തിരക്കിനിടയിലും പുലിമുരുകന്‍ ആദ്യ ദിവസങ്ങളില്‍ തന്നെ കണ്ട്, തന്റെ മികച്ച അഭിപ്രായം മോഹന്‍ലാലിനെ ഫോണ്‍ വിളിച്ച് പറഞ്ഞയാളാണ് കേരളത്തിന്റെ മുഖ്യമന്ത്രി. ദേശാഭിമാനി അക്ഷരമുറ്റത്തിന്റെ ബ്രാന്റ് അംബാസിഡറായ മോഹന്‍ലാല്‍, കുട്ടികളോട് പിണറായിയെ മാതൃകയാക്കാന്‍ പോലും പറഞ്ഞിട്ടുമുണ്ട്.

എന്നാല്‍ മലയാളം കമ്യൂണിക്കേഷന്‍ ചെയര്‍മാനായ മമ്മൂട്ടിയുമായി പിണറായിക്ക് അതിലേറെ ബന്ധമുണ്ടാകുമെന്നുറപ്പ്. ഇവരെ ഒരുമിച്ച് പലവേദികളിലും കാണാറുമുണ്ട്. സിനിമകള്‍, പ്രത്യേകിച്ച് ആക്ഷന്‍ സിനിമകളൊന്നും വിടാതെ കാണുന്ന നല്ല സിനിമാസ്വാദകനാണ് പിണറായിയെന്നും നാട്ടുകാര്‍ക്കറിയാം. രണ്ട് താരരാജാക്കന്മാരുമായും മികച്ച ബന്ധമുള്ള ഈ പിണറായി ഇവരിലാരുടെ ഫാനായിരിക്കും? 

കേരളത്തിലാര്‍ക്കും അത്ര പെട്ടന്ന് ഉത്തരം ലഭിക്കാത്ത ഈ ചോദ്യത്തിന് മറുപടിയുമായി വന്നത് ലിബര്‍ട്ടി ബഷീറായിരുന്നു. പിണറായിയുടെ നാട്ടിലെ തീയറ്റര്‍ മുതലാളിയാണ് എന്നതിനാല്‍ തന്നെ, അദ്ദേഹം പറയുന്നതിലേക്ക് നാട് കാതോര്‍ത്തു. പിണറായി മമ്മൂട്ടിഫാനാണെന്നാണ് ലിബര്‍ട്ടി ബഷീറിന്റെ കണ്ടെത്തല്‍. ഇതും കടന്ന് മമ്മൂട്ടിക്ക് ഭരണത്തിലാകെ സ്വാധീനമുണ്ടെന്നും ബഷീര്‍ പറഞ്ഞുകളഞ്ഞു. ഈ വാക്കുകള്‍ക്ക് മറുപടിയുമായി സാക്ഷാല്‍ പിണറായി തന്നെയാണ് ഇപ്പോള്‍ രംഗത്തെത്തിയിരിക്കുന്നത്.

ബഷീറിന്റെയും പിണറായിയുടെയും നാടായ തലശേരി തന്നെയാണ് മറുപടിക്ക് വേദിയായത്. പിടി കുഞ്ഞുമുഹമ്മദിന്റെ സിനിമയുടെ സ്വിച്ച് ഓണ്‍ കര്‍മ്മത്തിനെത്തിയതായിരുന്നു പിണറായി. താനൊരു മഹാനടന്റെ ഫാനാണെന്ന് തലശേരിക്കാരനായ സിനിമയുമായുള്ള ബന്ധമുള്ള ഒരാള്‍ പറഞ്ഞതുകേട്ടു എന്നുപറഞ്ഞാണ് പിണറായി മറുപടി ആരംഭിച്ചത്. തന്റെ സര്‍ക്കാരിലും മമ്മൂട്ടിക്ക് സ്വാധീനമുണ്ടെന്നാണ് ആ തലശേരിക്കാരന്റെ ആരോപണമെന്നും പിണറായി പറഞ്ഞു. തലശേരിക്കാരനായിട്ടും അയാള്‍ക്ക് ഇതേവരെ തന്നെക്കുറിച്ച് ഒന്നും മനസിലാക്കാന്‍ കഴിഞ്ഞില്ലല്ലോ എന്നാണ് ബഷീറിന്റെ വാക്കുകള്‍ക്കുള്ള പിണറായിയുടെ ആദ്യ മറുപടി. 

