മരത്തില്‍ കാല്‍ കുരുങ്ങി കൊമ്പന്‍ ചരിഞ്ഞു
കാടും നാടും വിറപ്പിച്ച കാട്ടുകൊമ്പന്‍ ചക്കയിടാന്‍ പ്ലാവില്‍ കയറുന്നതിനിടെ കാല്‍ കുരുങ്ങി ചരിഞ്ഞു. ഷോളയൂരിലും പരിസരത്തും ഏതാനും മാസങ്ങളായി കൃഷിയും വീടുകളും നശിപ്പിച്ച് ജനവാസ കേന്ദ്രങ്ങളില്‍ ഭീതി പരത്തിയ ഒറ്റയാന്‍മാരില്‍ ഒന്നാണ് വരടിമല താഴ്വാരത്തെ സ്വകാര്യതോട്ടത്തില്‍ കഴിഞ്ഞ ദിവസം പകല്‍ ചരിഞ്ഞത്.
രാത്രി തീറ്റതേടിയിറങ്ങിയപ്പോള്‍ കണ്ട പ്ലാവില്‍ നിന്നു ചക്കയിടുന്നതിനിടെ ഒറ്റയാന്റെ മുന്നിലെ വലതുകാല്‍ മരത്തിന്റെ കവരയില്‍ കുടുങ്ങുകയായിരുന്നു. രക്ഷപ്പെടാനുള്ള വെപ്രാളത്തിനിടെ പാദത്തിലെ വണ്ണമേറിയ ഭാഗം കുടുങ്ങി മലര്‍ന്നുവീണു. മണിക്കൂറുകളോളം ചിന്നംവിളിയുമായി കിടന്ന കൊമ്പന്‍ ഉച്ചയോടെയാണു ചരിഞ്ഞത്. മാടു മേയ്ക്കുന്നവരാണു വൈകിട്ട് ആനയെ കണ്ടത്. 
ഇവര്‍ വിവരമറിയിച്ചതനുസരിച്ച് വനപാലകര്‍ എത്തിയെങ്കിലും അപ്പോഴേക്കും ചരിഞ്ഞു. വീഴ്ചയില്‍ കാലിന്റെ എല്ല് പൊട്ടുകയും സ്ഥാനം തെറ്റുകയും ചെയ്തു.
മണിക്കൂറുകളോളം തലകീഴായി മലര്‍ന്ന് കിടന്നതും വീഴ്ചയുടെ ആഘാതവും വേദനയും കാരണം ആന്തരികാവയവങ്ങളിലുണ്ടായ സമ്മര്‍ദ്ദം ഹൃദയത്തിന്റെയും ശ്വാസകോശത്തിന്റെയും പ്രവര്‍ത്തനത്തെ ബാധിച്ചു. സീനിയര്‍ വെറ്ററിനറി സര്‍ജന്‍ ഡോ. റെജിമോന്റെ നേതൃത്വത്തില്‍ പോസ്റ്റുമോര്‍ട്ടം നടത്തിയ ശേഷം മറവുചെയ്തു.
രണ്ടര മീറ്റര്‍ ഉയരമുള്ള ആനയ്ക്ക് 20 വയസ്സുള്ളതായി വനപാലകര്‍ പറഞ്ഞു. കൊമ്പിന് 145 സെന്റി മീറ്റര്‍ നീളവും 26 സെന്റിമീറ്റര്‍ നടുവണ്ണവുമുണ്ട്. അഗളി റേഞ്ച് ഓഫിസര്‍ സി. ഷെറീഫ്, ഡപ്യൂട്ടി ഓഫിസര്‍ കെ. മനോജ്, ഫോറസ്റ്റര്‍ ബിനു, ബീറ്റ് ഓഫിസര്‍ എന്‍.ആര്‍. രവികുമാര്‍, രാമന്‍, കണ്ണന്‍, മണികണ്ഠന്‍ എന്നിവര്‍ നേതൃത്വം നല്‍കി.
https://www.facebook.com/Malayalivartha
