സ്ത്രീകള്‍ക്ക് മുന്നില്‍ നടത്തുന്ന നഗ്‌നതാ പ്രദര്‍ശനം; ഇത്തരം രതിവൈകൃതങ്ങള്‍ക്ക് പുറകിലെ മനഃശാസ്ത്രം
അസ്വാഭാവികമായ ലൈംഗിക ആഗ്രഹങ്ങളും പെരുമാറ്റങ്ങളും ഫാന്റസികളും പുലര്‍ത്തുന്നതിനെയാണു രതിവൈകൃതം എന്നു പറയുന്നത്. ഇവയില്‍ പലതിനേയും രതിയുമായി ബന്ധപ്പെട്ട വൈചിത്ര്യങ്ങള്‍ എന്നു പറയുന്നതാവും കൂടുതല്‍ ശരി. ഇത് ഒരു മാനസികരോഗമായിട്ടല്ല സ്വഭാവവൈകല്യമായിട്ടാണു ഗണിക്കുന്നത്. എന്നാല്‍, മാനസികരോഗികളില്‍ രതിവൈകൃതങ്ങള്‍ കണ്ടുവരാറുണ്ട്. സ്‌കിസോഫ്രീനിയ പോലുളള മനോരോഗത്തിന്റെ ഭാഗമായി ഇത്തരമൊരു വൈകല്യം കണ്ടാല്‍ അതിനെ വൈകല്യമായല്ല ആ മാനസികരോഗത്തിന്റെ ഭാഗമായേ കണക്കാക്കാറുളളൂ. പലപ്പോഴും വ്യക്തികളുടെ സ്വാഭാവികമല്ലാത്ത ലൈംഗിക പെരുമാറ്റങ്ങള്‍ സമൂഹത്തിനു ദോഷകരമാകുമ്പോഴാണ് ഇവരെ പ്രശ്‌നക്കാരാക്കി തിരിച്ചറിയുന്നത്.
ജോണിന്റെ അനുഭവം തന്നെ ഇതിന് ഉദാഹരണമാണ്. അഭിഭാഷകനായ ജോണ്‍ മികച്ച കുടുംബപാശ്ചാത്തലമായുളളയാളാണ്. എന്നാല്‍, വനിതാ ഹോസ്റ്റലിലെ കുളിമുറിയില്‍ രാത്രി ഒളിഞ്ഞുനോക്കിയതിനു പൊലീസ് അറസ്റ്റു ചെയ്തപ്പോഴാണ് ഇയാളുടെ പെരുമാറ്റവൈകല്യത്തെക്കുറിച്ച് വീട്ടുകാര്‍ പോലും തിരിച്ചറിയുന്നത്. നാട്ടില്‍ നിന്നും മാറി ഹോസ്റ്റലുകളിലാണ് ഇയാള്‍ പഠനകാലം കഴിഞ്ഞത്. അക്കാലത്തു വീടുകളിലും ഹോസ്റ്റലുകളിലും ഒളിഞ്ഞുനോക്കിയതിനു പലപ്പോഴും പിടിക്കപ്പെട്ടിട്ടുണ്ടെങ്കിലും അതൊന്നും സ്വന്തം കൂട്ടുകാരെപ്പോലും ജോണ്‍ അറിയിച്ചിരുന്നില്ല. വോയൂറിസമെന്ന(ഒളിഞ്ഞുനോട്ടം) രതിവൈകൃതമുളളയാളാണ് ജോണ്‍. ഇത്തരത്തില്‍ ഒളിഞ്ഞുനോട്ടം, ബാലപീഡനം, നഗ്‌നതാപ്രദര്‍ശനം തുടങ്ങി വിവിധങ്ങളായ രതിവൈകൃതങ്ങളും വൈചിത്ര്യങ്ങളുമുളളവര്‍ സമൂഹത്തിലുമുണ്ട്.
