കേവലം ഒരു സ്മാര്‍ട്ട് ഫോണ്‍ കൊണ്ട് ലക്ഷക്കണക്കിന് രൂപ കുറേയാളുകളില്‍ നിന്നും കൈക്കലാക്കിയിരിക്കുകയാണ് സൗത്ത് മുംബൈയില്‍ നിന്നുമുള്ള ടീന അജിങ്ക്യ എന്ന യുവതി. തന്റെ മൊബൈല്‍ ഫോണില്‍ യു.എസ്സ് വിസ സെന്റര്‍ നടത്തുന്നു എന്ന വ്യാജേനയാണ് ആളുകളില്‍ നിന്നും ഇവര്‍ പതിനഞ്ച് ലക്ഷത്തോളം രൂപ തട്ടിയെടുത്തത്.

തന്റെ മൊബൈലില്‍ ആള്‍ക്കാരുടെ വിരലടയാളം പതിപ്പിച്ചും പാസ്സ്‌പോര്‍ട്ട് ഉപയോഗിച്ചും ഇവര്‍ പണം കൈക്കലാക്കി. വിസയ്ക്ക് അപേക്ഷിച്ചവരില്‍ നിന്നും ഒരാള്‍ക്ക് വീതം11,200 രൂപ വീതമാണ് ടീന ഈടാക്കിയിരുന്നത്. വഞ്ചിക്കപ്പെട്ട വ്യക്തികളില്‍ ഒരാള്‍ ഗാംദേവി പോലീസ് സ്‌റ്റേഷനില്‍ നല്‍കിയ പരാതിയിലാണ് സംഭവം പുറംലോകം അറിയുന്നത്.യുവതി യു.എസ്സ് കോണ്‍സുലേറ്റില്‍ ജോലി ചെയ്യുകയാണ് എന്ന് നിരന്തരം ഇവരോട് പറഞ്ഞിരുന്നു. ഇങ്ങനെയാണ് ആള്‍ക്കാരെല്ലാം ഇവരുടെ കെണിയില്‍ പെടുന്നത്. 10 വര്‍ഷം കാലാവധിയുള്ള യു.എസ്സ് വിസ തരപ്പെടുത്തിക്കൊടുക്കാം എന്നാണ് ഇവര്‍ എല്ലാവരെയും പറഞ്ഞ് ധരിപ്പിച്ചിരുന്നത്. യുവതിയുടെ ബാങ്ക് അക്കൗണ്ടില്‍ എല്ലാവരും പണം നിക്ഷേപിക്കണമെന്നും വിസ തരുമെന്നും അതിന് കഴിഞ്ഞില്ലെങ്കില്‍ പണം തിരികെ നല്‍കാമെന്നും ടീന പറയുകയായിരുന്നുവെന്ന് പരാതിക്കാരില്‍ ഒരാള്‍ പറയുന്നു.ജൂണ്‍ പതിനേഴാം തീയ്യതി ടീന എല്ലാവര്‍ക്കും ബാന്ദ്രയിലെ ഒരു കോംപ്ലക്‌സില്‍ അപ്പോയ്ന്‍മെന്റ് ഫിക്‌സ് ചെയ്യുകയും എന്നാല്‍ യുവതി അവിടെ നിന്നും മുങ്ങുകയുമായിരുന്നു. ഇവര്‍ ഇപ്പോള്‍ ഒളിവിലാണ്. പോലീസ് അന്വേഷണം ആരംഭിച്ചു കഴിഞ്ഞു.