‍പ് സുനില്‍കുമാര്‍ കൂട്ടുപ്രതികള്‍ക്കു നല്‍കിയിരുന്നു.
അതേസമയം, കൂടുതല്‍ ചോദ്യംചെയ്യാനായി പ്രതികളെ കസ്റ്റഡിയില്‍ വാങ്ങാന്‍ പൊലീസ് സമര്‍പ്പിച്ച അപേക്ഷ ഇന്നു പരിഗണിക്കും. പ്രതികള്‍ അറസ്റ്റിലായി 24 മണിക്കൂര്‍ കഴിയുംമുന്‍പ്, ഇന്നലെ ഉച്ചയ്ക്കു 2.30നു സുനില്‍കുമാറിനെയും കൂട്ടുപ്രതി തലശേരി സ്വദേശി വിജീഷിനെയും അന്വേഷണ സംഘം ആലുവ മജിസ്‌ട്രേട്ടിന്റെ വസതിയില്‍ നേരിട്ടു ഹാജരാക്കി റിമാന്‍ഡ് ചെയ്തു. ആദ്യഘട്ട ചോദ്യംചെയ്യല്‍ പൂര്‍ത്തിയാക്കി ഇന്നലെ പുലര്‍ച്ചെ പ്രതികളുടെ സാന്നിധ്യത്തില്‍ അന്വേഷണ സംഘം തെളിവെടുപ്പു നടത്തിയ ശേഷമാണു മജിസ്‌ട്രേട്ട് മുന്‍പാകെ ഹാജരാക്കിയത്.
അതിനിടെ, യുവനടിയെ ആക്രമിച്ചവര്‍ അപകീര്‍ത്തികരമായ ദൃശ്യങ്ങള്‍ പകര്‍ത്തിയ മൊബൈല്‍ ഫോണ്‍ ഇനിയും കണ്ടെത്താനാകാത്തത് പൊലീസിനെ കുഴയ്ക്കുന്നുണ്ട്. ഫോണിനെക്കുറിച്ചുള്ള അന്വേഷണ സംഘത്തിന്റെ ചോദ്യങ്ങള്‍ക്കു പള്‍സര്‍ സുനി വ്യക്തമായ മറുപടി നല്‍കിയില്ല. കുറ്റകൃത്യത്തിന്റെ ഉത്തരവാദിത്തം മുഴുവന്‍ ഏറ്റെടുത്തെങ്കിലും മൊബൈല്‍ ഫോണ്‍ സംബന്ധിച്ചു പരസ്പരവിരുദ്ധമായ മറുപടികളാണു സുനില്‍കുമാര്‍ നല്‍കിയത്. കീഴടങ്ങാന്‍ കോടതിയിലേക്ക് ഒളിച്ച് എത്തും മുന്‍പ് മൊബൈല്‍ ഫോണ്‍ വെണ്ണല ഭാഗത്തെ അഴുക്കുചാലില്‍ ഉപേക്ഷിച്ചെന്നാണു പ്രതിയുടെ മൊഴി. ഈ പ്രദേശത്തെ അഴുക്കുചാലുകള്‍ പൊലീസ് അരിച്ചുപെറുക്കിയെങ്കിലും ഫോണ്‍ കണ്ടെത്താന്‍ കഴിഞ്ഞില്ല.
കേസിലെ നിര്‍ണായക തെളിവാണ് ഈ ഫോണ്‍. പൊലീസ് പിന്തുടരുന്ന വിവരം അറിഞ്ഞ് ഒളിവില്‍പോകുന്നിനു മുന്‍പ്, സുനി അടുപ്പക്കാരിയായ യുവതിയുടെ വീടിന്റെ മതില്‍ രാത്രി ചാടിക്കടക്കുന്ന നിരീക്ഷണ ക്യാമറ ദൃശ്യങ്ങള്‍ പൊലീസിനു ലഭിച്ചിരുന്നു. കുറ്റകൃത്യത്തിനു മുന്‍പും ശേഷവും സുനി നടത്തിയ രഹസ്യ നീക്കങ്ങള്‍ ഈ യുവതിയുടെ അറിവോടെയാണെന്ന നിഗമനത്തിലാണു പൊലീസ്. നഗരത്തില്‍ വാടകയ്ക്കു താമസിക്കുന്ന ആലപ്പുഴ സ്വദേശിയായ യുവതിയെ പൊലീസ് ചോദ്യം ചെയ്യുന്നുണ്ട്. പ്രതികളുടെ വക്കാലത്ത് എടുക്കാതെ പ്രതികളെ ഒളിവില്‍ പോകാനും അഭിഭാഷകനെന്നു തെറ്റിധരിപ്പിക്കുന്നവിധം വസ്ത്രം ധരിപ്പിച്ചു കോടതിയില്‍ കീഴടങ്ങാനും ഒത്താശ ചെയ്ത അഭിഭാഷകനും പൊലീസിന്റെ നിരീക്ഷണത്തിലാണ്
https://www.facebook.com/Malayalivartha
