കുണ്ടറ പത്തുവയസുകാരിയെ ക്രൂരമായി പീഡിപ്പിച്ച ഞണ്ടു വിജയന്‍ എന്ന വിക്ടര്‍ തന്നെയാണ് തന്റെ 14 വയസുകാരനായ മകനേയും കൊന്നതെന്ന് ആ കുട്ടിയുടെ മാതാവ്. ഇതോടൊപ്പം അമ്മ പോലീസില്‍ പരാതിയും നല്‍കി. 2010ലാണ് ഈ പതിനാലു വയസുകാരന്‍ മരണമടഞ്ഞത്. ഏഴു വര്‍ഷത്തിന് ശേഷമാണ് ഈ അമ്മ പരാതിയുമായി എത്തിയത്. തന്റെ മകനെ ക്രൂര പ്രകൃതി വരുദ്ധ പീഡനത്തിന് വിധേയമാക്കി കൊന്നതാകാമെന്നാണ് അവര്‍ സംശയിക്കുന്നത്.

ഇതിനിടെ ഇയാള്‍ തന്റെ മകളെ ക്രൂരമായി ബലാത്സംഗം ചെയ്‌തെന്ന് കാട്ടി 13 വയസുകാരിയുടെ അമ്മയും രംഗത്തെത്തി. ഇവരുടെ പരാതിയിന്‍മേല്‍ പോലീസ് കേസെടുത്തു. വിക്ടറിനെ ഈ പരാതിയിന്‍മേല്‍ കൂടുതല്‍ ചോദ്യം ചെയ്യും. 

പത്തുവയസുകാരിയെ പീഡിപ്പിച്ച കേസില്‍ വിക്ടര്‍ അറസ്റ്റിലായതോടെയാണ് അയാളെപ്പറ്റിയുള്ള കൂടുതല്‍ പീഡനങ്ങള്‍ പുറത്തായത്. ചുറ്റുപാടുമുള്ള നിരവധി ആണ്‍കുട്ടികളേയും ഇയാള്‍ പീഡനത്തിനിരയാക്കി എന്നാണ് തെളിഞ്ഞത്. ഇനിയും പരാതികള്‍ ഉയരുമെന്നാണ് അറിയുന്നത്.

ആത്മഹത്യ ചെയ്ത പെണ്‍കുട്ടിയുടെ സഹോദരി തന്നെയും ഇയാള്‍ പീഡിപ്പിച്ചിട്ടുണ്ടെന്ന് നേരത്തെ വെളിപ്പെടുത്തി. കഴിഞ്ഞ ബുധനാഴ്ച മുതല്‍ പൊലീസ് കസ്റ്റഡിയിലുള്ള പ്രതി ആദ്യം നിഷേധിച്ചെങ്കിലും പിന്നീട് കുറ്റസമ്മതം നടത്തുകയായിരുന്നു. മൂത്ത കുട്ടിയെ പീഡിപ്പിച്ച സംഭവത്തില്‍ കുണ്ടറ എസ്.ഐ പ്രത്യേകം കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിട്ടുണ്ട്. 

കേസില്‍ കുട്ടിയുടെ അമ്മൂമ്മ ലതയെ (55) രണ്ടാം പ്രതിയാക്കും. വിക്ടര്‍ ഡാനിയേലിന്റെ ഭാര്യയാണ് ലത. മരിച്ച കുട്ടിയേയും ചേച്ചിയെയും പീഡിപ്പിക്കാന്‍ ഇവര്‍ ഒത്താശ നല്‍കിയതായി അന്വേഷണസംഘം കണ്ടെത്തി. കുട്ടികള്‍ പലപ്പോഴും പരാതിപ്പെട്ടെങ്കിലും ലത അത് കാര്യമാക്കിയില്ല. മന:ശാസ്ത്ര വിദഗ്ദ്ധരുടെ സഹായത്തോടെയുള്ള ചോദ്യം ചെയ്യലില്‍ ലത തന്നെ ഇക്കാര്യങ്ങള്‍ പൊലീസിനോട് വെളിപ്പെടുത്തുകയായിരുന്നു. അതേ സമയം പെണ്‍കുട്ടിയുടെ മാതാവ് ഷീജയ്ക്ക് വിക്ടറിന്റെ പ്രവൃത്തികള്‍ ഇഷ്ടമായിരുന്നില്ല.

മക്കളുടെ പഠനച്ചെലവും വീട്ടുകാര്യങ്ങളും നോക്കുന്നത് വിക്ടര്‍ ആയതിനാല്‍ അയാളെ എതിര്‍ക്കാനും കഴിഞ്ഞിരുന്നില്ലെന്നതാണ് യാഥാര്‍ത്ഥ്യം. മകളുടെ മരണവുമായി ബന്ധപ്പെട്ട് ചോദ്യം ചെയ്തപ്പോള്‍ സംഭവങ്ങള്‍ മറച്ച് വച്ചത് മറ്റൊരു മകള്‍ കൂടി ഉള്ളതുകൊണ്ടാണെന്ന് ഇവര്‍ പറഞ്ഞു. വിക്ടറിനെ കസ്റ്റഡിയില്‍ വാങ്ങി കൂടുതല്‍ തെളിവെടുപ്പ് നടത്തിയ ശേഷമേ അന്തിമ പ്രതിപ്പട്ടിക തയ്യാറാക്കുകയുള്ളൂ. കുട്ടിയുടെ അമ്മയും പ്രതിപട്ടികയില്‍ ഉണ്ടാകുമോ എന്ന് അതിന് ശേഷം മാത്രമേ വ്യക്തമാകൂ.