ഏറ്റവും കൂടുതലായി കണ്ടുവരുന്ന രതിവൈകൃതങ്ങളില്‍ ഒന്നാണ് ഫ്രോട്ടറിസം. ബസ് യാത്രയില്‍ സഹയാത്രികരായ പുരുഷന്മാരില്‍ നിന്നും പലപ്പോഴും സ്ത്രീകള്‍ ഇത്തരം അനുഭവങ്ങള്‍ക്കു വിധേയരാകാറുണ്ട്. സ്ത്രീകളുമായി മുട്ടിയുരുമ്മിനിന്ന് അതിലൂടെ ലൈംഗിക സംതൃപ്തി നേടുന്നതാണ് ഫ്രോട്ടറിസം. ലൈംഗികായവയവം സ്ത്രീകളുടെ ശരീരത്തില്‍ ഉരസുന്നതിലൂടെയും ഇവര്‍ ആനന്ദം കണ്ടെത്തുന്നു. ഇവര്‍ ആള്‍ക്കൂട്ടമുളള സ്ഥലങ്ങളിലാണു പോകുന്നത്. ഇത്തരം സ്ഥലങ്ങളില്‍ പോയി സ്ത്രീകളെ മുട്ടിയുരുമ്മിയും തലോടിയുമൊക്കെ തൃപ്തിനേടുന്നു.
പൊതുസ്ഥലങ്ങളില്‍ സ്ത്രീകളെ ലൈംഗികാവയവം പ്രദര്‍ശിപ്പിച്ചു സംതൃപ്തി നേടുന്നവരാണ് എക്‌സിബിഷനിസ്റ്റുകള്‍. എക്‌സിബിഷനിസം എന്നാണ് ഈ ലൈംഗികവൈചിത്ര്യത്തിന്റെ പേര്. വനിതാ ഹോസ്റ്റലുകളുടെയും സ്‌കൂളുകളുടെയും കോളജുകളുടെയും സ്ത്രീകള്‍ താമസിക്കുന്ന സ്ഥലങ്ങളുടെയും മുന്നില്‍ ഇവര്‍ പോയി മൂത്രം ഒഴിക്കുന്നതുപോലെ നില്‍ക്കും. സ്ത്രീകളോ പെണ്‍കുട്ടികളോ വരുമ്പോള്‍ അവര്‍ക്കു മുമ്പിലേക്കു തിരിഞ്ഞു തന്റെ ലൈംഗികാവയവം കാണിക്കുകയും ആ സമയത്തു സ്വയംഭോഗം ചെയ്തു സുഖം നേടുകയും ചെയ്യുന്നു. ഇതു കാണുന്ന സ്ത്രീകള്‍ ഞെട്ടും. ഈ ഞെട്ടല്‍ ഇവരെ കൂടുതല്‍ ലൈംഗികാനന്ദത്തിലെത്തിക്കുന്നു.
പൊതുവായി കണ്ടുവരുന്ന മറ്റൊരു രതിവൈകൃതമാണ് ഒളിഞ്ഞുനോട്ടം അഥവാ വോയറിസം. വീടുകളുടെ കിടക്കറകള്‍, സ്ത്രീകളുടെ കുളിക്കടവുകള്‍ അല്ലെങ്കില്‍ ബാത്ത് റൂം തുടങ്ങിയ ഇടങ്ങളില്‍ ഒളിഞ്ഞുനോക്കുന്നതിലൂടെ ലൈംഗിക സംതൃപ്തി നേടുന്നവരാണ് ഇവര്‍. പലപ്പോഴും ഇത്തരം ഒളിഞ്ഞുനോട്ടക്കാരെ നാട്ടുകാര്‍ പിടികൂടി കൈകാര്യം ചെയ്യാറുമുണ്ട്. തല്ല് കൊണ്ടു കഴിഞ്ഞാല്‍ ഇവര്‍ കുറച്ചു നാളുകള്‍ അടങ്ങിയിരിക്കും. പിന്നീട് വീണ്ടും ഒളിഞ്ഞുനോട്ടം തുടരുന്നു.