അങ്ങനെ സ്വാധീനിക്കാന്‍ കഴിയുന്നയാളാണ് താനെങ്കില്‍, തലശേരിക്കാരനായ ബഷീറിനും തന്നെ സ്വാധീനിക്കാന്‍ കഴിയേണ്ടേ എന്നും പിണറായി ചോദിക്കുന്നു. സിനിമാ മേഖലയിലെ പ്രശ്‌നത്തില്‍ തന്റേതായ നിര്‍ദേശം മാത്രമാണ് മുന്നോട്ടുവെച്ചത്. അതുമൂലം ബഷീറിന് എന്തെങ്കിലും പ്രശ്‌നമുണ്ടായാല്‍ അത് മമ്മൂട്ടിയുടെ തോളത്തിടേണ്ടെന്നും പിണറായി ഓര്‍മ്മിപ്പിക്കുന്നു. അത്തരത്തിലൊരു ചിത്രീകരണത്തിന് പുറപ്പെടേണ്ടെന്നും പിണറായി മുന്നറിയിപ്പ് നല്‍കുന്നു. 

മമ്മൂട്ടി ഫാനാണോ താനെന്ന് പറയാതിരിക്കാന്‍ പിണറായി കാട്ടിയ ജാഗ്രതയും ശ്രദ്ധേയമാണ്. എങ്കിലും തനിക്ക് മമ്മൂട്ടി ഏറെ പ്രിയപ്പെട്ടയാളാണെന്ന് ബോധ്യപ്പെടുത്താനും അദ്ദേഹത്തിന് കഴിഞ്ഞു. മമ്മൂട്ടിയുടെയോ ലിബര്‍ട്ടി ബഷീറിന്റെയോ പേരുപയോഗിച്ചില്ലെങ്കിലും കേട്ടിരുന്നവര്‍ക്കെല്ലാം കാര്യങ്ങള്‍ ബോധ്യപ്പെട്ടുവെന്ന് വ്യക്തം.പി.ടി കുഞ്ഞുമുഹമ്മദ് സംവിധാനം ചെയ്ത 'വിശ്വാസപൂര്‍വം മന്‍സൂര്‍' എന്ന സിനിമയുടെ സ്വിച്ച് ഓണ്‍ തലശേരിയില്‍ നിര്‍വഹിക്കാനെത്തിയപ്പോഴാണ് പിണറായി ലിബര്‍ട്ടി ബഷീറിന് മറുപടി നല്‍കിയത്. തിയറ്റര്‍ സമരകാലത്ത് സര്‍ക്കാരില്‍ നിന്ന് തനിക്ക് നീതി ലഭിക്കാതിരിക്കാന്‍ കാരണം പിണറായി വിജയനില്‍ മമ്മൂട്ടിക്കുള്ള സ്വാധീനമാണെന്നും, ഇതിന്റെ ബലിയാടാണ് താനെന്നും ലിബര്‍ട്ടി ബഷീര്‍ മുന്‍പ് പറഞ്ഞിരുന്നു. നടിയെ തട്ടിക്കൊണ്ടുപോയ സംഭവവുമായി ബന്ധപ്പെട്ടാണ് പിണറായി വിജയനെ മമ്മൂട്ടി ഫാനായി വിശേഷിപ്പിച്ച് ലിബര്‍ട്ടി ബഷീര്‍ വിശേഷിപ്പിച്ചത്. 

മുഖ്യമന്ത്രി മുഖം നോക്കാതെ നടപടിയെടുത്താല്‍ ഗൂഢാലോചന തെളിയുമെന്നും, മമ്മൂട്ടിയുടെ ഇടപെല്‍ ഇല്ലെങ്കില്‍ പിണറായി വിജയന് ഇത് കഴിയുമെന്നുമായിരുന്നു ലിബര്‍ട്ടി ബഷീര്‍ കഴിഞ്ഞ ദിവസം പറഞ്ഞത്. മോഹന്‍ലാല്‍ ഇത്തരം കേസുകളില്‍ അന്യായമായി ഇടപെടില്ലെന്നും ലിബര്‍ട്ടി ബഷീര്‍ പറഞ്ഞിരുന്നു. ഇക്കാര്യത്തിന് മറുപടിയുമായാണ് ഇന്ന് പിണറായി എത്തിയിരിക്കുന്നത്.