ഫെയ്‌സ്ബുക്ക് എന്നുകേട്ടാല്‍ പല സ്ത്രീകള്‍ക്കും പേടിയാണ്. സോഷ്യല്‍മീഡിയ സമ്മാനിച്ച അപമാനങ്ങളാണ് അവരെ അകറ്റുന്നത്. സ്ത്രീകള്‍ക്കെതിരെ എന്തും വിളിച്ചുപറയുക, മോശമായി ചിത്രീകരിക്കുക, അശ്ലീല കമന്റ് പോസ്റ്റ് ചെയ്യുക, സ്വകാര്യ ചിത്രങ്ങള്‍ പ്രചരിപ്പിക്കുക തുടങ്ങി ഒരുപാട് തറവേലകളാല്‍ പലപ്പോഴും സ്ത്രീവിരുദ്ധമാകാറുണ്ട് സോഷ്യല്‍മീഡിയ. 

സമൂഹത്തിലെ എല്ലാത്തിന്റെയും ഒരു തലം സാമൂഹികമാധ്യമങ്ങളിലും പ്രകടമായേക്കും എന്നൊരു വിശദീകരണമേ ഇതിനെപ്പറ്റി കണ്ടിട്ടുള്ളൂ. സോഷ്യല്‍ മീഡിയകളില്‍ അപമാനിക്കുന്നവര്‍ക്കെതിരെ പ്രതികരിക്കാന്‍ സ്ത്രീകള്‍ മടിക്കരുതെന്നുള്ള ക്യാംപയിനുകള്‍ കാര്യമായി നടക്കുന്നുണ്ട്. സ്ത്രീകളെ അപമാനിക്കാന്‍ പുരുഷന്മാരാണ് മുന്നില്‍ നില്‍ക്കുന്നത്. എന്നാല്‍ കേട്ടുകേള്‍വിയില്ലാത്തൊരു ഫെയ്‌സ്ബുക്ക് രഹസ്യകൂട്ടായ്മ സോഷ്യല്‍മീഡിയയില്‍ വിപ്ലവമാകുകയാണ്.

ഇവിടെ പുരുഷന്മാരാണ് ഇരകള്‍. സ്ത്രീകള്‍ മാത്രമാണ് കൂട്ടായ്മയിലെ അംഗങ്ങള്‍. പുരുഷന്മാരെപ്പറ്റിയുള്ള അശ്ലീല തമാശകളും അവരുടെ നഗ്‌നചിത്രങ്ങളും സെക്‌സ് ചര്‍ച്ചകളും മാത്രം നടക്കുന്നൊരു ഗ്രൂപ്പ്. ഞെട്ടേണ്ട, ഇവിടെയൊന്നുമല്ല ഗ്രൂപ്പിന്റെ ആസ്ഥാനം. ബി.ജി.എ അഥവാ ബാഡ് ഗേള്‍സ് അഡൈ്വസ് എന്ന സീക്രട്ട് ഗ്രൂപ്പുള്ളത് ഓസ്‌ട്രേലിയയിലാണ്. ഇതിലെ സ്ത്രീകളുടെ അംഗബലം എത്രയെന്നോ, രണ്ടുലക്ഷം! പുരുഷന്മാര്‍ അറിഞ്ഞോ അറിയാതെയോ എടുക്കുന്ന അശ്ലീല ചിത്രം ഷെയര്‍ ചെയ്തുള്ള ചര്‍ച്ചയാണ് ഗ്രൂപ്പില്‍ നടക്കുന്നത്. മെസഞ്ചറിലോ വാട്‌സാപ് പോലുള്ള സോഷ്യല്‍മീഡിയകളിലൂടെയോ പുരുഷന്മാര്‍ അയക്കുന്ന ചിത്രങ്ങളും ഗ്രൂപ്പിലെത്തും.

ഇത്തരം ചിത്രങ്ങള്‍ ഗ്രൂപ്പില്‍ ചര്‍ച്ച ചെയ്യുന്നു, പരസ്യമായി വിവരിക്കുന്നു. കാമുകിമാരോ പെണ്‍സുഹൃത്തുക്കളോ എടുക്കുന്ന ചിത്രങ്ങളും ചര്‍ച്ചയ്‌ക്കെടുക്കും. അവരവരുടെ സ്വകാര്യ നിമിഷങ്ങളെ പറ്റിയാണ് കൂട്ടായ്മയില്‍ മനസുതുറക്കുന്നത്. പലപ്പോഴും പുരുഷനെ തിരിച്ചറിയുന്ന വിധത്തിലുള്ളതായിരിക്കും ചിത്രങ്ങള്‍. അതൊന്നും അംഗങ്ങള്‍ക്കു പ്രശ്‌നമാകാറില്ല. പുരുഷന്മാരെ പറ്റിയുള്ള പല താരതമ്യങ്ങളും നടക്കാറുണ്ട്.

