മാസം തികയാതെ ജനിച്ച കുഞ്ഞിനെ രക്ഷപ്പെടുത്തിയില്ല. മതിയായ ചികിത്സ ലഭ്യമാക്കാതെ ആ കുഞ്ഞിനെ മറവു ചെയ്യുകയും ചെയ്തു. തുടര്‍ന്ന് വീട്ടമ്മ അറസ്റ്റിലായി. പറക്കോട് ടിബി ജംഗ്ഷനില്‍ സബ് സ്‌റ്റേഷനു സമീപമുള്ള വീടിന്റെ തെക്ക് പടിഞ്ഞാറ് ഭാഗത്താണ് ഒരു കാല്‍ ഇല്ലാത്ത നവജാത ശിശുവിന്റെ മൃതദേഹം കണ്ടെത്തിയത്. തുടര്‍ന്നു നടന്ന അന്വേഷണത്തിലാണ് വീട്ടമ്മ അറസ്റ്റിലായത്. ഇവരെ ഇന്നലെ അടൂര്‍ കോടതിയില്‍ ഹാജരാക്കി റിമാന്‍ഡു ചെയ്തു.

സംഭവത്തെക്കുറിച്ച് പോലീസ് പറയുന്നതിങ്ങനെ. കഴിഞ്ഞ 18നു രാത്രി 10.30ന് വയറുവേദന അനുഭവപ്പെട്ട ഇവര്‍ ശൗചാലയത്തില്‍ പോയപ്പോഴാണ് കുട്ടി പുറത്തുവന്നത്. ഇതോടെ ആരെയും അറിയിക്കാതെ ഇവര്‍ തന്നെ വീടിന്റെ തെക്ക് പടിഞ്ഞാറ് മൂലയില്‍ റബര്‍ തോട്ടത്തിനുള്ളില്‍ 40 സെന്റി മീറ്റര്‍ നീളത്തിലുള്ള കുഴിയില്‍ മറവു ചെയ്തത്. പൊക്കിള്‍കൊടിയും വേര്‍പെടുത്തിയത് ഇവര്‍ തന്നെയാണ്.

മൃതദേഹത്തിനു നാലുദിവസം പഴക്കമുള്ളതിനാല്‍ ജനിച്ചപ്പോള്‍ ജീവനുണ്ടായിരുന്നോയെന്നു പറയാന്‍ കരള്‍ അഴുകിയതിനാല്‍ കഴിയില്ല. ഗര്‍ഭിണിയായിരുന്നുവെന്ന് ഭര്‍ത്താവിനോ ഇവര്‍ക്കോ അറിയില്ലായിരുന്നെന്നും പറയുന്നു. 28 ആഴ്ച മാത്രം വളര്‍ച്ചയുള്ള കുട്ടിയായിരുന്നു.