സമൂഹത്തിന് ഏറ്റവും ദോഷകരമായ രതിവൈകൃതമാണ് പെഡോഫീലിയ. കുട്ടികളെ ലൈംഗിക താല്‍പര്യങ്ങള്‍ക്കായി ഉപയോഗിക്കുന്നവരാണിവര്‍. ബാല്യം വിട്ട് കൗമാരത്തിലേക്ക് വളരുന്ന കുട്ടികളെ അല്ലെങ്കില്‍ അതിലും ചെറിയ കുട്ടികളെ പീഡിപ്പിക്കുന്നു. കുട്ടികളെ മാത്രമാണ് ഇവര്‍ക്ക് താല്‍പര്യം. കൂടാതെ, ആണ്‍കുട്ടികളെയും പെണ്‍കുട്ടികളെയും ഉപയോഗിക്കുന്നവരുണ്ട്. ഇവര്‍ സ്‌കൂളുകളുടെ സമീപം പോയി നിന്നു മിഠായിയൊക്കെ നല്‍കി കുട്ടികളുമായി ചങ്ങാത്തം കൂടി അവരെ ദുരുപയോഗം ചെയ്യും. സ്വന്തം വീടുകളില്‍ പോലും ഇത്തരക്കാരില്‍ നിന്നും കുട്ടികള്‍ സുരക്ഷിതരല്ല. അയല്‍പക്കക്കാര്‍ അല്ലെങ്കില്‍ അകന്ന ബന്ധുക്കളൊക്കെയായിരിക്കും ഇവര്‍. വീട്ടുകാരുമായി ഇവര്‍ നല്ല ബന്ധത്തിലായിരിക്കും. കുട്ടികളുമായും ഇവര്‍ ചങ്ങാത്തം കൂടി മയക്കിയെടുത്തിട്ട് അവരെ ദുരുപയോഗം ചെയ്യും.
പങ്കാളിയെ വേദനിപ്പിച്ചു ലൈംഗികാനന്ദം കണ്ടെത്തുന്നതാണ് സെക്ഷ്വല്‍ സാഡിസം എന്നറിയപ്പെടുന്നത്. ഇണയ്ക്കു വേദന അനുഭവിക്കുമ്പോള്‍, അല്ലെങ്കില്‍ ഇണയുടെ ശരീരത്തില്‍ നിന്നും രക്തം ഒഴുകുമ്പോള്‍ ഇവര്‍ക്കു വികാരതീവ്രത വര്‍ധിക്കുന്നു. സ്ത്രീകളെ ബലാല്‍സംഗം ചെയ്യുന്നവര്‍ ഇത്തരം രതിവൈകൃതമുളളവരാണ്. ഇവരില്‍ നല്ലൊരു ശതമാനവും ക്രിമിനലുകളാണ്. അതായത് സാഡിസമുളള ആള്‍ക്കാരാണ്. സ്ത്രീ ഒരിക്കലും തന്നെ ലൈംഗികമായി പീഡിപ്പിക്കാന്‍ നിന്നുകൊടുക്കില്ല. ബലാല്‍ക്കാരമായി അവളെ പ്രാപിക്കാന്‍ ശ്രമിക്കുമ്പോള്‍ അവള്‍ തടസ്സപ്പെടുത്തുകയും നിലവിളിക്കുകയും ചെയ്യും. സ്വാഭാവികമായും ഏതൊരു പുരുഷന്റെയും ഉദ്ധാരണം ഈ സമയത്തു നഷ്ടപ്പെടും. മനസ്സിന്റെ ശ്രദ്ധ മാറിപ്പോകും എന്നാല്‍, സാഡിസ്റ്റ് മെന്റാലിറ്റിയുളളവര്‍ക്ക് ഈ സാഹചര്യത്തില്‍ അവരുടെ ലൈംഗികതാല്‍പര്യം വര്‍ധിക്കുന്നു.
അചേതന വസ്തുക്കളിലൂടെ ലൈംഗിക സംതൃപ്തി കണ്ടെത്തുന്ന രതിവൈകൃതമാണ് ഫെറ്റിഷിസം. എതിര്‍ലിംഗത്തില്‍പ്പെട്ടവരുടെ വസ്ത്രങ്ങളെ താലോലിക്കുകയും മറ്റും ചെയ്ത് അതിലൂടെ ലൈംഗിക സംതൃപ്തി കണ്ടെത്തുന്നതാണു ഫെറ്റിഷിസത്തില്‍ കൂടുതലായി കാണപ്പെടുന്നത്. സ്ത്രീകളുടെ അടിവസ്ത്രങ്ങള്‍ മോഷണം പോയാല്‍ സംശയിക്കാം ഇത്തരക്കാരാണ് ഇതിനു പിന്നിലെന്ന്.
https://www.facebook.com/Malayalivartha