സോഷ്യല്‍ മീഡിയയില്‍ നിലവില്‍ എത്രമാത്രം സ്ത്രീവിരുദ്ധ പ്രവൃത്തികളുണ്ടോ അതെല്ലാം അതേപടി പുരുഷന്‍മാരിലും ചിത്രീകരിച്ചിരിക്കുന്നു. കമന്റ്, ചിത്രം, വിഡിയോ, ട്രോള്‍, ദ്വയാര്‍ഥ പ്രയോഗം തുടങ്ങിയവയ്‌ക്കെല്ലാം പുരുഷനെ കരുവാക്കുന്നു എന്നതാണ് കൗതുകം. സ്ത്രീകളുടെ മധുരപ്രതികാരം. സീക്രട്ട് ഗ്രൂപ്പായതിനാല്‍ മറ്റുപ്രശ്‌നങ്ങളില്ല. വിശദമായ പരിശോധനകള്‍ക്കു ശേഷം സ്ത്രീയാണെന്നു ഉറപ്പുവരുത്തിയേ ഗ്രൂപ്പില്‍ പ്രവേശനം നല്‍കൂ. കടുത്ത നിയമാവലികള്‍ അംഗീകരിക്കുകയും വേണം. ഗ്രൂപ്പിനെതിരായി പാര പണിയില്ലെന്ന് ഉറപ്പു കൊടുക്കണം. ഗ്രൂപ്പിലെ ചാറ്റുകളും ചര്‍ച്ചകളും ചിത്രങ്ങളും മറ്റെവിടെയും പങ്കുവയ്ക്കരുത്. അങ്ങനെയുണ്ടായാല്‍ തത്ക്ഷണം ഗ്രൂപ്പില്‍ നിന്നു പുറത്താക്കും.

സ്ത്രീകള്‍ സ്വകാര്യ ജീവിതത്തെ കുറിച്ച് തുറന്നുപറയുന്നു എന്നതാണ് ഗ്രൂപ്പിലെ പ്രത്യേകതയായി എല്ലാവരും വിലയിരുത്തുന്നത്. അവരുടെ അശ്ലീല ഫാന്റസികളും രഹസ്യതമാശകളും അശ്ലീലക്കഥകളും പരസ്യമാക്കുന്ന സ്ഥലം. പുരുഷന്മാരെ മോശമായി കാണിക്കുന്ന പോണ്‍ വിഡിയോകളും ഇവര്‍ പങ്കിടാറുണ്ട്. എന്നാല്‍ അശ്ലീല ചര്‍ച്ച മാത്രമല്ല ഇവിടെ നടക്കുന്നതെന്നു ചില അംഗങ്ങള്‍ മാധ്യമങ്ങളോട് വെളിപ്പെടുത്തി. ഗ്രൂപ്പ് ആക്ടിവിറ്റിയുടെ സ്‌ക്രീന്‍ഷോട്ടുകളും ഇവര്‍ ചോര്‍ത്തിയിട്ടുണ്ട്. സ്ത്രീകള്‍ക്കു നേരെയുള്ള ആക്രമണങ്ങള്‍, പീഡനങ്ങള്‍ എന്നിവയെല്ലാം സംസാരിക്കാറുണ്ട്. ഇവയെ തടയേണ്ടത് എങ്ങനെയെന്ന ആരോഗ്യകരമായ നിര്‍ദേശങ്ങളും വരാറുണ്ട്. ഗ്രൂപ്പിനെ പറ്റി വാര്‍ത്തകള്‍ വന്നതോടെ പലരും റിപ്പോര്‍ട്ട് ചെയ്തു പൂട്ടിച്ചു. പക്ഷെ സ്ത്രീകള്‍ വിട്ടുകൊടുത്തില്ല. സമാനപേരില്‍ ദിവസങ്ങള്‍ക്കകം ഗ്രൂപ്പ് തുടങ്ങി അംഗങ്ങളെയെല്ലാം എത്തിച്ചു. പൂട്ടിപ്പോയ ഗ്രൂപ്പ് ഉടന്‍ തുറക്കാനുള്ള നടപടികളും ബാഡ് ഗേള്‍സ് തുടങ്ങിയിട്ടുണ്ട്.